Apocalipsis 4:1-11
4 Shiasaʼa süchikijee tia, teʼrakalaka wanee puettoʼu jutatüin chaa sirumatuʼu. Taapakalaka nünüiki wanee wayuu, müsü aka saaʼin shiʼira konneeta tü nünüikikat, shia tü palajatkat pütchi tia. Anuukalaka nünüiki tamüin: «Püʼliikajaa yaamüin, teeʼiyateechikalaka pümüin süpüshuaʼa tü kasa alatajateetkat».
2 Shiasaʼa süchikijee tia, süntamaatakalaka taaʼumüin tü nüpülainkat Maleiwa. Teʼrakalaka chaa sirumatuʼu wanee einasee niinasekat wanee aluwataai otta eejachi wanee joyotuin saaʼu tia einaseekat.
3 Niasaʼa chi yalajachikai joyotuin saaʼu tü einaseekat, warattüshi maʼin nia, müshi aka saaʼin tü ipa kanüliakat «jaspe» otta müshi nia maʼaka saaʼin tü ipa ishosü kanüliakat «sardio», saʼanasia ipa tia makat. Pasanainkalaka tia einaseekat sünain wanee kasüpolüin, müsü aka saaʼin tü ipa kanüliakat «esmeralda».
4 Piama shikii pienchimüin einasee pasanainka anain tü einasee süpülajatkalü aluwatawaa otta eejana piama shikii pienchimüin laülaashii joyotokana saaʼu. Kasuujasü nasheʼin otta eejatü kotse saaʼu nekii aainjuushi süka ooro.
5 Teʼrakalaka kayaain maʼin juya chaa eejatüle tü einaseekat, taapakalaka sünüiki wayuu otta müsia sütürüla juya otta eejatü akaratshisü ranpara chuwatuuitka sümülatuʼu tü einaseekat. Nayaawase tia na akaratshishii meʼrujusalii nümaʼanajeejanakana Maleiwa.
6 Sümülatuʼu tia einaseekat eejatü wanee palaa jorottoko maʼin sümaa chuwatüin maʼin shia.
Pasanainsü tü einaseekat nanain pienchishii aapiee wattakana saalii noʼu natoutajee, eejana naya aapieekana süʼütpünaa tia einaseekat.
7 Chi palajachikai aapiee müshi aka naaʼin wanee león, chi wane müshi aka naaʼin wanee paaʼa toolo, chi wane meematüshi aka saaʼin suʼupünaa wayuu otta chi chiiruaajachikai müshi aka naaʼin wanee warulapai eekai nuwatüin.
8 Aipiruasü natüna waneʼewai nakua naya aapieekana, watta saalii noʼu natünoutajee. Anuukalaka tü namakat waneepia saʼwai jee soʼukai: «Wulesü maʼin pukuwaʼipa* Wamaleiwasekai Jehová,* chi Pülashikai maʼin, pia chi Maleiwa eetüjüikaʼaya sümaiwa paala, chi eekai maaʼulu otta chi anteechikai».
9 Nuʼwaajünapa natuma na pienchishiikana aapiee chi yalakai joyotuin saaʼu tü einaseekat, kojutupa nia natuma jee naapapa analuʼutka nümüin chi katakai oʼu süpüla kaʼikat süpüshuaʼa,
10 nasapainkashii na piamakana shikii pienchimüin laülaashii nümülatuʼu chi joyotokoi saaʼu tü einaseekat otta naʼwaajüin chi katakai oʼu süpüla kaʼikat süpüshuaʼa. Neʼitaakalaka nümülatuʼu chi joyotushikai saaʼu tü einaseekat tü kotse eejatkat saaʼu nekii jee namakalaka:
11 «Jehovákalee,* pia Wamaleiwasekai, piainjachi aʼwaajünaka, piainjachi kojutuka atumawaa jee piainjachi pülaka maʼin, jama pukumalain kasa süpüshuaʼa, eeitpa kasa süpüshuaʼa sümaa sukumajuushin süka shiainjaʼa püchekalain tia».
Noota
^ «Wüle, wüle, wüle» maluʼulu tia suluʼu griego.
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
