Dhormdutancho Itihas 19:1-41
19 Apolos Korintant aslo tednam Paulu doria deger thaun pois bhitorlea vattarantlean provas korun Efezant pavlo. Thoim taka thodde xis mellʼlle.
2 Tannem tankam mhunnttlem: “Tumi bhavarth dovorlo tednam tumkam povitr xokti mellʼlli?” Tannim mhunnttlem: “Ami povitr xokte vixim kednanch aikonk na.”
3 Tednam Paulun mhunnttlem: “Tor, tumi koslo bautizm ghetlo?” Tannim mhunnttlem: “Juanvacho.”
4 Paulun mhunnttlem: “Lokamnim poschatap kela ani tankam bhogsonnem zai mhunn dakhounk Juanvan tankam bautizm dilo ani aplea uprant ieta tacher, mhunnche Jezucher visvas dovrunk sanglem.”
5 Hem aikon, tannim Somi Jezuchea nanvan bautizm ghetlo.
6 Paulun tancher hat dovorle tednam tancher povitr xokti aili, ani te veglli-veglli bhas ulounk lagle ani bhasaunneo korunk lagle.
7 Te sumar 12 dadle asle.
8 Magir Paulu tin mhoine poriant Efezantlea sobha-ghorant vochon bhienastana uloit ravlo. To Devachea Rajea vixim bhaxonn ditalo ani khatreche purave lokam mukhar manddttalo.
9 Punn thodde lok hottʼtti asle ani tannim bhavarth dovrunk na. Te soglea lokam mukhar Somiache Vatte vixim vaitt ulounk lagle. Tor Paulun tankam soddle ani tannem xisank tanchea thaun veglle kele. To dor disa Tiranus iskolachea holant bhaxonn diunk laglo.
10 Oxem tannem don vorsam meren kelem. Taka lagon, Asiant ravpi soglea lokank, zaum te Judev vo Grik, Somiachem utor aikonk sondhi mellʼlli.
11 Dev Paulu udexim vhoddlim-vhoddlim vizmitam korit ravlo.
12 Zoxem, lok Pauluche rumal ani kopdde duent munxam koddem vhortale ani tanchem duens borem zatalem. Toxench tancher boslole noxtte dut pasun bhair soron voitale.
13 Punn thodde Judev pasun je veg-vegllea zagear bhonvon noxttea dutank bhair kaddttale, tannim Jezuchea nanvan lokancher boslole noxtte dut bhair kaddpacho proitn kelo. Te mhunnttale: “Paulu zachea vixim porgott korta tea Jezuchea nanvan hanv tuka hukum ditam.”
14 Skiva nanvachea Judev mukhel iadnikak sat put asle. Tannim-i oxench korpacho proitn kelo.
15 Punn tea noxttea dutan tankam mhunnttlem: “Hanv Jezuk vollkhotam ani Paulukui vollkhotam, punn tumi konn?”
16 Oxem mhunnon zacher noxtto dut boslolo tea munxan tancher uddi marli. Ani ek-ek korun tannem tea satui zannank dhorun borech chiddʼddile ani tankam itle boddoile ki tankam khub mar laglo, ani te uktech tea ghorantlean pollon gele.
17 Hem Efezant ravpi Judevank ani Grik lokank kollʼllem tednam tankam sogleank khub bhirant disli, ani Somi Jezuchea nanvak man mellot gelo.
18 Toxench, bhavarth dovorlole zaite lok ieun aplim patkam ukteponnim manun ghetale ani apnnem kitem-kitem vaitt kamam keleant tim ukteponnim sangtale.
19 Itlench nhoi, tanchea modle khubxe lok jadu kortale. Tannim jadu vixim aslolim aplim soglim pustokam ektthaim haddlim ani sogleam mukhar tankam uzo lailo. Tannim tea pustokancho hixob lailo tednam tanchem mol 50,000 chandichea nanneam itlem aslem.
20 Oxe toren, Jehovache* xokten tachem utor ximpddot gelem ani disan-dis ghott zait gelem.
21 Hem soglem ghoddlea uprant, Paulun Masedonia ani Akaiantlean provas korun Jeruzalemant vochonk tharailem. Tannem mhunnttlem: “Thoim gelea uprant mhaka Romakui vochonk zai.”
22 Tannem apleak modot korunk aslolea dog zannank, mhunnche Timot ani Erastusak, Masedoniant dhaddle, punn to apunn thoddo vell poriant Asiantuch ravlo.
23 Teach vellar, Efezant Somiache Vattek lagon boroch bovall zalo.
24 Thoim Demetrius nanvacho ek xett aslo. To Artemis devichim lhan-lhan chandichim mondiram toiar kortalo. Ani hem kam korpachi kola aslolea kamdarank tachea vorvim khub faido zatalo.
25 Tannem hea kamdarank ani toxench tanchea sarkea dusrea kamdarank ektthaim kele ani tankam mhunnttlem: “Lokamno, hea dhondeantlean amkam kitlo faido zata tem tor tumi zannanch.
26 Hatamnim kelʼle dev khorem mhunnttlear dev nhoich, oxem lokank sangon Paulun Efezantuch nhoi punn sumar akʼkhea Asiant zaitea lokank hem manunk lailam. Ani oxe toren tannem tanchim monam koxim bodolʼleant tem tumi svota polloilam ani aikolam.
27 Haka lagon, amchea dhondeak dhoko asach, punn mahan Artemis devichea mondirakui lok kainch valor diunchenant. Tichi puza fokot Asiantuch nhoi punn akʼkhea sonvsarant kortat. Tor, ticho ho vhodd man ubon voitolo.”
28 Hem aikon lok khub ragan bhorle ani mottʼttean bob marun mhunnonk lagle: “Efezkaranchi devi Artemis mahan!”
29 Tednam xarant vhoddlo bovall zalo. Sogle lok ektthaim zaun xarant nattkam zatalim tea zagear* dhanvon gele. Te aplea borabor Gaius ani Aristarkusak voddit gheun gele. Te dogui Masedoniantle asle ani Paulu borabor provas kortale.
30 Paulu apunn svota lokam mukhar bhitor vochonk sodhtalo, punn xisamnim taka vochonk diunk na.
31 Titlench nhoi, porbo ani khellanche odhikari, zankam Pauluchem borem zalʼlem zai aslem, tannim Pauluk sondex dhaddun, nattkam zatat tea zagear vochon tannem aplo jiv dhokeant ghalcho nhoi mhunn vinoti keli.
32 Zomeantle thodde lok kitem tori mhunnon bovall martale ani dusre lok anik kitem tori mhunnttale. Ani thoim soglo goddbodd zalʼlo. Tanchea modlea choddxea lokank te thoim kiteak ektthaim zaleat tench khobor naslem.
33 Tednam zomeantlea thoddea lokamnim Aleksandrak fuddem kaddlo. Judevamnim taka dhuklun lokam mukhar haddlo. Ani Aleksandran hatan khunna korun lokank poristhiti somzauncho proitn kelo.
34 Punn to Judev mhunn tannim vollkholem tednam tannim sogleamnim ekach borabor mottʼttean bob marli. Ani te don voram poriant oxem mhunnon bob marit ravle: “Efezkaranchi devi Artemis mahan!”
35 Xevottak xarachea mukhelean thoim zomlolea lokanchea zomeak xant kele. Tannem mhunnttlem: “Efezkaramno, Efez xar mahan Artemis devichea mondirachem ani mollba voilean poddlolea murtichem rakhonn korpi xar. Hem khobor naslolo konnui hea sonvsarant asa kai?
36 Heo vostu konnuch nakarunk xokona dekhun tumi xant ravat ani goddboddin kainch korinakat.
37 Tumi oslea munxank dhorun haddleat zannim mondirant chori korunk na, na mhunn amchea devichea add ulounk na.
38 Taka lagon, zor Demetriusak ani tachea borabor kam korpachi kola aslolea kamdarank konnanchea-i add kitem-i asa zalear osle vixoi suttave korunk tharailʼlea disa neai-sobha ukti asta, ani razpal* pasun asat, tor tannim thoim vochon eka-mekacher arop ghalche.
39 Hachea bhair tumkam anik kitem-i korunk zai zalear tacho tharav lokanchea sobhent gheunk zai.
40 Ami hea bovall kortat toslea zomeak ektthaim zaunk dilam dekhun aiz amcher sorkara add geleat mhunn arop lagpacho dhoko asa ani he lok kiteak zomle tachem ami kainch karonn diunk xokonant.”
41 Hem sanglea uprant tannem lokanchea zomeak dhaddun dile.
Footnotes
^ Hea zagear lok ektthaim zatale. To zago ordo gol aslo ani fatramnim bandun kaddlolo. Thoim sumar 25,000 lok bosonk xoktale.
