Oronʼneant 40 vorsam poriant, Izraelitkaram chodd korun manʼna khatalim. (Sutt. 16:35) Ani don pavtti, Jehovan tankam lhove pasun dil’le. (Sutt. 16:12, 13; Lok. 11:31) Punn hachea bhair, khaunk tankam anikui thoddeo vostu asleo.

Udharonnak, Izraelitkarank ‘thambche khatir vo visov gheunk lagon,’ Jehova tankam thodde pavtti, pieunk udok ani khaunk vostu mellttat toslea zagear vhortalo. (Lok. 10:33) Oslo ek zago mhunnttlear, Elim-ant aslolem oasis vo tollem. Hanga udkacheo “bara zhori ani sot’tor madd asle,” chodd korun khazurache madd. (Sutt. 15:27) Ani Plants of the Bible hea pustokant sanglam ki khazurache madd “zaitea veg-vegllea zagear mellttale . . . Ani lak’khamnim lok chodd korun hea zhaddachim follam khatale, tachem tel kaddttale ani hea zhaddachi savlli ghetale.”

Izraelitkaram ghoddie eka vhoddlea oasis-a lagim pasun gelim astolim, zaka aiz ami Feiran hea nanvan vollkhotat. Ani hem oasis, Feiran nodicho bhag zaun asa. a Discovering the World of the Bible hea pustokant boroilam ki hi nodi “130 km lamb asa. Ani Sinai-ant aslolea soglea nodim poros, hi nodi sogleant lamb, sobit ani famad asa.” Tea pustokant oxem-i sanglam ki “hi nodi doriak melltta thoim thaun 45 km pois gelear, Feiran Oasis-a lagim pavtat. Ho zago doria thaun sumar 610 metr unch asa, ani 4.8 km lamb asa. Tea ak’khea zagear khazurache madd asat. Ani to zago itlo sobit asa ki taka Eden bage sangata sor kela. Hanga aslolea hozaramnim khazuranchea zhaddank lagon, adlea kallar thaun zaito lok hanga ravonk ietat.”

Izraelitkaram Ejiptt soddun ailʼlim tednam, tim tanchea sangata moll’llolem pitt, pitt mollpachim aidonam, toxench thoddo danno ani tel gheun ailʼlim. Punn hem soglem rokddench kabar zalem mhunn kainch dubhav na. Toxench, tim aplea borabor “mezum nozo titlea bokddeanche hindd” gheun ailʼlim. (Sutt. 12:34-39) Punn oronʼneant jievop titlem sompem naslem dekhun, tantuntlim zaitim zonvaram moron gelim astolim. Toxench thoddea zonvarank Izraelitkaramnim jevnna pasot marun khailim astolim. Tea bhair thoddeank, Jehova Devak ani khottea devank pasun bolidan kelim zait. b (D.I. 7:39-43)  Tori astana, Izraelitkaram lagim thodde hindd urle, ani tea hinddank poram-i zolmolim oxem ami mhunnonk zata. Karonn tannim Jehovachi adnea moddli tednam, tannem tankam oxem sanglem: “Tumche put hea oronʼneant, firtea gonvlleam porim challis vorsam jietole.” (Lok. 14:33) Tor hea hinddam thaun tankam ghoddie dudh, ani thodde pavtti mas pasun mellttalem astolem. Punn 40 vorsam poriant oronʼneant jietolea sumar tis lakh lokank, tem pavpa sarkem naslem. c

Zonvarank oronʼneant khaunk ani pieunk khoim mell’llem astolem? d Atam poros tea vellar oronʼneant chodd paus poddttalo, ani tea pasot chodd zhaddam aslim astolim. Insight on the Scriptures, Volume 1-ant boroilam ki aiz thaun 3,500 vorsam poilim, “Arabia-nt atam poros chodd udok aslem.” Oxem ami kiteak mhunnonk zata? Tantunt fuddem sanglam ki “aiz thoim zaite suklole ani khol vhall asat. Hem dakhoun dita ki eka vellar thoim itlo paus poddttalo ki nodi vhanvtaleo.” Torui, tea zagear konnuch ravonaslim, ani to bhirankull aslo. (D.S. 8:14-16) Tor Jehovan vizmit korun udok diunk naslem zalear, Izraelitkaram ani zonvaram pasun moron voita aslim.—Sutt. 15:22-25; 17:1-6; Lok. 20:2, 11.

Jehovan Izraelitkarank manʼna kiteak dil’lo tea vixim sangtana, Moizesan Izraelitkarank oxem mhunnttlem: “Monis unddeanuch nhoi, tor Sorvesporachea tonddantlem bhair sorta tea sogtta vorvim jieta mhonn dakhounk oxem Tannem kelem.”​—D.S. 8:3.