OBHEASACHO LEKH 40
GIT 30 My Father, My God and Friend
Jehova Dukhovlolea Kallzanche Ghave Pekoita
‘Fapsolʼlim vo dukhovlolim kallzam To novean borim korta, tanche ghai bandun To pekoita.’—ST. 147:3.
MUKHEL MUDʼDO
Zanchem kalliz dukhovlam-khontovlam, tanchi Jehova khub kallji gheta. Amkam oxem ghoddtta tednam Jehova amkam koxi bhuzvonn dita, ani dusreank bhuzvonn diunk to amkam koso modot korta tem ami hea lekhant polloitolim.
1. Aplea sevokam vixim Jehovak koxem bhogta?
APLIM sevokam koslea trasancho fuddo kortat tem Jehova bore bhaxen zannam. Ami kednam khuxal astat ani dukhant astat tem taka khobor asa. (St. 37:18) Amchem mon dukhovlolem astana pasun ami tachi seva korunk amchean zata tem kortat tednam to khuxal zata. Itlench nhoi, to amkam modot korunk ani bhuzvonn diunk sodanch toiar asta.
2. Zanchem kalliz dukhovlam tanchea pasot Jehova kitem korta, ani ami Jehovachi modot koxi gheunk zata?
2 Zanchem kalliz dukhovlam tanche ‘ghave Jehova bandta’ mhunn Stotr 147:3-ant sanglam. Tor hea versantlean, niraxiponn bhogta tanchi Jehova mogan kallji gheta mhunn kolltta. Jehovachi hi modot gheunk ami kitem korunk zai? Hea vixim ami ek udharonn polloum-ia. Mar laglolea eka munxak, ek dotor boro zaunk modot korunk xokta. Punn tea munxan dotoran jem sanglam toxench kelem zalear, to boro zaunk pavtolo. Tor hea lekhant, jim konn dukhovlolim asat tankam Jehova aplea Utra thaun kitem sangta tem ami polloitolim. Toxench, Jehovan mogan dilʼlo solʼlo ami koso apnnaunk zata tem-ui ami zannam zatolim.
AMI MOLADIK ASAT MHUNN JEHOVA AMCHEA UGDDASAK HADDTTA
3. Thoddeank tim kainch valorachim nant oxem kiteak disonk xokta?
3 Dukhachem mhunnttlear, sonvsarant aiz zaitea lokank eka-meka pasot mog na. Hea pasot tim dusream sangata vaitt toren vagtat ani dusrim kainch valorachim nant mhunn tankam lekhtat. Hea vixim Helen a nanvachi bhoinn sangta: “Mhaka mhojea mummy-daddy thaun kednanch mog mellonk na. Daddy amkam martalo ani sodanch, ami kainch valorachim nant mhunn amkam sangtalo.” Helen-a bhaxen konnui tumchea sangata vaitt toren vagla zait, porot-porot tumkam tomnne marleat astole vo tumi kainch valorachim nant mhunn tumkam sanglam zait. Toxem zalear, tumcho khoreponnim mog korta toslo konnuch na mhunn tumkam disonk xokta.
4. Stotr 34:18 pormonnem Jehova amkam kosli khatri dita?
4 Dusrim tumchea sangata krur toren vaglear pasun, Jehova tumcho mog korta ani tumcho valor korta mhunn tumi khatri dovrunk zata. “Zanchem kalliz dukhovlam khontovlam, tanche sorxem Sorvespor asach!” (Stotr 34:18 vachat.) Tor tumchem “mon kollvollta vollvollta” zalear Jehovan tumchea kallzant kitem tori borem polloilem ani tea pasot tannem tumkam aplea lagim voddun haddleant mhunn ugddas dovrat. (Ju. 6:44) Tumi taka khub moladik asat dekhun to tumkam modot korunk sodanch toiar asa.
5. Lok jea munxank resped dinaslo tanchea sangata Jezu jea toren vaglo tantuntlean amkam kitem kolltta?
5 Jezu dusream sangata koso vaglo tantuntlean Jehovak amchea vixim koxem bhogta tem ami zannam zatat. Hea prithumer astana, lok jea munxank resped dinaslo tancher Jezun dhean dilem ani tankam doia-maia dakhoili. (Mt. 9:9-12) Toxench, apunn bori zatoli mhunn chintun, gombhir duens aslole eke bailen Jezuchea kopddeank hat lailo tednam, tannem tika bhuzvonnechim utram sanglim ani tichea bhavartha pasot tika xabaski dili. (Mk. 5:25-34) Jezun poripurnn toren aplea Bapachi dekh ghetli. (Ju. 14:9) Hantuntlean, Jehova pasun amcho valor korta ani amchea bhitor aslole bore gunn, zoxem amcho bhavarth ani tache pasot amcho mog, hacher to dhean dita mhunn kolltta.
6. Tumi kainch valorachim nant oxem tumkam dista zalear tumi kitem korunk zata?
6 Tumi kainch valorachim nant oxem tumkam dista zalear tumi kitem korunk zata? Jehova tumcho mog korta ani tachea pasot tumi khub valorachim asat mhunn khatri ditat toslim Bible-antlim versam vachat ani tancher niall korat. b (St. 94:19) Toxench, dusream sangata tumkam sor korinakat, ani Jehovache sevent tumi kitem korunk xokonant tacher dhean dium nakat. Karonn tumi kitem korunk xoktat tachea poros chodd Jehova tumchea lagim opekxa korina. (St. 103:13, 14) Konnui tumchea sangata vaitt toren vagla zalear, ti tumchi chuk nhoi mhunn ugddas dovrat. Jim dusream sangata vaitt toren vagtat tancho Jehova neai kortolo. Punn zankam dusreamnim vaitt kelam, tankam to modot kortolo. (1 Ped. 3:12) Sandra lhan astana tachim avoi-bapui taka bhorpur martalim. Tem sangta: “Jehova mhojea bhitor je bore gunn polloita, te gunn mhaka-i pollounk modot kor mhunn hanv dor disa tachea lagim magnnem kortam.”
7. Amchea jivitant ghoddlolea vaitt ghoddnneank lagon ami dusreank anik bore toren koxim modot korunk pavtat?
7 Porgottnnechea kamant Jehovan amkam aplea sangata kam korpi mhunn vinchun kaddleant. Ho ek vhoddlo sueog zaun asa. Tor dusreank modot korunk Jehova amkam uzar korunk xokta mhunn ami kednanch dubhavchem nhoi. (1 Kor. 3:9) Amchea jivitant ghoddlolea vaitt ghoddnneank lagon, tosleach poristhitint aslolea dusreank koxem bhogta tem somzonk ghoddie amkam anikui sompem zait. Tor ami tankam bore toren modot korunk xoktat. Oxich modot bhoinn Helen, jichea vixim ami poilim uloilʼlim tika mellʼlli. Ani hea pasot ti atam dusreank anik bore toren modot korunk xokta. Ti sangta: “Hanv kainch valorachem nhoi oxem hanv chintʼtalem. Punn Jehova mhozo mog korta mhunn tannem mhaka khatri dili ani dusreank modot korunk to mhaka uzar korta.” Atam bhoinn khuxalkaien niemit pioneer mhunn seva korta.
AMI TACHEM BHOGSONNEM APNNAILʼLEM JEHOVAK ZAI
8. Izaias 1:18-nt amkam kosli khatri melltta?
8 Thoddim Jehovachim sevokam bautizma poilim vo uprant kelʼlea patkank lagon khub niraxi zaunk xoktat. Punn ugddas dovrat, Jehova amcho khub mog korta dekhun amchea patkanchem bhogsonnem mellonk tannem amkam soddvonn dilea. Ani ami hem dennem apnnailʼlem taka zai. Jehova amkam khatri dita ki ami tache lagim ‘uloun polloilea uprant vo suttavem kelea uprant’ c to amchim patkam anik ugddasak haddchona. (Izaias 1:18 vachat.) Tor Jehova amchim patkam bhogxita, punn ami kelʼlem borem to kednanch visrona. Hea pasot ami kitlim upkari asat nhoi!—St. 103:9, 12; Heb. 6:10.
9. Ami adim kelʼlea patkam vixim kiteak chintit ravchem nhoi?
9 Tumi adim kelʼlea chukink lagon tumkam niraxiponn bhogta zalear, tumi atam kitem kortat ani fuddarak kitem korunk xoktat tacher dhean diunk tumchean zata tem soglem korat. Hea vixim amkam apostl Pauluchem udharonn asa. Eka vellar tannem Kristanvank khub krur toren dhumallo dil’lo. Ani hea vixim taka khub khont bhogtali. Punn Jehovan apleak bhogxila mhunn to zannam aslo. (1 Tim. 1:12-15) Ek manadik Farizev zaunk tannem zo vavr kelo tea vixim to chintit ravonk na tea bhaxen, apnnem adim kelʼlea patkam vixim pasun to chintit ravonk na. (Filp. 3:4-8, 13-15) Punn tannem urben porgottnni keli ani aplem dhean fuddaracher dovorlem. Tor Paulu bhaxen, tumi pasun adim jem kelam tem bodlunk xokonant tem khorem. Punn tumi atam jem kortat tea vorvim tumi Jehovak mhoima diunk xoktat ani Jehovan fuddarak jem bhasailam tacher dhean diunk xoktat.
10. Tumi adim dusreank dukhoilam zalear tumi atam kitem korunk zata?
10 Tumi adim dusreank dukhoilam dekhun atam tumkam khub khont bhogta astoli. Tor tumi kitem korunk zata? Tumi zankam dukhoilam tanchem dukh unnem korunk tumchean zata tem soglem korat. Toxench, tumi adim kelʼlea chukim vixim tumkam khorench khont bhoglea mhunn tumchea utramnim ani korneamnim dakhoiat. (2 Kor. 7:11) Tea bhair, tankam modot kor mhunn Jehova lagim magnnem korat. Oxem kelʼlean, to tumkam toxench tankam apli seva korit ravonk ani xanti mellonk modot kortolo.
11. Ami provadi Jonasa koddlean kitem xikonk zata? ( Chitr pasun polloiat.)
11 Ami provadi Jonasacho ugddas korum-ia. Jehovan sanglolea Nineve xarant voichea bodlek to Tarshishak pollon gelo. Tea pasot Jehovan taka xist dili ani Jonas aplea chuki thaun xiklo. (Jon. 1:1-4, 15-16; 2:1, 8-11) Torui, Jehovan taka aplo provadi mhunn uzar korop bond korunk na. Tannem taka Ninevent vochonk anik ek sondhi dili. Ani Jonasan rokddench Jehovachem aikolem. Apnnem adim ji chuk kelʼli tea vixim Jonas chintit ravonk na, punn Jehovan jem sanglolem tem tannem kelem. (Jon. 3:1-3) Tor ami pasun amchea adlea chukim thaun xikonk zai ani Jehovan amkam koxe-i toren uzar korunk toiar asonk zai.
Vhoddlea nusteachea pottantlean salvar zalea uprant, Jehovan provadi Jonasak Nineve vochon aplo sondex porgottunk anik ek sondhi dili (Peregraf 11 polloiat)
APLEA POVITR XOKTE UDEXIM JEHOVA AMKAM BHUZVONN DITA
12. Amchea sovem kitem-i vaitt ghoddtta tednam Jehova amkam koso modot korta? (Filipkarank 4:6, 7)
12 Amchea sovem kitem-i vaitt ghoddtta tednam, Jehova amkam aple povitr xokte udexim bhuzvonn dita. Hea vixim amkam Ron ani Carol-acho onnbhov asa. Dukhachem mhunnttlear, tanchea putan aplo jiv ghetlo. Tim sangtat: “Hachea poilim ami zaitea kotthin poristhitincho fuddo kelʼlo, punn hi poristhiti sogleam-von chodd kotthin asli. Amkam zaito temp poriant ratchi nhid poddonasli. Tea vellar, ami Jehova lagim magnnem korit ravtalim. Tednam ami, Filipkarank 4:6, 7-nt sangloli xanti khorench onnbhovunk pavlim.” (Vachat.) Tumchea sovem kitem-i vaitt ghoddlam dekhun tumchem kalliz tuntton gelam zalear, kallzant thaun Jehova lagim magnnem korat. Tumkam zai title pavtti ani zai titlo vell Jehova lagim magnnem korat. (St. 86:3; 88:1) Tumkam povitr xokti di mhunn Jehova lagim magot ravat ani to tumkam sodanch modot kortolo.—Luk. 11:9-13.
13. Visvaxiponnan Jehovachi seva korit ravonk povitr xokti amkam koxi modot korta? (Efezkarank 3:16)
13 Tumchea jivitant ghoddlole eke vaitt ghoddnnek lagon tumkam kainch korunk takot na, oxem tumkam dista kai? Hoi zalear, visvaxiponnan Jehovachi seva korit ravonk Jehovachi povitr xokti tumkam ghottai diunk xokta. (Efezkarank 3:16 vachat.) Hea vixim amkam bhoinn Flora-cho onnbhov asa. Ti ani ticho ghov mixinori mhunn seva kortalim tednam, to tika ovisvaxi zalo ani tancho divors zalo. Bhoinn sangta: “To mhaka ovisvaxi zalo mhunn hanv samkench tunttlem ani hanv kiteach vixim chintunk xokonaslem. Tea vellar, tem soglem sosunk mhaka povitr xokti di mhunn hanvem Jehova lagim magnnem kelem ani Jehovan mhaka goroz ti bhuzvonn dili. Hea sogleacho fuddo korunk mhojea lagim zaunchem na oxem mhaka poilim distalem. Punn thir ravonk ani tem sosunk Jehovanuch mhaka modot keli.” Jehovacher anikui visvas dovrunk tannem apleak modot keli mhunn bhoinn Flora-k bhogta. Ani fuddem kitem-i zaum, hea sogleacho fuddo korunk Jehova tika modot kortolo mhunn bhoinnik khatri asa. Ti fuddem mhunntta: “Stotr 119:32-antlim utram mhaka lagu zatat. Thoim mhunnttlam: ‘Tujea kaideanchea margan hanv suddsuddit vetolom, kiteak Tunvem mhojea kallzak suttka dileai.’”
14. Povitr xokte pasot magnnem kelea uprant ami kitem korunk zata?
14 Povitr xokti mellonk Jehova lagim magnnem kelea uprant ami kitem korunk zata? Ti melltta toslea kamamnim ami bhag gheunk zata. Zoxem, mittingek hajir zavop, porgottnni korop ani dor disa Bible vachop. Oxem kelʼlean, Jehovachem chintop kitem asa tacher ami niall korunk pavtolim. (Filp. 4:8, 9) Bible vachtana amcheach sarkea oddchonneancho fuddo kelʼlo tea Bible-antlea udharonnam vixim ami vachunk zata ani Jehovan tankam koxi modot keli tea vixim niallunk zata. Ami poilim uloilʼlea bhoinn Sandra-k zaitea oddchonneancho fuddo korunk poddlo dekhun tika khub tras zale. Ti sangta: “Juzechem udharonn mhojea kallzak laglem. Taka khub onʼneai ani tras sosunk poddle. Punn tannem Jehova sangata apli ixttagot oskot zaunk diunk na.”—Ut. 39:21-23.
BHAV-BHOINNAM UDEXIM JEHOVA AMKAM BHUZVONN DITA
15. Amkam konnam vorvim bhuzvonn mellonk xokta, ani tim amkam koxim modot korit? (Chitr pasun polloiat.)
15 Amkam trasancho fuddo korunk poddtta tednam, amchea bhav-bhoinnam vorvim amkam ‘khub bhuzvonn melltta.ʼ (Kol. 4:11) Jehova amkam mog dakhounk uzar korta ti ek vatt mhunnttlear, amchim bhav-bhoinnam. Tim amchea sangata vell sartat ani amkam koxem bhogta tem aikon ghetat tednam amkam bhuzvonn melltta. Toxench, tim ghoddie amkam Bible-antlem ek vers dakhoun urba diunk xoktat vo tim amchea sangata magnnem korunk xoktat. d (Rom. 15:4) Thodde pavtti, ek bhav vo bhoinn amchea vixim Jehovachem chintop kitem asa tem amchea ugddasak haddit. Oxem kelʼlean, te tras sosunk amkam modot zaunk xokta. Toxench, amchim bhav-bhoinnam amkam herui vattamnim modot korunk xoktat. Zoxem, tim ghoddie amkam jevonn randun haddit.
Jehovacho mog kortat toslim patieupa sarkim ixttam amkam bhuzvonn ani tenko diunk xoktat (Peregraf 15 polloiat)
16. Bhav-bhoinnam koddlean modot mellonk amkam kitem korunk poddot?
16 Thodde pavtti amkam bhav-bhoinnam koddlean modot magonk poddot. Tim amcho mog kortat ani amkam modot korunk sodhtat tem khorem, punn amkam koxem bhogta ani kiteachi goroz asa tem tankam sanglea bogor kollchem na. (Mho. 14:10; 17:17) Tor tumi niraxi asat zalear, eka lagxilʼlea ixtta lagim uloun tumkam koxem bhogta tem taka sangonk zata. Toxench, tumkam ulounk sompem zata toslea ek vo don vhoddilam lagim pasun tumi ulounk zata. Tea bhair, thoddea bhoinnank sotant ghott aslolea dusrea bhoinnam lagim uloun pasun bhuzvonn mellʼllea.
17. Ami kitem kelear amkam bhuzvonn mellchi na, ani oxem zaina zaunk ami kitem korunk zai?
17 Amkam urba diunk Jehova amchea bhav-bhoinnank uzar korunk xokta. Tor ami eksurim ravchim nhoi. Amkam niraxiponn bhogta dekhun bhav-bhoinnam lagim ulounk amkam mon asona zait. Toxench, thodde pavtti tim amkam somzonk chukot vo aplea utramnim amkam dukhoit. (Jak. 3:2) Torui, hea karonnank lagon ami tanchea sangata vell sarop kednanch bond korchem nhoi. Gavin nanvacho ek vhoddil, zaka depression asa to sangta: “Choddxe pavtti, sobhent aslolea mhojea ixttam sangata ulounk vo tanchea sangata vell sarunk mhaka monuch asona.” Tori astana bhav eksuro ravona. To tanchea sangata vell sarta. Oxem kelʼlean taka borem dista. Tea bhair, Amy nanvachi ek bhoinn sangta: “Mhojea jivitant adim jem ghoddlam taka lagon dusreancher visvas dovrunk mhaka kotthin zata. Punn Jehova bhaxen, bhav-bhoinnancho mog korunk ani tancher visvas dovrunk hanv xikot asam. Oxem kelʼlean, Jehova khuxal zata mhunn hanv zannam. Ani hea vorvim mhaka-i khuxalkai melltta.”
JEHOVAN FUDDARA VIXIM DILʼLEA BHASAUNNEAM VORVIM AMKAM BHUZVONN MELLTTA
18. Jehova beginuch kitem kortolo, ani ami atam kitem korunk zai?
18 Amkam dukh-tras haddttat ani niraxi kortat teo sogleo vostu Jehova beginuch kaddun uddoitolo. (Prok. 21:3, 4) Ani tea vellar tea vostuncho amkam anik “ugddas ieuncho na.” (Iz. 65:17) Punn ami polloilem toxem atam pasun Jehova amche ‘ghave bandta.’ Amkam bhuzvonn diunk ani modot korunk tannem zaiteo vostu dileat. Tor Jehovachi modot gheiat ani “taka tumchi kallji asa” mhunn kednanch dubhavnakat.—1 Ped. 5:7.
GIT 7 Jehova, Amchem Boll
a Nanvam bodolʼleant.
b “ Jehova Tuzo Valor Korta,” hem boks polloiat.
c Jehova sangata ‘uloun pollovop’ mhunnttlear, ami poschatap kela mhunn amchea korneamnim dakhoun divop. Oxem korunk, ami tache lagim amchea patkanchem bhogsonnem magonk zai ani amchi vaitt vagnnuk soddun diunk zai. Toxench ami ek gombhir patok kelam zalear, sobhechea vhoddilanchi modot pasun gheunk zai.—Jak. 5:14, 15.
