ƝAAKWƐLƐI 5
Lə ɓə Yálá kaa bɔ ə gɛ lɔi mɛi ?
1. Yálá ə lɔi pɛli lə mɛni ɓa ?
Zehova ə lɔi tɛɛ hinaa da nɛaa di pɔ. Gu kɛi katii. Ho Adama da Hawa di pɛli, di kɛ mɛni ɓa yələi. Aa kɛ malakaɠaa pɛli yili mɛni ɓa (Zɔbə 38:4, 7, TMN). Zehova ə Adama hee kulɔ Alizana, kɛɛnaa ɲaanɛɛ katii kɛ. Di kɛi kɛ naa laa ɓaa Edɛni yea (Zənɛsə 2:15-17, TMN). Zehova ə yɛnɛɛ yii kpɛɛ ho ma hɔlɔɓo pələ lɛ Adama da nonnii diɛ.—Somə 37:29 ; 115:16, TMN ɓo.
Yɛnɛɛ kɔwɔtɔɔ lowai, Edɛni yea lɔ ɓə kɛ a Alizana. Adama da Hawa di maanɛɛ kɛ di lɔi mɛi laahwɛɛ a di lonnii. Maanɛɛ nwɔnɔ kɛ di lɔi mɛi hon a nɛlɛɛ ə lɛɛ la ɉu di naa kəlee kɛ a Alizana (Zənɛsə 1:28, TMN). Lɔi ho pai kalaɠalai. Gaa lɔ pai kɛi a nua kɛi a yələ kəlee mɛni.—Somə 104:5, TMN ɓo.
Vidio hu kaa Lə mɛni ɓa Yálá ə lɔi kpɛtɛ ?
2. Lə mɛni ɓa lɔi mɛi ho yiihu ɓaa Alizana ?
Adama da Hawa di kulɔ Zehova woo mu. Yili ɓə gɛ Zehova yɛ di kpɛ Edɛni yea hu. Alizana ə pili di yəi, ə lɛɛ nuta lɔpee ho ta pɛli li lɔi mɛi kɛi a Alizana. Yɛ pələi Biblə kaa moi la “ Lɔi ə wɔlɔ lɛɛ mɛni ɲɔn nwun namu yəi ”.—Zɔbə 9:24, TMN.—Zənɛsə 3:23, 24, TMN ɓo.
Zehova ə hwɛɠɛ mɔɔn niiɓa mɛni laahwɛɛi yɛ hwilɛn na nukanŋaa diɛ ? Kpaa ! Huwala-wala kəlee namu li. Hwa pɛli hwɛɠɛi (Izai 45:18, TMN). Gaa pai pənəi ə yɛnɛɛ nua heei gulɔ Alizana, yɛ pələi ə kɛ la bɔ tɔlɔɔ.—Somə 37:11, 34, TMN ɓo.
3. Lɔi mɛi kaa pai pənəi ə kɛ ləi a Alizana ?
Alizana kaa pai pənəi ə kɛ lɔi mɛi Zesu ŋɔ tɔɔlaa kɛi lowai. Yaa ɓə Yálá aa gɛ a Tɔɔmun. Kɔ kɛnɛ ta kaa pai diɛ kɛ naa ɓaa Alimagədɔn. Zesu kaa pai kɛi malakaɠaa ɲɛitɔwɔ, diɛ pa Yálá ɲowoɠaa kəlee nwun napilii. Yili pulu, Zesu kaa pai Sətana too gahoŋa kwelan-nwaa tɔnɔ (1 000) yee mu. Yálá liiɓa kɛ nua di ho pai lɛɛi gɔi tii hu, maahɔlɔɓo, Zesu kaa pai di tənəndɔɔi, ə di maakpɛ. Di kaa pai yɛnɛɛ yii kpɛɛ ho ma hɔlɔɓoi Alizana, lɔi mɛi.—Kulɔ ponoŋa 20:1-3 ; 21:3, 4 ɓo.
4. Minɛ lowai ɓə mɔnɔ kaa pai kpɛɛ la ?
Nu tamaa da kɛ di kpɔɔ maaləngɛi, diɛ kɛ ma : minɛ lowai ɓə Yálá kaa pai mɔnɔ kpɛɛi la lɔi mɛi ? Zesu ə yɛnɛɛ ŋaakpɛɛi lowai “ kɔlɔn ɉɛn ” lɛ. Mɛni ɲaa nwanaɠaa kaa həlii yɛnɛɛ nua diɛ háákələi. Mɛniɠaa tii da nɛ guɔ, diɛ gu kaa “ yɛnɛɛ ŋaa kpɛɛi lowai ” hu.—Matie 24:3, 7-14, 21, 22 ɓo.
Zesu kaa pai lɛɛi yələkɔlɔn ɉu yɛ lɔi mɛi ŋaawoo ɓo, kwəlan nwaa-tɔnɔ (1 000) yee mu. Naa lowai ɓə gaa pai mɔnɔ kəlee kpɛɛi la (Izai 9:6, 7 ; 11:9, TMN). Zesu kaa pai kɛi a Tɔɔmun, yɛ ɓo nwɔnɔ a halaa laa həli mun gɛnɛ. Gɛ kólói tii haalai ɓə, gaa pai Yálá ŋɔ wɛlikɛmaa nua di wɔ nɛŋɛnŋaa waa la. Yili ɓa, Zesu haalai ɓə Yálá kaa pai ɲɔn da pɔlɔ, ə lɛɛ haa di kpɛɛ la.—Izai 33:24, TMN ; Kulɔ ponoŋa 21:4 ɓo.
5. Gbɛɛ nua ɓə tinaa pai yɛnɛɛ kɛi Alizana ?
Ya li Zehova ŋɔ Kəlaɠaa di wɔ Ŋaakpɔn gɛ pɛlɛ mu, ə́ kaa pai nua kaa laa, da Yálá wɛlilakɛ, diɛ niiɓa kɛ pələ kwɛli
Nua di kaa Yálá woo mu, diɛ ɓə pai yɛnɛɛ kɛi Alizana (Záán dɔlɔɔ 2:17). Zesu ə ŋɔ kalan neai tɛɛ, ə gɛ di kpɔɔmaayɛɛ nua kwɛli, di di kalan Yálá ŋɔ nɛɛlaa hɔlɔɓo pələ ɓa. Zehova kaa háákələi nu miliɔn damaa ŋaakpɔn ɉii, ə gɛ diɛ pɛli tinaa di wɔ yɛnɛɛ kɛi Alizana, lɔi mɛi (Sefania 2:3, TMN). Zehova ŋɔ Kəlaɠaa di wɔ Ŋaakpɔn gɛ pɛlɛɠaa mu, da kalan gɛ yɛ hwilɛn na pələi nu a pɛli kɛi la a : nɛa namu, awala kɛtii nan nɛlɛɛ, hilɛtaa kɛ nɛa, awala kɛtii lon gaa lee lɛlɛɛ. Lon gaa nua da di lonnii da kwɛli hwilɛn Yálá ɓa gee pɔ. Ə lɛɛ nwɔnɔ da di kpɔɔ hɔlɔɓo pələ maakwɛli Biblə kalanŋaa hu.—Kulɔ ponoŋa 15:4 ɓo.
