Palajatka karaloʼuta nüshajalaka Pedro 3:1-22
3 Akaʼaya jia jieyuu kaʼwayuuseshiikana, anakajaʼa jüüjüüle jia nümüin chi juʼwayuusekai. Eere wanee wayuu nnojoikai oonooin sümaa nünüiki Maleiwa, anoujeechi nia sünainjee anain sukuwaʼipa nuʼwayuuse nüpüleerua,
2 jama niʼrüin wulein sukuwaʼipa nuʼwayuuse jee kojutuin nia sümüin.
3 Nnojotsü anainjatüin maʼin jiyolojo suʼupala wayuu, maʼaka saaʼin sütürensajuushin juʼwala, kanain jia ooro jee jaʼatüin jünain kuluulu eekai kojutuin maʼin.
4 Shiapejeʼe anainjatüin atuma jiyolojo tü kasa suluʼukat jaaʼin, müshiijeseʼe nnojoliinjanain jaashichijaain, anamiainjana jia, shia kojutuka maʼin nümüin Maleiwa tia. Müsü shia maʼaka saaʼin wanee kasa eekai nnojoluin sajaʼttüin.
5 Mapuʼusü nakuwaʼipa na jieyuu namaiwajanakana, na oonoopuʼukana sümaa nünüiki Maleiwa jee na aʼatapajapuʼukana neʼrüinjatüin tü kasa anasü eeinjatkat nutuma Maleiwa, jüüjüüpuʼushii naya nümüin chi naʼwayuusekai.
6 Müinjatü jukuwaʼipa maʼaka sukuwaʼipa Sara, oonoopuʼusü shia sümaa nünüiki Abrahán, «laülaakai» mapuʼusü nümüin. Müshii jia maʼaka saaʼin süchonnii Sara ayatüleʼeya jaaʼinrüin kasa eekai anain jee nnojoliire jaapüin jaaʼin sünain mmoluu.
7 Akaʼaya jia tooloyuu kaʼwayuuseshiikana, jiyaawatüinjatü saaʼu sukuwaʼipa juʼwayuuse, jaaʼinmajüinjatü shia maʼaka jaaʼinmajüin wanee iita eekai jooin süpüla susoʼttuin. Jamüshiijaʼa na jieyuukana kateena oʼu wanaa jümaa, jama kamaneein maʼin chi Maleiwakai, jaaʼinrajatü tia suulia eejüin wanee kasa eekai ataʼülüin sukuwaʼipa jünüiki juʼuraajapa nümüin Maleiwa.
8 Anuu sooʼomüin tanüiki, anakajaʼa paaʼinwale jia jüpüshuaʼa sünain tü jülüjakat jaaʼin, kachipünaainjatü jaaʼin nakuwaʼipa na waneinnua, aijiraainjanain jia maʼaka alin nuwalayuu wanee wayuu nüpüla, amüliajiraainjana jia jee nnojoluinjatü yaletüin jaaʼin.
9 Saainjale wayuu kasa mojusü jümüin, nnojo jaainjain kasa mojusü sümüin. Süʼülüjale jümüin, nnojo jüʼülüjain sümüin. Shia anaka aluʼu jücheküle süchiki anainjatüin sukuwaʼipa tia wayuukot, jama jüneekuushin süpüla saapünajatüin wanee kasa anasü jümüin.
10 «Chi eekai talateein aaʼin sümaa niʼreein kasa anasü, anakajaʼa niyaawatüle saaʼu nünüiki suulia nujuʼitirüin pütchi eekai mojuluʼuluin jee anakajaʼa nnojoire nimeejüin wayuu süka nünüiki.
11 Anakajaʼa nuuʼulaale suulia aaʼinraa kasa mojusü, shia naaʼinrajatka kasa eekai anain. Anasü kapürale naaʼin anajiraain nia sümaa wayuu jee ayatüleʼeya nia süchiirua tia.
12 Eirakaashi Jehová* namüin na wayuu lotokana akuwaʼipa jee kacheʼejüshi nia sümüin nanüiki nachuntapa maʼin nümüin. Nayapejeʼe nüʼürülain Jehová* na wayuu aaʼinrakana kasa mojusü».
13 ¿Jaraleechi aaʼinraka kasa mojusü jümüin shiale jaaʼinreein maʼin amüin tü kasa eekai anain?
14 Talatüshii jia jaʼitashii müliain jia atumawaa saaʼujee lotuin jukuwaʼipa, nnojoliipejeʼe jia mmoluinjanain seema tü kasa mmotkalü eema wayuu jee nnojo shapaain jaaʼin.
15 Jütüjaainjatü aaʼu suluʼu jaaʼin niain Cristo chi Señotkai otta choʼujaain kojutuinjachin nia atumawaa. Yapainjana jia waneepia süpüla jusoutuinjanain saaʼu tü junoujakalü anain jüsakinnüle sutuma wayuu süchiki tü kasa jaʼatapajakat. Anamiainjanapejeʼe jia jaaʼinrapa tia jee kojutuinjatü wayuu jutuma.
16 Ayataʼaya wulein tü suluʼukat jaaʼin,* jaʼitaitkalaka mojuin sünüiki wayuu jüchiki, eʼreena neʼe japülii na mojukana anüiki jüchiki, jama anain maʼin jukuwaʼipa süka juushikajaain süchiirua nukuwaʼipa Cristo.
17 Nuuʼulaalejeʼeya Maleiwa weʼrüin wamüliala saaʼujee waaʼinrüin kasa anasü, nnojotsü mojuin tia, aluʼu shiainjaʼa mojuin weʼrüle wamüliala saaʼujee waaʼinrüin kasa mojusü.
18 Mayaainjeʼe wayuuin loto akuwaʼipachi Cristo, uwatua outuin nia saaʼu naainjala na nnojoliikana lotuin akuwaʼipa, taashikalaka wayuu nutuma suulia saainjala. Naaʼinrüin tia süpüla müinjatüin nuʼunirakai saaʼin wayuu nünainmüin Maleiwa. Oʼutuna aaʼinchi nia suluʼu wayuuin nia, katüitpapejeʼe noʼu suluʼu meʼrujuin nia.
19 Wanaa sümaa meʼrujuin nia, nüküjain namüin na aapiee püreesashiikana kasalajanainjatüin namüin naainjala.
20 Nnojoishii oonooin nümüin Maleiwa sümaiwa paala naya aapieekana. Alatüsü tia wanaa sümaa naʼatapajüin Maleiwa sukumajünüin tü anuwakat soʼu nükalia Noé, tü noʼttaakalü akajee mekiisatshii wayuu, nnojoishii jeʼrashiin naya. Oʼttaashii naya wayuukana suluʼu tü anuwakat, nnojoliikalaka wüinsirüin naya.
21 Tia kasa alatakat shiyaawase woutiisapa waya. Shiaʼaya juʼtteʼennaka anainjee tia maaʼulu sükajee nüsoʼireʼennüin aaʼin Jesucristo süchikijee outaa. Nnojoishii woutiisain waya wooʼulaale suulia yarüttüin wakuwaʼipa, woutiisashii waya wachuntule nümüin Maleiwa wuleinjatüin tü suluʼukat waaʼin.
22 Ichaa Jesucristo nikialuʼu Maleiwa, jama nuʼunuin chaa sirumatuʼumüin, jüüjüükalaka atumawaa na aapieekana nümüin, na aluwataashiikana jee na kapülainkana.
Noota
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tia suluʼu tü kanüliakat «Sooʼomüin pütchi A5».
^ Pünaʼla tü pütchikat «Conciencia» suluʼu tü kanüliakat «Jamaluʼulu pütchikat».
