Thodde Levitkar iadnik nasle, punn tankam her dusreo zobabdareo asleo zoxem, pulis odhikari mhunn kam korop. Tanchem kam Devmondirachea karbarea vo sordara khala aslem. Tea odhikarancheo kosleo-kosleo zobabdareo asleo tea vixim Judev borovpi Philo oxem mhunntta: “Thodde Levitkar pulis mhunn Devmondirachea bhitor sortat tea dara lagim ani thodde povitr zagea bhair ube asle. Konnui munis chukon pasun tea povitr zagear voicho nhoi mhunn te rakhon ravtale. Thodde Devmondirachea bhonvtonni rakhonn korunk bhonvot astale. Thodde sokallche bhonvtale ani thodde ratche bhonvtale.”

Mha-dhormsobha hea pulis foujechi modot gheunk xoktali. Ho ekuch oslo Judev zomo aslo zankam hot’tearam uzar korunk Romi sorkaran porvangi dil’li.

Ponddit Joachim Jeremias oso mhunntta, “Jezuk dhorun vhelo tednam, apnnank Devmondirant astana kiteak dhorun vhoronk na mhunn tannem apnnank dhorun vhortolea odhikareank vicharlem. (Mt. 26.55) Tor, taka dhorun vhortolea odhikaream modem, hea Devmondirant aslole pulis odhikari nasle zalear Jezu oslo prosn vicharcho naslo,” mhunn ponddit Joachim Jeremias somzaita. Taka lagon, Jezuk dhorunk ailole odhikari Devmondirache hech pulis odhikari asle mhunn ho ponddit manta. (Juanv 7:32, 45, 46) Jezuchea xisank mha-dhormsobhe mukhar hech odhikari Devmondirachea karbarea sangata gheun ailole. Toxench, apostl Pauluk Devmondirachea bhair ghalunk ghoddiek heach odhikareancho hat aslo.—Itihas 4:1-3; 5:17-27; 21:27-30.