De Noah, sini Familie und d Tier göhnd alli i d Arche ine. Jehova macht d Türe zue und nachher fangts a regne. Es regnet eso vil, dass d Arche afangt schwimme. Mit de Ziit isch di ganzi Erde mit Wasser überschwemmt. Alli böse Mensche sterbed. Aber de Noah und sini Familie sind i de Arche in Sicherheit. Chasch du dir vorstelle, wie froh si sind, dass si uf Jehova glost hend?

Es regnet 40 Täg und 40 Nächt wie verruckt. Nachher hörts uf und s Wasser fangt a sinke. Irgendeinisch isch d Arche ufeme Berg. Aber rundume isch überall no Wasser. Drum müend de Noah und sini Familie no warte und chönnd nid us de Arche use.

Langsam, langsam verschwindet s Wasser. De Noah und sini Familie sind scho über es Jahr i de Arche. Glii drufabe seit Jehova, dass si chönnd use cho. Dusse gsehts us wie inere neue Welt. De Noah und sini Familie sind Jehova sehr dankbar, dass er si grettet het. Drum bringed si ihm es Opfer dar.

Jehova freut sich über das Opfer. Er verspricht, dass er nie meh mitere Fluet alles wird kaputt mache. Als Bewiis für sis Verspreche macht er am Himmel de erscht Regeboge. Hesch du scho mal en Regeboge gseh?

Jehova seit em Noah und sinere Familie, si sölled Chind ha, eso dass denn überall uf de Erde Mensche wohned.