ƝAAKWƐLƐI 12
Ya pɛli ə́ maalɛɠɛi ləi Yálá ɓa ?
1. Yálá a nwəli tɔɔ hwɛliwoo kəlee ɓa ?
Yálá kaa nu huwu lɔpee gəlee təlii, ə gɛ di di maalɛɠɛ ma hwɛliwoo hu (Záán dɔlɔɔ 5:14). Kɛlɛɛ, Yálá hwa nwəli tɔɔ hwɛliwoo kəlee ɓa, gɔɔmaa ta ɓaa, hulɔnu yii a nɛa hon a ɲɔnwɔɔ, ŋɔ hwɛliwoo hwa həli Yálá ɓa (Piɛli dɔlɔɔ 3:7). Ɓɛlowai Isilayɛli lonnii di ho kɛi tee la mɛni ɲɔn gɛɛ ɓa, Yálá ho kɛi di wɔ hwɛliwooɠaa mɛn. Ə ma kɛtii ; nɛŋɛn gɛ mun yii a kpəla ɉɔn ma, Yálá a ŋɔ hwɛli wooɠaa mɛn, ə ma kɛ aa nɛŋɛn gbea-kpea həɠə. Hwɛliɓo kaa a Yálá ŋɔ mɛinɛɛ.—Túwɔ́ pələ 3:19 ɓo.
Vidio hu kaa Yálá a nwəli tɔɔ hwɛliwoo kəlee ɓa ?
2. Gwa Yálá hwɛli ləi ?
Hwɛliɓo kɛɛ kaa a Yálá ɓatoo pələ ta. Yili ɓa, gu pɛli mun Zehova yaa kɔu tɔnɔn gbən ɓə maanɛɛ guɔ vɛli (Matie 4:10 ; 6:9). Ə lɛɛ nwɔnɔ, nɛŋɛn gaa guɔ. Yili ɓa, maanɛɛ gu hwɛliɓo kɛ Zesu laa hu, maahɔlɔɓo ə haa gu wɔ nɛŋɛnɠaa maa mɛni ɓa (Záán 14:6). Hwɛliwoo tɔnɔ ɓoɔ gee mɛi tamaa wɛli ho Zehova ɓa. Gaa ɓɔ guɔ hwɛliwoo yɛ kulɔ gu nii hu.—Matie 6:7 ; Filipə 4:6, 7 ɓo.
Ə́ ma wala ə́ woo tɛ yɛ́ hwɛliɓo kɛ, Yálá a mɛn (Samiyɛli dɔlɔɔ 1:12, 13, TMN). Zehova yɛ gu vɛli a lowai lɔpee gəlee : yələwala; yələwilii, kɔnɔn mɛɛ lowai, gu maa mɛniɠaa lɔpee gəlee hu.—Somə 55:22, TMN ; Matie 15:36 ɓo.
3. Lə mɛni ɓa kilistalea da di ŋaakpɔn ?
Gɛ laa ho nɛɛli gu gu maalɛɠɛ Yálá ɓa, maahɔlɔɓo, nua gwa diɛni gu kaa yɛnɛɛ kɛi gee ɓa, di ho laali Yálá la. Da yɛlɛ Yálá ŋɔ mɛni laakwəlamoɔɠaa diɛ, di wɔ kiliɓa Yálá hwa pɛli liilaa kɛi lɔi mɛi (Timɔtə veelɛnaa 3:1, 4 ; Piɛli veelɛnaa 3:3, 13). Yili ɓa, gu maakpaan gaa gu ɓəlaa kalan nea diɛ, ə gɛ gwa diɛni gu kɛ gu kee pɔ, guɔ gu kee hwaŋalɔ.—Hebulu 10:24, 25 ɓo.
Nua Yálá wɛli kaa diɛ, gwa kɛi lɛɠɛ diɛ, yili a kpɔnmaa tɛɛ gu pɔ guɔ kpɛli gu lɛɠɛ Yálá ɓa. Zehova ŋɔ Kəlaɠaa da di kee hwaŋalɔ di wɔ ŋaakpɔnŋaa ɓa a di wɔ laana laa.—Rɔmu 1:11, 12 ɓo.
4. Ya ə́ maalɛɠɛ ləi Yálá ɓa ?
Ya kɛi Biblə kalan, yɛ́ ə́ kiliŋahiɛ bɔ túwɔ́ ɓo pələ ɓa, ya pɛli ə́ maalɛɠɛi Zehova ɓa. Kɛ ə́ kiliŋahiɛi Zehova kɛmɛniɠaa diɛ, da ŋɔ liɛwooɠaa, ə lɛɛ ŋɔ mɛni lakwəlamoɔɠaa. Giliŋahiɛi tii da hwɛliɓo, da gɛ ə́ Zehova ŋɔ wɛlikɛmaa laa da ŋɔ mɛni kɔlɔnŋaa di hu kɔlɔn.—Timɔtə dɔlɔɔ 4:15, 16 ɓo.
Ya kɛ ə́i maalɛɠɛ Yálá ɓa, ho kɛli ya laa na. Ə gɛ wulu-tiliin ə kɛnɛ, maanɛɛ diɛ yá pu ma. Bələ lɔ ɓə laana laa kaa la. Ya kɛi Biblə kalan, yɛ ɲaakaa, ə́ wɔ laana laa a kɛnɛ.—Matie 4:4 ; Hebulu 11:1, 6 ɓo.
5. Ya ə́ maalɛɠɛ Yálá ɓa lə ɓə ya ɉɔlɔɓo ?
Nua Zehova wɛli kaa diɛ, a di maa liihɛlɛn ɉee. A di maakpɛ, ə gɛ di wɔ laana laa ho pa kulɔ di yəi. Yɛnɛɛ yii kpɛɛ ho ma ŋɔ kilitɔɔmaa laa a lɛɛ nwɔnɔ di yəi (Somə 91:1, 2, 7-10, TMN). Pələi maanɛɛ gu túwɔ́ la kɔlɔi pono da kwəinɛɛ di lɛɛ gu yəi, Zehova a bələ lɛ guɔ. A gu kalan yɛnɛɛ yii ɓo pələ leelee ɓa.—Somə 73:27, 28, TMN ; Zaakə 4:4, 8 ɓo.
You May Also Like
GBƐƐ NUA ƁAA KUƆ
Biblə kalanŋaa nwun maa lə ?
Biblə kaa kpɔnmaa tɛɛi nu miliɔn damaa pɔ, diɛ yɛnɛɛ ŋɔ kɛɛmaalən gbea-gbea mukulaɠaa kɔlɔn. Ə́ kaa bɔ ə́ kɛ a nua tii ta ?
