ƝAAKWƐLƐI 6
Kilitɔɔmaa laa ləkɛɛ ɓə gwa pɛli ɉɔlɔɓoi yɛ hwilɛn na haaɓəlaa diɛ ?
1. Wɛlɛɛ lɛlɛɛɠaa ləkɛɛ ɓə hwilɛn ɉii haaɓəlaa diɛ ?
Ɓɛlowai Zesu ə kɛ la lɔi mɛi, ə li holo ta Betani, Zolosalɛmu kwɛlɛ taa ta li kɛ, məlan mun Lazali aa kɛ haa laa holo naan dɛɛ pulu. Zesu da Lazali maahalaa ni ŋɛi kɛ a Malitə da Mali, də li gama la. Ɉu ho kwea, nu kpulu yɛ tɔɔ laa. Ə kiliŋahiɛ, gwəinɛɛ Malitə da Mali di ɉɔlɔɓo, ɓɛlowai Zesu ə Lazali nwun na.—Záán 11:21-24 , 38-44 ɓo.
Malitə kili ə gbea kɛ haaɓəlaa nwun mɛni hu. Gili ə kɛ ɉu yii Zehova kaa pai kɛ haaɓəlaa nwun ɉii, di pənə di yɛnɛɛ kɛ lɔi mɛi.—Zɔbə 14:14, 15, TMN ɓo.
2. Haaɓəlaa maa mɛni kaa ləi ?
Yálá ə kɛ Adama ɓa : “ Ə́ kaa a pɔ́lɔ́, ə́ kaa nwɔnɔ pai pənəi ə́ kɛ a pɔ́lɔ́. ”—ZƏNƐSƏ 3:19, TMN.
Yálá ə nukan gbɛtɛ a pɔ́lɔ́ (Zənɛsə 2:7 ; 3:19, TMN). Hɛnda ho gu hu, yɛ lɛɛ a vulu gu haa pulu. Gu kaa a pɛli hɛnŋaa yii nu ɲɛi kɔu a gaa. Gwa haa, gu nwun gbɔlɔ yaa kpɛli a haa, ə lɛɛ gu wɔ kiliŋahiɛɠaa da kala. Yili ɓa, haaɓəlaa di ho mɛni ta lɔpee kpaɠala kɔlɔn. Nwun tii Lazali ə mo, ho mɛni ta hukulɔ, yɛ hwilɛn na haaɓəlaa diɛ, maahɔlɔɓo,mɛni ta naa kili ho lɛɛ ɲɛ.—Somə 146:4, TMN ; Kilimaa mun 9:5, 6, 10 ɓo.
Nua da haa, Yálá a kɛ mɔɔn di mɔnɔ ɓoi nwɔn ɉu ? Yɛ pələi Biblə a mo la, haaɓəlaa di ho mɛni lɔpee ta kpaɠala kɔlɔn. Ɉahanama nwɔn maa kalan gɛɛ kaa a lɛɛ pɛlɛɛ Yálá ɓa. Nua mɔnɔɓo mɛni nwɔn ɉu maa kiliŋahiɛ ho ta too li Yálá ɓa.Yili a nwana kpɔ ma kɛnɛ.—Zelemi 7:31, TMN ɓo.
Vidio hu kaa Haaɓəlaa maamɛni kaa ləi ?
3. Haaɓəlaa da mɔɔn pɛli hwaa gu pɔ ?
Haaɓəlaa di hwa pɛli hwaai, di hwa pɛli nwɔnɔ mɛni mɛn ɉii (Somə 115:17, TMN). Kɛlɛɛ, Malaka ɲɔnwɔɔɠaa da pɛli hwaa nua pɔ, diɛ di kpɔɔ kɛ yɛ nua yiiɠaa daa haa (Piɛli veelɛnaa 2:4). Zehova yɛ, nuta ho ɉukɔɔn, yɛ kɛ gaa hwaa haaɓəlaa pɔ.—Detelonɔmə 18:10, 11, TMN ɓo.
4. Gbɛɛ nua ɓə pai nwun ɉii haaɓəlaa lowai ?
Nua pai nwun ɉii lɔi mɛi, di kaa pai kɛi a nu miliɔn damaa. Nua ma kɛ di ho kɛ Yálá kɔlɔn, ə lɛɛ di túwɔ́ pələ ɲɔnwɔɔ, di kaa pai nwun ɉii.—Lukə 23:43 ; Túwɔ́ pələ 24:15 ɓo.
Nua pai nwun ɉii haaɓəlaa lowai, di kaa pai pɛlii Yálá kɔlɔnŋaa maakwɛlii, ə lɛɛ di di wɔ laana laa lɛ, yɛ hwilɛn na Zesu ɓa, a di túwɔ́ pələ da lɛɛ nwoomu laa (Kulɔ ponoŋa 20:11-13). Nua pai nwun ɉii, da mɛni lɛlɛɛ kɛ, di kaa pai pɛlii kɛi di nɛɛ hu lɔi mɛi a yələ kəlee.—Záán 5:28, 29 ɓo.
5. Lə ɓə haaɓəlaa nwun mɛni a nɛ guɔ yɛ hwilɛn na Zehova ɓa ?
Yálá ə non dɛɛ, ə gɛ ə haa gu maa mɛni ɓa, yili ɓə a haaɓəlaa nwun mɛni ŋɔ kilitɔɔmaa laa tɛɛ gu pɔ. Yili ɓa, haaɓəlaa nwun mɛni a Zehova ŋɔ wɛlikɛmaa lɛ guɔ, yili kaa nwɔnɔ a mɛinɛɛ kɛnɛ yii gu hwa pɛli maa kóló ɓoi. Haaɓəlaa da pa nwun ɉii, gbɛɛ ɓə ə́ kaa bɔ ə́ pa ə́ ɲɛi tɔɔ ma ?—Záán 3:16 ; Rɔmu 6:23 ɓo.
