Zesu ə lowai tawolo lɛɛ tɔwɔ ə nwoo ŋɛi ɓo yɛ təɠa pa haai. Ə mo yɛ ma “ Yálá ŋɔ [T]ɔɔlaa yii gaa pai, ho kɛ li maa wɛlɛɛ lɛlɛɛ laa a həli yɛnɛɛ nua kəlee ɓa, ə gɛ, yili ə kɛ a kəla hwaa nu kəlee ɓa. Yili pulu, yɛnɛɛ ŋaa yɛ kea kpɛɛ. ” (Matie 24:14). Kɛlɛɛ nwɛlɛɛ lɛlɛɛ laa həli mɛnii tii a pɛli kɛ kɛi ləi ? A Zesu pɔɔkɔɔnŋaa Yálá lawoo laa həli pələ hu. — Lukə 8:1.

Pɛlɛɠaa laaləi. Zesu ə ŋɔ kalan neai maakwɛli Yálá lawoo laa həliɛ ɓa pɛlɛɠaa laaləi (Matie 10:11-13 ; Túwɔ́ pələ 5:42 ; 20:20). Kɛɛnaa yii maanɛɛ kɛ kilistalea tolooɠaa di Yálá lawoo laa həli laa, naa ə kɛ ma (Matie 10:5, 6 ; Kɔlɛntə veelɛnaa 10:13). Háákələi, kuɔ kpɛli ku wɔ Yálá lawoo laa həli mɛni heɛi gbanŋa kpɔ a nɛlɛɛ, ə lɛɛ kalangbɔn gəlee ŋɔ kpinin gaa ma, ɓɛi maanɛɛ ə Yálá lawoo laa həli laa. Yili ɓa, Gólói Zesu ə ku tɔɔ ma kwa pɛli gɛi “ ku Yálá lawoo laa həli nɔi lonnii diɛ, ku kəla hwaa ɓo ku naa kulɔ ”. — Túwɔ́ pələ 10:42, TMN.

Ɓɛi lɔpee kwa nua kaa laa. Yii nwɔnɔ hwilɛn na Yálá lawoo laa həliɛ ɓa kpɔn ɉu, Zesu ə gɔɔmaa lɛ, yɛ pələi ə gɛ la yá kwɛlɛ, awala kɛtii ya lowa la (Malikə 4:1 ; Záán 4:5-15). Kuɔ kpɛli kwa Yálá lawoo laa həli nua diɛ ɓɛi lɔpee kwa pɛli di kaai laa : Pələ gbin mɛi, kóló kɛɛnaa, mɛbili həɠəi, awala kɛtii tələfɔnə hu. Kwa kəla hwaa ɓo nwɔnɔ ku heeyɔwɔɠaa diɛ, ku kólókɛyɔwɔɠaa, nua kwa diɛni ku kaa kələ tɔnɔ mu lakwəli taa, ə lɛɛ ku yəi bɛlɛn nua. Gólóɠaa tii kəlee haalai, nu miliɔn damaa daa ‘ nwun maaɓo wɛlɛɛ lɛlɛɛ ’ mɛn. — Somə 96:2, TMN.

Gbɛɛ nua ɓə ə́ kaa ə́ kiliŋahiɛi diɛ yii yaan ə́ pa Yálá ŋɔ Tɔɔlaa maa wɛlɛɛ lɛlɛɛ laa həli diɛ, diɛ pɛli bulu mɛinɛɛɠaa hɔlɔɓoi tinaa ? Ho nwɛlɛɛ lɛlɛɛ tii lɛɛ yɛ́ tɔnɔ ə́ kwəi. Gɛ pələ kwɛli ma ə́ mo nua diɛ.

• “ Wɛlɛɛ lɛlɛɛ ” ləkɛɛ ɓə maanɛɛ naa ə həli ?

• Zesu ŋɔ Yálá lawoo laa həli pələ ləkɛɛ ɓə Zehova ŋɔ Kəlaɠaa da bɔɔ kɔɔn ?