OBHEASACHO LEKH 30
GIT 36 We Guard Our Hearts
Izraelachea Razam Koddlean Ami Xiktat Tim Mhotvachim Lisanvam
“Promannik ani khottea monxa modem, Devachi seva korta ani Tachi seva korina tea monxa modem ontor asa ti tumi novean polletoleat.”—MAL. 3:18.
MUKHEL MUDʼDO
Hea lekhant, ami Jehovak manvololim zaunk kitem korunk zai tem ami Izraelachea razam koddlean xiktolim.
1-2. Izraelachea thoddea razam vixim Bible-ant kitem sanglam?
IZRAELACHER raz choloilʼlea 40-am poros chodd razam vixim Bible-ant sanglam. a Ani tannim kelʼlea thoddea vostum vixim tantunt ukteponnim sanglam. Zoxem, thoddea borea razamnim kelʼlea vaitt kamam vixim. Udharonnak, Raza David. Tache vixim Jehovan oxem mhunnttlolem: ‘Mhojea sevok Davidan, soglea aplea kallzan Mhozo pattlav kelo ani Mhoje nodre mukhar borem tem tannem kelem.’ (1 Raz. 14:8) Punn Bible-ant hem-ui sanglam ki Raza Davidan eke kazari baile sangata pordvar kelo, ani ticho ghov zhuzant gelʼlo astana tacho jiv kaddunk manddnni ievjili.—2 Sam. 11:4, 14, 15.
2 Toxench, zaitea ovisvaxi razamnim kelʼlea borea kamam vixim pasun Bible-ant sanglam. Udharonnak, Raza Rehoboam. Jehovache nodre mukhar “jem vaitt aslem, tem tannem kelem.” (2 It. 12:14) Punn, Jehovan taka Izraelachea dha kullam add zhuz korinaka ani tankam ek novo raza vinchun kaddum di mhunn sanglem tednam, tannem Jehovachem aikolem. Toxench, dusmanam thaun Devachea lokanchi rakhonn korunk tannem aplea razvottke khala aslolim zaitim xaram mozbut kelim.—1 Raz. 12:21-24; 2 It. 11:5-12.
3. Ami khoinchea mhotvachea prosnacho zobab zannam zaunk zai, ani hea lekhant ami kitem polloitolim?
3 Izraelachea razamnim borim toxinch vaitt kamam kelʼlim. Tor ek raza apleak visvaxi aslo vo na tem Jehovan kiteachea adarit tharailem? Hea mhotvachea prosnacho zobab zannam zalʼlean, Jehovak manvololim zaunk ami kitem korunk zai tem ami somzonk pavtolim. Tor Izraelache raza visvaxi asle vo na tem Jehovan kiteachea adarit tharailem tem zannam zaunk, ami tin mudʼdeancher dhean dium-ia: (1) Te purnn kallzan Jehovachi bhokti kortale kai? (2) chuk kelea uprant tannim kallzant thaun poschatap kelo kai? ani (3) te Jehovak manvota tea toren tachi bhokti korit ravle kai?
TANNIM PURNN KALLZAN JEHOVACHI BHOKTI KELI
4. Visvaxi ani ovisvaxi razam modem kitem ontor aslo?
4 Jea razamnim purnn kallzan b Jehovachi seva keli, te taka manvole. Zoxem, Raza Jehoshafatan ‘Sorvesporak soglea kallzan sodhlo.’ (2 It. 22:9) Toxench, Raza Josia vixim Bible-ant oxem sanglam: “Sogllea aplea kallzan . . . Sorvespora-xim portololo konnuch raza na.” (2 Raz. 23:25) Punn Solomona vixim kitem, zannem aplea jivitant uprant Jehovache nodren vaitt tem kelem? Bible-ant sanglam ki “tannem purnn kallzan Jehovachi bhokti korunk na.” (1 Raz. 11:4, NW) Toxench, ovisvaxi raza Abijama vixim Bible-ant sanglam: “Tachem kalliz Sorvespora aplea Deva sovem naslem.”—1 Raz. 15:3.
5. Purnn kallzan Jehovachi seva korop mhunnttlear kitem?
5 Tor purnn kallzan Jehovachi seva korop mhunnttlear kitem? Oxem korta to munis, Jehovachi seva korunk zai mhunn korina. Punn to kallzantlean Jehovacho mog korta ani taka resped dita dekhun tachi seva korta. Ani hem to jivitbhor korta.
6. Kitem kelʼlean ami purnn kallzan Jehovachi bhokti korit ravonk pavtolim? (Mhonnʼnneo 4:23; Matev 5:29, 30)
6 Ami Izraelachea visvaxi razanchi dekh gheun purnn kallzan Jehovachi bhokti koxi korit ravonk zata? Jim kamam kelʼlean Jehova pasot amcho mog unno zaunk xokta, tim ami nakarunk zai. Zoxem, faideak poddona toslem monoronjon, vaitt sangati ani girestkai ektthaim korchea vixim chintop. Karonn hem soglem amkam addkholleo koxeo zaunk xoktat. Tor Jehova pasot amcho mog unno korta toslem kitem-i ami chintʼtat vo kortat zalear, tem rokddench bodlunk ami zata titlo vavr korunk zai. Oxem kelʼlean, ami purnn kallzan Jehovacho mog korit ravonk pavtolim.—Mhonnʼnneo 4:23; Matev 5:29, 30 vachat.
7. Amcher vaitt probhav poddonk xokta toslea vostum thaun ami kiteak pois ravonk zai?
7 Punn ami chotur nant zalear, ami oxem chintunk xoktat ki ami Jehovache bhokte sombondit aslolim kamam kortat dekhun amcher kiteachoch vaitt probhav poddchona. Punn hem chintop dhokeachem asa. Kiteak? Hea udharonna vixim chintat. Borench varem marta tea disa, tumi tumchem ghor nitoll kortat. Punn nitoll korun zalea uprant, tumi daram ani zonelam uktim kelim zalear, ti dhulʼl porot bhitor ietoli nhoi? Teach bhaxen, purnn kallzan Jehovacho mog korunk, tache bhokte sombondit aslolim kamam kelearuch puro nhoi. Punn amchea ghorant dhulʼl porot iena zaunk, ami daram ani zonelam bond dovortat tea bhaxen, Jehova pasot amcho mog unno korunk xokta toslea sonvsarachea ‘vareak’ vo dhulʼlik ami amchea kallzant rigonk diunk zaina.—Ef. 2:2.
TANNIM KALLZANT THAUN POSCHATAP KELO
8-9. Raza Davidak ani Raza Hezekiak xist mellʼlli tednam tannim kitem kelem? ( Chitr polloiat.)
8 Ami poilim polloilem toxem, Raza Davidan ek gombhir patok kelʼlem. Punn tea patka vixim Jehovak koxem bhogta tem provadi Nathanan Davidak sanglea uprant, tannem khaltikaien poschatap kelo. (2 Sam. 12:13) Apnnem khorench poschatap kela oxem Nathanan chintchem mhunn vo apleak khast mellchi nhoi mhunn Davidan poschatap korchem dhong korunk na. Punn Stotr 51-ant Davidan jem boroilem, tantuntlean tannem kallzant thaun poschatap kelo mhunn kolltta.—St. 51:3, 4, 5a, 17.
9 Raza Hezekian pasun Jehova add patok kelem. Tache vixim Bible sangta: “To gorvan bhorlo ani apnnacher, Judacher ani Jerusaleacher khast ieum-xi keli.” (2 It. 32:25) Hezekia gorvan kiteak bhorlo? Ghoddie aplea girestkaiek lagon vo Asiriekarancher taka zoit mellʼllem dekhun vo Jehovan taka vizmit korun piddentlo boro kelʼlo dekhun taka gorv ailo zait. Ani heach gorvak lagon tannem ghoddie Babilonkarank apleachi sogli girestkai dakhoili. Taka lagon, provadi Izaiasan taka xist dili. (2 Raz. 20:12-18) Punn Davida bhaxen, Hezekian pasun khaltikaien poschatap kelo. (2 It. 32:26) Tea pasot, Hezekia ek visvaxi raza aslo, zo “sarkem tem korit ravlo” mhunn Jehovan taka lekhlo.—2 Raz. 18:3, NW.
Raza David ani Raza Hezekiak xist mellʼlli tednam tannim khaltikaien poschatap kelo (Peregraf 8-9 polloiat)
10. Raza Amaziak Jehovan xist dilʼli tednam tannem kitem kelem?
10 Judacho Raza Amazia, David ani Hezekia bhaxen naslo. Jehovachea nodre mukhar sarkem asa tem tannem kelʼlem tem khorem, punn aplea “sogllea kallzan nhoi.” (2 It. 25:2) Tor tannem kosli chuk kelʼli? Edomitank harounk Jehovan taka modot kelea uprant, Amazia tanchea khottea devanchi bhokti korunk laglo. c Ani Amaziache chuki vixim sangonk Jehovan aplea provadeak dhaddlo tednam to tachem aikonkuch toiar naslo, ani taka porot dhaddlo.—2 It. 25:14-16.
11. 2 Korintkarank 7:9, 11 pormonnem, Jehovan amkam bhogsunk ami kitem korunk zai? (Chitram pasun polloiat.)
11 Tor hea razam koddlean ami kitem xikonk zata? Ami amchea patkancho poschatap korunk zai ani ami kelʼleo chuki porot korina zaunk zata titlo vavr korunk zai. Punn amkam title mhotvache koxe disonant toslea vixoi-ancher vhoddilam koddlean solʼlo mellʼllo zalear kitem? Jehova amcho mog korina, vo tea vhoddilank amchea add kitem tori asa, oxem ami chintchem nhoi. Punn Izraelachea razank pasun solʼlo mellʼllo mhunn ami ugddas dovrunk zai. (Heb. 12:6) Tor xist melltta tednam, (1) ami ti khaltikaien manun gheunk zai, (2) goroz te bodlav korunk zai, ani (3) purnn kallzan Jehovachi seva korit ravonk zai. Ami amchea patkancho poschatap kelear Jehova amkam bhogxitolo.—2 Korintkarank 7:9, 11 vachat.
Xist melltta tednam, ami (1) ti khaltikaien manun gheunk zai, (2) goroz te bodlav korunk zai, ani (3) purnn kallzan Jehovachi seva korit ravonk zai (Peregraf 11 polloiat) f
TE JEHOVAK MANVOTA TEA TOREN TACHI BHOKTI KORIT RAVLE
12. Visvaxi razam vixim kitem khas aslem?
12 Jea razamnim Jehovak manvota tea toren tachi bhokti keli, tankam tannem visvaxi mhunn lekhle. Ani hea razamnim Jehovachea lokank pasun toxench korunk urba dili. Punn ami poilim polloilem toxem, tannim aplea jivitant zaiteo chuki keleo. Tori astana, tannim fokot Jehovachich bhokti keli, ani tea desant choltoli khotti bhokti kabar korunk khub vavr kelo. d
13. Jehovan Raza Ahabak ovisvaxi mhunn kiteak lekhlo?
13 Jehovan Izraelachea thoddea razank ovisvaxi mhunn kiteak lekhle? Tannim kelʼlim soglinch kamam vaitt naslim tem khorem. Udharonnak, apleak lagon Nabotak jivexim marlo mhunn Raza Ahabak kollʼllea uprant, tannem thoddi khaltikai dakhoili ani taka dukh bhogli. (1 Raz. 21:27-29) Toxench, tannem Izraela pasot xaram bandlim ani zhuzam jikhlo. (1 Raz. 20:21, 29; 22:39) Punn Ahaban ekdom vaitt tem kelem, zaka lagon tannem kednanch poschatap korunk na. Tem mhunnttlear, aplea bailechem aikon tannem khotti bhokti keli, ani dusreankui toxem korunk urba dili.—1 Raz. 21:25, 26.
14. (a) Raza Rehoboam ovisvaxi mhunn Jehovan kiteak tharailem? (b) Izraelachea choddxea ovisvaxi razamnim kitem kelem?
14 Toxench, ovisvaxi raza Rehoboamacher dhean diat. Peregraf 2-ant ami polloilem toxem, tannem aplea razvottke vellar zaitim borim kamam kelʼlim. Punn tachi razvottki bollixtt zalea uprant, tannem Jehovache Kaide pallop bond kelem ani khottea devanchi bhokti korunk laglo. (2 It. 12:1) Uprant, tannem thodde pavtti Jehovachi ani thodde pavtti khottea devanchi bhokti keli. (1 Raz. 14:21-24) Fokot Rehoboaman ani Ahabanuch nhoi, punn Izraelachea choddxea ovisvaxi razamnim khottea devanchi bhokti keli, ani lokank pasun toxem korunk urba dili. Tor hantuntlean, ek raza Jehovak manvota tea toren tachi bhokti korta vo na tachea adarit to ek boro vo vaitt raza tem Jehova tharaitalo mhunn kolltta.
15. Bhokti Jehovache nodren mhotvachi mhunn koxem kolltta?
15 Bhokti Jehovache nodren khub mhotvachi mhunn kolltta. Karonn lokank Jehovachi bhokti korunk modot korchi zobabdari razanchi asli. Toxench, lok khottea devanchi bhokti kortale tednam, te her gombhir patkam korunk ani dusream sangata vaitt toren vagonk pavtale. (Hos. 4:1, 2) Itlench nhoi, Izraelache raza ani Izrael lok Jehovak somorpit aslolea raxttrache bhag asle. Taka lagon, tannim khotti bhokti keli tednam, Bible sangta ki tannim eka orthan pordvar kelo. (Jer. 3:8, 9) Pordvar korpi munis, aplea kazari sangateak ovisvaxi zata ani taka khub dukhoita. Teach bhaxen, Jehovak somorponn kelʼlo munis khotti bhokti korta tednam, to taka ovisvaxi zata ani tachea kallzak khub dukh dita. e—D.S. 4:23, 24.
16. Jehovache nodren nitivont ani khottea munxa modem kitem ontor asa?
16 Hantuntlean ami kitem xiktat? Khotte bhokte sombondit koslinch kamam korina zaunk ami nichov korunk zai. Teach borabor Jehovak manvota tea toren tachi bhokti korun ami tachi seva korit ravonk zai. Jehovache nodren, ek nitivont ani ek noxttea munxa modem kitem ontor asa tem provadi Malakin spoxtt toren dakhoilem. Tannem boroilem: “Promannik [“nitivont,” NW] ani khottea monxa modem, Devachi seva korta ani Tachi seva korina tea monxa modem ontor asa ti tumi novean polletoleat.” (Mal. 3:18) Jehovan amkam nitivont mhunn lekhlolim amkam zai nhoi? Tor amchea opurnntaiek vo chukink lagon Jehovachi seva korop ami bond korchi nhoi. Karonn oxem koropuch ek gombhir patok zaun asa.
17. Ami konna sangata kazar zatolim tem vinchun kaddttana chotrai kiteak dovrunk zai?
17 Tumi ankvar asat ani kazar zaunk chintʼtat zalear, ek boro sangati vinchun kaddunk Malakichim utram tumkam modot korunk xoktat. Hea vixim chintat. Eka munxak thodde bore gunn asat zait, punn to Jehovachi bhokti korina zalear to Jehovache nodren nitivont asa kai? (2 Kor. 6:14) Ani tum tachea sangata kazar zalear, Jehovak visvaxi ravonk to tuka modot kortolo kai? Raza Solomonak kitem ghoddlem tem ugddas korat. Tachea bailank thodde bore gunn asle zait, punn tim Jehovachi bhokti korinaslim. Ani sovkas-sovkas korun tannim Solomonachem kalliz khottea devam-xim voddun vhelem.—1 Raz. 11:1, 4.
18. Avoi-bapaimnim aplea bhurgeank kitem xikounk zai?
18 Avoi-bapaimno, Jehovachi seva korunk tumchea bhurgeanchi itsa vaddounk, Bible-ant aslolea razanchim udharonnam uzar korat. Jea razamnim Jehovachi bhokti keli ani toxem korunk lokank urba dili, tech raza Jehovak manvole mhunn tumchea bhurgeank somzonk modot korat. Toxench, Jehovachea bhokte sombondit aslolim kamam korop, zoxem Bible-acho obheas korop, mittingek hajir zavop ani porgottnnent bhag ghevop, sogleam-von chodd mhotvachem mhunn tumchea utramnim ani korneamnim tankam dakhoun diat. (Mt. 6:33) Karonn tumi oxem korinant zalear, tumi Jehovachi seva kortat dekhunuch tumchim bhurgim tachi seva kortolim, punn Jehova sangata tanchi svotachi ixttagot aschina. Ani oxem zalem zalear, Jehovachi seva korop titlem mhotvachem nhoi oxem tim chintunk xoktat vo Jehovachi seva korop sarkench bond korunk xoktat.
19. Jehovachi seva korop bond kelea tankam azunui kosli sondhi asa? (“ Tumi Jehova Lagim Porot Ieunk Zata!” hem boks pasun polloiat.)
19 Konnem-i Jehovachi seva korop bond kelea zalear to porot kednanch Jehovacho ixtt zaunk xokchona oxem kai? Na, toxem nhoi. Karonn poschatap korun to porot Jehovachi bhokti korunk xokta. Oxem korunk, tannem khaltikai dakhounk zai ani sobhentlea vhoddilanchi modot gheunk zai. (Jak. 5:14) Ho vavr kelʼlean taka kitlo faido zatolo tea vixim chintat. Tem mhunnttlear, to porot Jehovacho ixtt zatolo!
20. Ami Jehovak visvaxi ravlear to amkam koso lekhtolo?
20 Tor Izraelachea razam koddlean ami koslim lisanvam xiktat? Tantuntlea visvaxi razam bhaxen ami purnn kallzan Jehovachi seva kelear, to amkam-i visvaxi mhunn lekhtolo. Toxench ami amchea chukim thaun xikonk zai, kallzant thaun poschatap korunk zai ani goroz te bodlav korunk zai. Tea bhair, ekloch khoro Dev Jehovak manvota tea toren tachi bhokti korop kitlem gorjechem tem ami ugddas dovrunk zai. Tor ami Jehovak visvaxi ravlear, tachea nodren sarkem tem kortat toslim munxam mhunn to amkam lekhtolo.
GIT 45 Mhojea Kallzachim Chintnam
a Hea lekhant sangleat te “Izraelache raza” mhunnttlear, Judachea don kullancher, Izraelachea dha kullancher, vo 12 kullancher raz choloilʼle te sogle raza.
b UTRACHI SOMZONNI: Bible-ant choddxe pavtti “kalliz” hem utor ek munis bhitorlean koso asa tem dakhounk uzar kelam. Tantunt amchi itsa, chintnam, sobhav, hetu ani dhei mellon asat.
c Tea kallar, Izraelitkar nasle te raza, dusrea raxttrancher zoit vhelea uprant tanchea devanchi bhokti kortale.
d Raza Asan gombhir patkam kelim. (2 It. 16:7, 10) Punn Bible-ant, tannem Jehovache nodren sarkem tem kelem mhunn sanglam. Jehovachea provadean taka xist dili tednam, tannem survatek ti nakarli. Punn ghoddie uprant tannem poschatap kelo. Tannem kelʼlea vaitt kamam poros taka bore gunn asle mhunn Jehovan polloilem. Ani mhotvachem mhunnttlear, Asan fokot Jehovachich bhokti keli, ani tachea razvottkent asloli khotti bhokti kaddun uddounk khub vavr kelo.—1 Raz. 15:11-13; 2 It. 14:1b-4.
e Moizesa udexim dilʼlea Kaideantlea poilea don kaideantlean, ami Jehovak soddun anik konnanchich vo kiteachich bhokti korunk zaina mhunn kolltta. Hantuntlean, bhokti Jehovache nodren ekdom mhotvachi mhunn kolltta.—Sutt. 20:1-6.
f CHITRACHI MAHITI: Eka zannttea bhavak pieupachi sonvoim asa dekhun, ek tornnatto vhoddil mogan taka solʼlo dita. Tor to bhav tacho solʼlo manun gheta, goroz te bodlav korta, ani visvaxiponnan Jehovachi seva korit ravta.
