Palajatka karaloʼuta namüinjatka na chajanakana Corinto 15:1-58
-
Asoʼireʼennüsü naaʼin Cristo süchikijee outaa (1-11)
-
Kanoulashi wanee wayuu sünainjee nüsoʼireʼennüin aaʼin Cristo (12-19)
-
Eejeerü kasa anasü sünainjee nüsoʼireʼennüin aaʼin Cristo (20-34)
-
«Keʼirukulejeʼeya wanee wayuu eeshijaʼamata süpüla meʼrujuin nia» (35-49)
-
Tü nnojotkalü outuin jee tü nnojotkat ittüin (50-57)
-
«Ayataʼaya jiʼyataain waneepia nümüin chi Señotkai» (58)
15 Tawalayuwaa, tasoʼiree aaʼinchii jia jooluʼu sünain tü pütchi anakat maʼin* taküjaka jümüin, tü jüchecherakalü akajee jaaʼin.
2 Jüchecheraale süchiirua tü pütchi anakat maʼin taküjaka jümüin, oʼtteʼenneena jia. Nnojorüle jaaʼinrüin tia, amüleena neʼe jia anoujain.
3 Saʼaka tü pütchi taküjakat jümüin palajana, anuu wanee aküjünüsü tamüin: saashin tü Karaloʼuta Nüchikimaajatkat Maleiwa outushi Cristo saaʼu waainjala.
4 Ojoitünüshi nia jee asoʼireʼennüsü naaʼin apünüin kaʼi süchikijee maʼaka süküjain shia tü Karaloʼuta Nüchikimaajatkat Maleiwa.
5 Eeʼiyalaashi nia nümüin Cefas* jee süchikijee niiʼiyalaakalaka namüin na Polookana Piamamüin aluwataaushi.
6 Niiʼiyalaakalaka mapa uwatuwoʼushireeya namüin kojuyashii wawalayuu, alatüshii suulia 500 naya makana. Eeyüliʼiya noʼutku naya wawalayuukana, eepejeʼe waneinnua outuinnapakana.
7 Niiʼiyalaakalaka mapa nümüin Santiago jee süchikijee tia niiʼiyalaakalaka namüin napüshuaʼa na aluwataaushikana.
8 Shiasaʼa mapa maʼin niiʼiyalaakalaka tamüin, müshijeseʼe müin taya maʼaka naaʼin wanee joʼuu eweetakai süpülapünaa keraain nükalia.
9 Taya maawainka maʼin naʼakajee na aluwataaushikana. Nnojoishi keraain taya süpüla «aluwataaushi» tamünajachin, jama müliapuʼuin tatuma na anoujashiikana nünain Maleiwa.
10 Tountuin aluwataaushin taya saaʼujee miyoʼuin maʼin nümanee chi Maleiwakai tamüin, nnojotpejeʼe amülain neʼe tia nümaneekat tamüin, jama taʼyataʼaleeinña maʼin noulia na wane aluwataaushikana. Nnojotpejeʼe tountuin tia süka taaʼin tamüiwaʼa, tountuin süka miyoʼuin maʼin nümanee chi Maleiwakai tamüin.
11 Jaʼitashi tayain ekirajüin jia jee nayalejeʼeya ekirajüin jia na waneinnua, wanaawasü tü wekirajakalü anain. Shiaʼaya junoujaka anain tia.
12 Aküjashii waya pütchi süchiki nüsoʼiraain aaʼin Cristo süchikijee outaa, ¿jamakaʼa eeka wayuu jaʼaka aküjakana nnojoluin süsoʼiraain aaʼin wayuu süchikijee outaa?
13 Nnojorülejeʼeya süsoʼiraain aaʼin wayuu süchikijee outaa, nnojotsüjaʼamata asoʼiraain naaʼin Cristo süchikijee outaa.
14 Nnojoirejeʼeya nüsoʼiraain aaʼin Cristo süchikijee outaa, amülajaʼa neʼe waküjain pütchi jee amülajaʼa neʼe kanoulain jia.
15 Alawaajaʼamata waküjaliin pütchi nüchiki Maleiwa, jama waküjain neʼe nüsoʼireʼennüin aaʼin Cristo nutuma Maleiwa süchikijee outaa. Nnojoirejeʼeya nüsoʼireʼerüin aaʼin, nnojotsüjaʼamata shiimain nasoʼiraainjanain aaʼin na outushiikana.
16 Shiimainrejeʼeya nnojoliinjanain nasoʼiraain aaʼin na outushiikana, alawaajaʼamata nüsoʼiraain aaʼin Cristo süchikijee outaa.
17 Nnojoirejeʼeya nüsoʼiraain aaʼin Cristo süchikijee outaa, amülajaʼa neʼe kanoulain jia. Ayatayüliijaʼamata jia kaainjalain.
18 Mülejeʼeya tia, nnojoleenajaʼamata asoʼiraain aaʼin nachikuaʼa na wayuu nikirajüinkana Cristo.
19 Shiale neʼe wanoujain sünain sunoutaweerüin wakuwaʼipa nutuma Cristo soʼunnaa katüin woʼu maaʼutpünaa yaa, mojuleesia maʼin tü wakuwaʼipakat suulia wayuu maʼleekalia.
20 Watüjaa aaʼuchi nüsoʼiraain aaʼin Cristo süchikijee outaa, nia palajachikai asoʼiraain aaʼin naʼakajee na outushiikana.
21 Outusü wayuu nünainjee neʼe waneeshia wayuu, asoʼiraajeetpejeʼe saaʼin wayuu süchikijee outaa nünainjee waneeshia wayuu.
22 Outayaa müsü wayuu maʼleekalia nünainjee Adán, eekajasaʼa nünainjee Cristo kateerü soʼu wayuu süpüshuaʼa.
23 Pansaainjatü sukuwaʼipa tü asoʼirawaakalü aaʼin süchikijee outaa: nia asoʼiraaka aaʼin Cristo palajana, shiasaʼa yaapa Cristo* nayeena asoʼiraaka aaʼin na nikirajüinkana.
24 Süchikijee tia, ooʼulaweechi suulia aluwatawaa. Nülatireetkalaka laülawaa nümüin chi Nümaleiwasekai sümaa Nüshitchin nia. Naainjeerü tia najaʼttirapa napüshuaʼa na aluwataashiikana jee na laülaakana saaʼu wanee kasa.
25 Aluwataainjachi nia nuuʼuitparaleepaʼaya nutuma Maleiwa na nüʼünüükana.
26 Ajaʼttinneerü tü outaakat tü makalü aka saaʼin tü chiiruaajatkat waʼünüü.
27 Anuu tü sümakat tü Karaloʼuta Nüchikimaajatkat Maleiwa: «Müsü nuuʼuipalakai saaʼin kasa süpüshuaʼa nutuma». Wanaa sümaa nüküjain Maleiwa müin nuuʼuipalakai saaʼin kasa süpüshuaʼa nutuma, nnojoishi niain aashajaanüin achiki Maleiwa, jama niain Maleiwa eʼitaain kasa süpüshuaʼa süpüla nuuʼuipalain shia Cristo.
28 Niʼitaapa Maleiwa kasa süpüshuaʼa süpüla nuuʼuipalain shia chi Nüchonkai, jüüjüüweechi chi Nüchonkai nümüin, jama niain Maleiwa eʼitaain kasa süpüshuaʼa süpüla nuuʼuipalain shia. Jee suluʼujee tia nieechi Maleiwa laülaaka saaʼu kasa süpüshuaʼa.
29 Nnojorülejeʼeya müin tia, ¿kaseetkalaka alatüin namüin na wayuu woutiisakana süpüla outajanain naya? Nnojoliire nasoʼiraainjanain aaʼin na wayuu outakana, ¿jamakaʼa woutiisaka naya?
30 ¿Jamüshiiche wajachajuukaʼa waneepia?
31 Teʼrawalin weinshi tü outaakat tooʼomüin. Tawalayuwaa, shiimain maʼin tia maʼaka shiimain talatüin taya saaʼujee aleewajiraain jia nümaa Cristo Jesús, chi Waseñotsekai.
32 Eejiraalejeʼeya taya sümaa wüchii jashichi chaa Éfeso maʼaka naainjain shia waneinnua wayuu, ¿kasa anaka aluʼu tia nnojoliinjanale nasoʼiraain aaʼin na outushiikana? «Shiajaʼamata anaka aluʼu wekaale jee wasaale, jama outajanain waya wattaʼa».
33 Jalia jimeejünaʼalayaai. Amojujaasü nukuwaʼipa wanee wayuu sutuma mojuin nakuwaʼipa na naʼaleewainyuukana.
34 Jülaüleʼera jaaʼin jee jaainja wanee kasa eekai lotuin sukuwaʼipa. Nnojo kaainjalain jia, eeshii waneinnua wayuu jaʼakajee nnojoliikana eʼraajüin maʼin Maleiwa. Taküjain tia jümüin süpüla japüliwaainjanain jia.
35 Eepejeʼe wayuu eekai müin sünüiki mayaa: «¿Jameerü nakuwaʼipa na outushiikana nasoʼiraapa aaʼin? ¿Jameerü sukuwaʼipa natapaʼa?».
36 Nnojotsü pansaain tia asakinnakalü anain. Püpünajüle wanee waüyee, nnojotsü osotuin neʼe. Aluʼusaʼa jurule paala shia.
37 Tü püpünajakat nnojotsü shiain wanee wunuʼu eekai miyoʼuin, shia püpünajaka wanee waüyee eekai matain, eesü trigole shia jee shiale wanee waüyee eekai eein neʼe.
38 Naatayaa müsü sukuwaʼipa wunuʼulia nutuma Maleiwa, akaʼaya tü waüyeekat naatayaa müsü sukuwaʼipa nutuma.
39 Naatayaa müsü sukuwaʼipa tü kasa keʼirukukat: eesü wayuu, eesü mürüt, eesü wüchii otta eesü jime. Keʼirukusü tia makat, naatayaa mapajeʼe sukuwaʼipa.
40 Eeshii na kepiakana chaa iipünaa jee eeshii na kepiakana yaa mmapaʼa. Naata nakuwaʼipa na kepiakana chaa iipünaa noulia na kepiakana yaa mmapaʼa.
41 Tü nuwaralakat chi kaʼikai naata sümüin, akaʼaya joo suwarala tü kashikat naata sümüin jee müsia joo tü shüliwalakat naata suwarala tiaʼaya. Naatayaa müsü suwarala waneʼewai sukua tü shüliwalakat.
42 Müsia neʼe sukuwaʼipa tü asoʼirawaakalü aaʼin. Chi eekai outuin ittüsü niʼiruku, eekajasaʼa chi asoʼireʼennakai aaʼin nnojotsü ittüin niʼiruku.
43 Mojutusai nia atumawaa nojoitünaiwaʼaya, kojutupajaʼa nia atumawaa nüsoʼireʼennapa aaʼin. Müshi matchinkai naaʼin nojoitünaiwaʼaya, pülasheechipejeʼe nia nüsoʼireʼennapa aaʼin.
44 Ojoitünüshi wanee wayuu eekai outuin, shiasaʼa nüsoʼireʼennapa aaʼin meʼrujusai nia. Keʼirukulejeʼeya wanee wayuu eeshijaʼamata süpüla meʼrujuin nia.
45 Anuu tü ashajünakat suluʼu tü Karaloʼuta Nüchikimaajatkat Maleiwa: «Aapünüsü kataa oʼuu* nümüin Adán chi palajachikai wayuu». Eekajasaʼa chi chiiruaajachikai Adán nia aapaka kataa oʼuu sümüin wayuu.
46 Nnojoishi meʼrujuin wanee wayuu palajana, keʼirukushi palajana, shiasaʼa süchikijee meʼrujusai nia.
47 Yaajeʼewai mmapaʼa chi palajachikai wayuu, akumajuushi sünainjee sümamüla mma, eekajasaʼa chi antakai nüchikumüin sirumatuʼujeʼewai.
48 Na akumajünakana sünainjee sümamüla mma müshii aka naaʼin chi palajachikai wayuu akumajünakai sünainjee sümamüla mma. Eekajasaʼa na chejeʼewaliikana sirumatuʼujee müshii aka naaʼin chi sirumatuʼujeʼewaikai.
49 Sutuma müin wakuwaʼipa maʼaka naaʼin chi akumajünakai sünainjee sümamüla mma, meeriaʼaya neʼe wakuwaʼipa maʼaka naaʼin chi sirumatuʼujeʼewaikai.
50 Tawalayuwaa, anuu tanüiki jümüin: chi wayuu keʼirukukai sümaa keipüsein nia nnojotsü süpüla saapünüin nümüin tü kasa anasü eejeetkat nuluwataapeena Maleiwa. Akaʼaya tü kasa atüjakalü ittaa nnojotsü süpüla matüjainjatüin ittaa shia.
51 Anuupejeʼe wanee kasa taküjeeka jümüin nütüjaaka aaʼu neʼe Maleiwa: nnojoleena outuin waya wapüshuaʼa, shia aʼwanajaainjatka neʼe wakuwaʼipa.
52 Motsoʼopünaajeerü sümaa tia, meerü aka saaʼin nüchimitpünaakai noʼu wanee wayuu. Alateerü tia soʼu tü chiiruaajatkat shiʼira tü konneetakat. Wanaa sümaa shiʼyalajüin tü konneetakalü, asoʼiraajeerü naaʼin na wayuu eekai outuin sümaa nnojoleerüin ittüin tü neʼirukukat jee müshiʼiya wayakana aʼwanajaajeerü wakuwaʼipa.
53 Tü atüjakalü ittaa aʼwanajaajeerü süpüla nnojoluinjatüin ittüin shia otta tü atüjakalü outaa aʼwanajaajeerü süpüla nnojoluinjatüin outuin shia.
54 Nnojotpa ittüin tü kasa atüjakalü ittaa otta nnojotpa outuin tü kasa atüjakalü outaa, ekeraajeerü tü sümakat tü Karaloʼuta Nüchikimaajatkat Maleiwa, tü makat mayaa: «Müirümaʼaleeya nnojoluin tü outaakat».
55 «Pia outaakat, nnojoluitpa akanajüin pia süka isaitpain püchiki müliain wayuu putuma».
56 Eesü tü outaakat saaʼujee eein tü kaainjalaakat otta kaawainsü tü kaainjalaakat sutuma tü Pütchi Aapünakat nümüin Moisés.
57 Waapapejeʼe analuʼutka nümüin Maleiwa saaʼujee wakanajüin nutuma nükajee chi Waseñotsekai Jesucristo.
58 Jia tawalayuu aishiikana tapüla ayataʼaya katchin jaaʼin, nnojotsü kasain amalajeʼerüinjanain jia, ayataʼaya jiʼyataain waneepia nümüin chi Señotkai. Soto jaaʼin nnojoluin amülain neʼe tü jiʼyataainkat nümüin chi Señotkai.
Noota
^ Pünaʼla tia suluʼu tü kanüliakat «Jamaluʼulu pütchikat».
^ Pedro münüshi niaya.
^ «Parousía» maluʼulu tia suluʼu griego. Pünaʼla tü pütchikat «Eewaa» suluʼu tü kanüliakat «Jamaluʼulu pütchikat».
^ Pünaʼla tü pütchikat «Alma» suluʼu tü kanüliakat «Jamaluʼulu pütchikat».
