Palajatka karaloʼuta nüshajalaka Juan 5:1-21
-
«Sutuma kanoulain waya wayamülüin tü kasa mojusü eekat saaʼu tü mmakat» (1-12)
-
Tü waaʼinrajatkat shiimainre alin wapüla Maleiwa» (3)
-
-
Nnojotsü mmoluwaain waaʼin sünain achuntaa nümüin Maleiwa, jama watüjaain saaʼu naapeerüin wanüiki (13-17)
-
Eejüinjatü waaʼin suulia washatüin nakuwaʼipa na manoujainsaliikana (18-21)
-
«Napüshuaʼa na manoujainsaliikana, najapuluʼushii naya chi Yolujaakai» (19)
-
5 Nüchon Maleiwa chi wayuu anoujakai sünain niain Jesús chi Cristokai. Chi wayuu aikai apüla Maleiwa aishii nüpüla na nüchonniikana Maleiwa.
2 Aire wapüla Maleiwa otta woonoole sümaa tü nuluwataakalü anain waya, wayaawateerü aaʼu alin wapüla na nüchonniikana Maleiwa.
3 Shiimainre alin wapüla Maleiwa woonoojeerü amaa tü nuluwataakalü anain waya, nnojotsü kapüleein tia makat.
4 Chi wayuu eekai nüchoin Maleiwa niyamülüin tü kasa mojusü eekat saaʼu tü mmakat. Sutuma kanoulain waya wayamülüin tü kasa mojusü eekat saaʼu tü mmakat.
5 ¿Jaraleechi ayamülaka tü kasa mojusü eekat saaʼu tü mmakat? ¿Aashin niain chi anoujakai sünain niain Jesús chi Nüchonkai Maleiwa?
6 Soʼu nüntüin Jesús eejatü wüin jee eejatü isha, nnojotsü eejatüin neʼe wüin sümüiwaʼa, eejatü ishaya. Nüpansaajüin wamüin Maleiwa sünain shiimain tia sükajee tü nüpülainkat.
7 Anuu tü apünüinsükat kasa ayaawatünakalü akajee jaralin Jesús:
8 tü nüpülainkat Maleiwa, tü wüinkat jee tü ishakat, tia apünüinsükat kasa shia ayaawatünaka akajee müinña sukuwaʼipa tia.
9 Waapaalejeʼeya sümaa tü sümakat wayuu shieematataaka nnojoluin waapaain amaa tü nümakat Maleiwa. Niaʼaya Maleiwa apansaajaka tü pütchikat nüchiki chi Nüchonkai.
10 Chi wayuu kanoulakai nünain chi Nüchonkai Maleiwa shiimainña suluʼuin naaʼin tü nikirajakalü anain nia Maleiwa. Chi wayuu nnojoikai kanoulain nünain Maleiwa müshijaʼa naʼalaajakai naaʼin, jama nnojolin nunoujain sünain tü pütchi nüküjakat Maleiwa nüchiki chi Nüchonkai.
11 Anuu tü pütchi nüküjakat Maleiwa: katüsü woʼu nutuma süpüla kaʼikat süpüshuaʼa jee nia kakajeejachika tia chi Nüchonkai.
12 Chi wayuu paaʼinwakai nümaa chi Nüchonkai Maleiwa, kateerü noʼu jee chi nnojoikai paaʼinwain nümaa, nnojoleerü katüin noʼu.
13 Jia kanoulakana nünain Nüchon* chi Maleiwakai, tashajüin jümüin tüü süpüla jütüjaainjatüin saaʼu kateerüin joʼu süpüla kaʼikat süpüshuaʼa.
14 Nnojotsü mmoluwaain waaʼin sünain achuntaa nümüin Maleiwa, jaʼitasü kasain wachuntuin nümüin wanaapünaa sümaa tü nüchekakalü achiki, naapeeriaʼaya wanüiki.
15 Watüjaalejeʼeya saaʼu naapüin wanüiki wachuntapa nümüin wanee kasa, watüjaa aaʼulujaʼa naapeerüin shia wamüin, jama wachuntuin shia nümüin.
16 Eere wanee wayuu eʼrakai nuwala sünain aaʼinraa wanee kasa nnojoikai outajachin aaʼujee nia, anashi nuchuntule nüpüleerua, kateetkalaka noʼu chia wayuukai nutuma Maleiwa. Tia shia tü aainjünajatkat napüleerua na wayuu nnojoliikana aaʼinrüin wanee kasa outajanaka aaʼujee naya. Eepejeʼe wanee kasa outaka aaʼujee wanee wayuu, tia shia tü kasa taküjakat jümüin nnojoluinjatka juchuntuin apüleerua nümüin Maleiwa.
17 Kaainjalashi wanee wayuu naaʼinrüle wanee kasa nnojotka lotuin akuwaʼipa, eepejeʼe wanee kasa nnojotka outuin anainjee wanee wayuu.
18 Chi wayuu eekai Nüchooin Maleiwa nnojoleechi aaʼinrüin wanee kasa kaainjaleechika aluʼujee nia, aaʼinmajüneechi nia nutuma chi Nüchonkai Maleiwa jee nnojoleechi nia jamajüin nutuma chi Yolujaakai.*
19 Watüjaa aaʼu nümaʼanajeejanain waya Maleiwa, eekajasaʼa napüshuaʼa na manoujainsaliikana, najapuluʼushii naya chi Yolujaakai.*
20 Watüjaa aaʼu nüntüitchipain chi Nüchonkai Maleiwa, wayaawatakalaka saaʼu nutuma jaralin chi shiimainshikai suluʼu Maleiwain. Paaʼinwashii waya nümaa Maleiwa nükajee Jesucristo, chi Nüchonkai. Chi Maleiwakai niaʼaya chi shiimainshikai suluʼu Maleiwain jee nia aapaka waneepia kataa oʼuu sümüin wayuu.
21 Tachonniichein, jalia jia suulia juʼwaajüin shiyaakua maleiwayaasü.
Noota
^ «Saaʼu nünülia» maluʼulu tia suluʼu griego.
^ «Kamaʼürai» maluʼulu tia suluʼu griego.
^ «Kamaʼürai» maluʼulu tia suluʼu griego.
