Chiiruaajatka karaloʼuta namüinjatka na chajanakana Tesalónica 1:1-12
1 Karaloʼutakat tüü, tashajala tayakai Pablo, anii tamaa chi wawalakai Silvano otta müshia Timoteo. Karaloʼutakat tüü, namüinjatü na anoujashii chakana Tesalónica, na paaʼinwakana nümaa chi Washikai Maleiwa jee nümaa chi Señotkai Jesucristo:
2 Kasataalejeseʼe kamaneein jümüin chi Washikai Maleiwa jee jimatüin jaaʼin nutuma jee nutuma chi Señotkai Jesucristo.
3 Tawalayuwaa, aapüinjanaʼaya waya analuʼutka waneepia jaaʼu nümüin Maleiwa. Choʼujaasiaʼaya waaʼinrüin tia, jama sükooʼomüinraain maʼin tü junoulakat jee aijiraain maʼin jia.
4 Müshiijeseʼe waʼwaataain jaaʼu noʼupala na anoujashiikana nünain Maleiwa, jama jüchecherüin jaaʼin jee kanoulain jia, mayaainjeʼe müliain jia atumawaa jee sülatüin kasa mojusü jümüin.
5 Sükajee süpüshuaʼa tia, ayaawatüna aaʼu lotuin sukuwaʼipa tü naainjakat Maleiwa süsalapa saainjala wayuu nutuma jee atüjaana aaʼuchii keraain jia süpüla jiʼrüinjanain kasa anasü nuluwataapeena Maleiwa, jama niain müliain anainjee jia.
6 Shia anaka aluʼu müliale nutuma Maleiwa na wayuu müliakana atuma jia.
7 Mayaainjeʼe jiʼrüin müliaa, aneerü jaaʼin wanaa wamaa soʼu tü kaʼi niiʼiyalaajeetkalü oʼu sirumatuʼujee chi Señotkai Jesús namaʼaleeya na aapiee pülashiikana maʼin.
8 Eeʼiyalaweechi nia saʼaka siki chuwatüsü, süsaleenakalaka naainjala nutuma na wayuu nnojoliikana eʼraajüin Maleiwa otta na nnojoliikana aapaain sümaa tü pütchi anakat maʼin* nüchiki chi Waseñotsekai Jesús.
9 Müinnamaʼaleeya naya wayuukana, ajaʼttinneena naya nuʼupala chi Señotkai jee nnojoleena naya nükaalinjain sükajee tü nüpülainkat.
10 Nüntapeena chi Señotkai süpüla nuʼwaajünüinjachin wanaa namaa na nuwalayuu aneekuushikana, kojuteechi nia natuma napüshuaʼa na kanoulakana nünain jee saaʼujee junoujain sünain tü kasa waküjakat jümüin, eejeena jia naʼaka naya wayuukana.
11 Müshiijeseʼe woʼuraajüin waneepia jüpüleerua süpüla anashiinjatüin nümüin chi Maleiwakai nüneeküinjanain jia jee süpüla naaʼinrüinjatüin süpüshuaʼa kasa anasü sükajee tü nüpülainkat otta eeinjatüin kasa anasü sünainjee kanoulain jia.
12 Kojuteechikalaka chi Waseñotsekai Jesús sükajee tü kasa jaainjakat jee paaʼinweenakalaka jia nümaa wanaapünaa sümaa tü nümaneekat chi Wamaleiwasekai jee tü nümaneekat chi Señotkai Jesucristo.
Noota
^ Pünaʼla tia suluʼu tü kanüliakat «Jamaluʼulu pütchikat».
