ƝAAKWƐLƐI 8
Lə mɛni ɓa Yálá a hwaa ma mɛni ɲɔn da mɔnɔ diɛ həli guɔ ?
1. Mɛni ɲɔn ə gɔwɔtɔɔ ləi ?
Yálá ə nukanŋaa lɛɛ laa di di kpɔɔ ŋaawoo ɓo, ə gɛ di gɔlɔn yii di hwa pɛli yɛnɛɛ mɛniɠaa kpɛɛi
Mɛni ɲɔn ə gɔwɔtɔ ɓɛlowai Sətana ə lɛɛ toloo kɛ la. Sətana ə kɛ toloo a malaka lɛlɛɛ, kɛlɛɛ “ ho lɛɛ teɲa pələ mɛi ” (Záán 8:44, TMN). Sətana ə kɛ bɔ ə Yálá tɔɔ həɠə, ə gɛ nukanŋaa diɛ kwɛli hwilɛn ma. Sətana ə lɛɛ kɛ nɛɛnu toloo ɓa, yili ə kulɔ Yálá woo mu, ə lɛɛ yaatii nwoo mu. Adama ə hwilɛn nɛa púlú, yaa kpɛli ə kulɔ Yálá woo mu. Ŋɔ kulɔ nwoo mu laa tii ɓə pa a mɔnɔ da haa lɔi mɛi.—Zənɛsə 3:1-6, 19, TMN ɓo.
Sətana ə kɔ pɛlɛ Yálá ŋɔ ŋaawoo ɓo ɓa, yɛ pili la Hawa wəlii, ə gɛ yili ə kulɔ Yálá woo mu. Nu mɔlɔɓəlaa daa hwilɛn Sətana púlú. Di ho Yálá kɔlɔn a di nwun namu. Pələ ɓə Sətana ə kɛ la a “ ɲɛnɛɛ ŋɛi hu tɔɔmun ”.—Záán 14:30 ; Záán dɔlɔɔ 5:19 ɓo.
2. Yálá ə wɔlɔ ŋɔ pɛlihɛnŋaa pɛli a ɲɔnwɔɔ ?
Yálá ŋɔ pɛli hɛnŋaa kəlee lɛlɛɛi. Nukanŋaa da malakaɠaa da pɛli kɛ lɛɛ Yálá woo mu (Detelonɔmə 32:4, 5, TMN). Yálá ə gu lɛɛ laa, guɔ pɛli gu liiɓa həɠəi mɛni lɛlɛɛ da mɛni ɲɔnwɔɔ hu. Gu liiɓa həɠə mɛni a gɛ, guɔ pɛli Yálá wɛlila kɛi.—Zaakə 1:13-15 ; Záán dɔlɔɔ 5:3 ɓo.
3. Lə mɛni ba Yálá aa hwaa ma guɔ nii mɔnɔ mɛɛ ?
Zehova ə Sətana lɛɛ laa, yili ə kɔ pɛlɛ ŋɔ ŋaawoo ɓo ɓa, lowai tiikpə yee mu. Lə mɛni ɓa ? Ə gɛ ə nɛ guɔ yii nukanŋaa di hwa pɛli di kpɔɔ ŋaawoo ɓoi (Kilimaa mun 7:29 ; 8:9). Aa kɛ kea a kwəlan nwaa mɛida (6 000), yɛnɛɛ tɔɔɓəlaa di ho pɛli li mɔnɔɠaa kpɛɛi. Kɔ mɛni, paaɓo, ɲɔn, ə lɛɛ hulu, di kaa lɔ nii lɔi mɛi.—Zelemi 10:23, TMN ; Rɔmu 9:17 ɓo.
Yálá ŋɔ ŋaawoo ɓo ho yɛ nukanŋaa di wɛi. Maahɔlɔɓo, nua kpɔ da di yee hee mu, da bulu mɛinɛɛ hɔlɔɓo (Izai 48:17, 18, TMN). Ɉu ho kea kweali, Zehova kaa pai nukanŋaa di wɔ ŋaawoo ɓo ŋaa yɛɛi. Nua lɔ da lɛɛ Yálá woo mu, diɛ ɓə pai lɛɛ lɔi mɛi.—Izai 11:9, TMN. Daniyɛli 2:44 ɓo.
Vidio hu kaa Lə mɛni ɓa Yálá a nɛɛlaa mɔnɔ yɛ həli guɔ ?
4. Yálá liilaa gu pɔ, lə ɓə maanɛɛ gu gɛ yili hu ?
Sətana ə mo yɛ, nuta lɔpee hwa pɛli kwɛli hwilɛn ɉii Zehova ɓa kpɛli. Ya pɛli Sətana ŋɔ lɛɛ tii pulu həɠəi ? Ya pɛli ma ! Yálá liilaa gu pɔ, yili a gɛ, guɔ pɛli gu liiɓa həɠəi Yálá ŋɔ ŋaawoo ɓo da nukanŋaa di wɛi hu. Gwa yili lɛ gu túwɔ́ pələ hu.—Zɔbə 1:8-12, TMN ; Haŋɔn 27:11, TMN ɓo.
5. Gwa nɛ ləi guɔ Yálá kaa a gu nwun namu ?
Gu kɛ mɛniɠaai gwa ɉəɠə ɉu, da nɛ akɛ gu kaa ɓɔ Yálá ə kɛ a gu nwun namu
Gwa kɛi kwɛli hwilɛn Yálá ɓa a gbɔkpɔ, guɔ hiɛ a Biblə woo gu wɔ yɛnɛɛ hu, gwa nɛ guɔ Yálá kaa a gu nwun namu (Záán 4:23). Gwa gu laa kulɔ politikə da kɔ mɛniɠaa hu, yɛ pələi Zesu ə kɛi gɛ la, gwa gu maakwea Sətana ɓa.—Záán 17:14 ɓo.
Sətana a nua hwaŋalɔ mɛni ɲɔn ɉuwu tamaa kɛɛ ɓa, da wɛlimɛni. Gwa mɛni ɲɔnŋaa tii lɛɛ laa, nu taɠaa da yɛlɛ guɔ. Gu ɓəlaa da gu kɔlɔn nua da pɛli nwɔnɔ di yowolaa hee guɔ (Piɛli dɔlɔɔ 4:3, 4). Maanɛɛ gu gu liiɓa həɠə : Nua da Yálá wɛlilakɛ, diɛ ɓə maanɛɛ gu hwilɛn di púlú ? Yálá ŋɔ liɛwooɠaa ɓə maanɛɛ gu lɛɛ di púlú ? Gwa yili kɛ, akɛtii gwaa nɛ guɔ Sətana kaa a lɛɛmun, yai kɛ ma, gwa kɛ mɔnɔ hu, gu hwa pɛli lɛɛi Yálá woo mu.—Kɔlɛntə dɔlɔɔ 6:9, 10 ; 15:33 ɓo.
Yálá ŋɔ wɛlikɛmaa a nɛ guɔ yɛ mɔnɔ da mɛni ɲɔn di kaa pai kpɛɛi. Nua da laa yili la, diɛ nɛ di túwɔ́ pələ hu, di kaa pai yɛnɛɛ yii kpɛɛ ho ma hɔlɔɓoi lɔi mɛi.—Záán 3:16 ɓo.
