Jehova* Devan poilem kazar ghoddoun haddlem. Bible amkam sangta, tannem poilea bailek rochli ani tika “dadlea-xim haddli.” Adanvan khuxal zaun mhunnttlem: “Xekim hi mhojea haddanchem hadd ani mhojea masachem mas!” (Utpoti 2:22, 23) Aiz pasun kazari zhoddpim toxinch khuxal aslolim Jehovak zai.

Kazari jivitant soglench sukh astolem mhunn tumi ghoddiek chintunk puro. Khorem mhunnttlear, jim ghov-bailam eka-mekacho niz mog kortat tanchea jivitant pasun koxtt-upodre astole. (1 Korintkarank 7:28) Hea pustikent, tumkam Bible-antlim totvam mellttolim. Him totvam apnnailear, tumchem kazari jivit ani tumcho kuttumb khuxal zaunk xokta.—Stotr 19:8-11.

BIBLE KITEM SANGTA: Ghov kuttumbacho vhoddil zaun asa.—Efezkarank 5:23.

Tum ek ghov zalear tunvem tujea bailechi nazuk ritin kallji ghetloli Jehovak zai. (1 Pedru 3:7) Devan bailek tuji sangatin mhunn dilea. Tunvem tika manan ani mogan lekhloli Jehovak zai. (Utpoti 2:18) Tunvem bailecho itlo mog korunk zai ki, tichea pasot tum svotachi khuxi fattim dovrunk toiar asonk zai.—Efezkarank 5:25-29.

Tum ek bail zalear tunvem tujea ghovak kallzantlean man dilʼlo ani tachi zobabdari purnn korunk taka modot kelʼli Jehovak zai. (1 Korintkarank 11:3; Efezkarank 5:33) To gheta tea nirnnoi-ank tuzo purnn tenko di ani khuxen tachem aikon ghe. (Koloskarank 3:18) Oxem korta tednam tum tujea ghovachea ani Jehovachea nodren sobit zatoli.—1 Pedru 3: 1 -6.

TUMI KITEM KORUNK ZATA:

• Tum ek boro ghov vo ek bori bail koxi zaunk xokta tem tujea kazari sangateak vichar. Magir dhean diun aik ani sudharnni korunk tujean zata tem kor

• Pasiens dakhoi. Eka-mekak koxem khuxal korunk zata tem zannam zaunk tumkam dogaim-kui vell lagtolo

BIBLE KITEM SANGTA: Tujea kazari sangateak kitem faideak poddttolem tacher tunvem dhean diunk zai. (Filipkarank 2:3, 4) Aplim sevokam ‘sogleam thaim mogall’ aslolim Jehovak zai, tor tujea sangateak moladik mhunn lekh. (2 Timotak 2:24) “Ovichari utram torvari bhaxen toptat, punn, xanneanchi jib pekovnni haddta.” Dekhun, tujim utram chintun vichun kadd. (Mhonnʼnneo 12:18) Mogan ani movall ritin ulounk Jehovachi povitr xokti tuka modot kortoli.—Galasiekarank 5:22, 23; Koloskarank 4:6.

TUMI KITEM KORUNK ZATA:

• Tumchea kazari sangatea lagim mhotvachea vixoi- ancher bhasabhas kortana, xant ravonk ani eka-mekachem aikon gheunk Jehova lagim magnnem korat

• Tumi kitem mhunnttolim ani tem koxem mhunnttolim tea vixim bariksannen chintat

BIBLE KITEM SANGTA: Kazar zatat tednam tumi dogaim “ek” zatat. (Matev 19:5) Punn tumi vegllim munxam dekhun tumchem chintop vegllem astolem. Tor tumchim chintnam ani bhavnam ek zaunk tumi vavrunk zai. (Filipkarank 2:2) Nirnnoi ghetana ekvott khub gorjecho. Bible mhunntta: “Eka-mekachi budh gheun keloleo vostu xarti pavtat.” (Mhonnʼnneo 20:18) Sangata mellon mhotvache nirnnoi ghetat tednam Bible-achim totvam apnnaiat.—Mhonnʼnneo 8:32, 33.

TUMI KITEM KORUNK ZATA:

• Fokot mahiti dium nakat punn tumkam koxem bhogta tem eka-mekak sangat

• Konnakui utor diunchea adim tumchea kazari sangatea lagim uloiat