Zehova a Yálá ɓə húlu toloo lɔ mɛni hee gbanŋa. Biblə a mo yɛ, ə nɛɛnu toloo pɛli, « ə dɛɛ hulɔnu pɔ ». Adama kwəi ə nɛɛ kpɔ kɛnɛ, ə mo yɛ ma : « Nui ŋɛi kaa a gɔ́u ta, yɛ ɓo a ɉúwɔ ta » (Zənɛsə 2:22, 23, Traduction du monde nouveau). Zehova kaa lɔ nii bɔ, húlu lɔ nua diɛ ɓo kwəinɛɛ hu.

Ka húlu lɔ, a kɛ kiɛ ka wɔ kili ɓa, mɛni kəlee kaa pai kɛi a nɛlɛɛ. Kəlaa, ə ma kɛ hulɔnu da nɛa di nɛɛ kpɔ a neelee, mɛni kaa lɔ pai kɛi di yəi bɛlɛn (Kɔlɛntə dɔlɔɔ 7:28). Biblə ŋɔ liɛwooɠaa kaa ɉɛɓɛi ŋɛi hu, ka kɛi di pɔ túwɔ́ ɓo, ka kaa pai kwəinɛɛ hɔlɔɓoi ka wɔ húlu yii ɓoɔ hu, ə lɛɛ, ka kɛ kwəinɛɛ hu ka yəi bɛlɛn (Somə 19:8-11, TMN).

YII BIBLƏ KAA MOI : Hulɔnu ɓə gaa a pɛlɛ namu (Efɛsə 5:23).

Akɛ ə́ kaa a nɛa namu, yii Zehova kaa bɔ ə́ gɛ ə́ nɛa ɓa, ya ɓaa ə́ ɉon a nɛlɛɛ (Piɛli dɔlɔɔ 3:7). Zehova ə nɛɛnu pɛli a ə́ maakpɔnmaa ɓo mun, gaa bɔ yɛ́ maawiɛ, ə lɛɛ yɛ́ nwɛlilakɛ (Zənɛsə 2:18, TMN). Maanɛɛ ə́i nɛa maa mɛni tɛɛ ə́ wɛi tɔwɔ, a nwɛlilakɛ pələ (Efɛsə 5:25-29).

Akɛ hilɛ taa kɛ nɛa ɓaa yɛ́, yii Zehova kaa bɔ ə́ gɛ, ya ɓaa ə́i hilɛ maawiɛ kpɔ kɛnɛ, ə lɛɛ ə́ kpɔnmaa tɛɛ bɔ ə ŋɔ maatii kɛ (Kɔlɛntə dɔlɔɔ 11:3 ; Efɛsə 5:33). Kiliŋahiɛ yii ə́ hilɛ a gɛ ka maa mɛni hu, ə́ yee hee mu a ə́ lii kəlee, ə lɛɛ ka yaa kaa kóló kɛ yili maa mɛni ɓa (Kɔlɔsə 3:18). Ya gɛ tii, ə́ kaa pai lɛlɛi ə́ hilɛ da Zehova di ɲɛi ɓa (Piɛli dɔlɔɔ 3:1-6).

YII KA PƐLI GƐI :

• Hulɔnu, ə́ nɛa maaləngɛ, pələi ya pɛli kɛi la a nɛa namu lɛlɛɛ, ə mo yɛ́. Nɛɛnu yɛ́ kpɛli, ə́ hilɛ maaləngɛ, pələi ya pɛli kɛi la a hilɛ taa kɛ nɛa lɛlɛɛ, ə mo yɛ́. Ka ka wəli tɔɔ ka kee ni diɛ kpɔ a nɛlɛɛ, yii ka tɛi-tɛi a pɛli gɛi yii yaan duwɔ pələ lɛlɛ yee ta ə pɛlɛma, ə gɛ

• Ho kɛli ka ka liilaa, maahɔlɔɓo, lowai tamaa kaa pai tɛɛi kaa təɠa pa pɛlii ka kee ni kwəinɛɛi

YII BIBLƏ KAA MOI : Ho kɛli ya ə́ nɛa awala kɛtii ə́ hilɛ ŋɔ tɔnɔ maa liihɛlɛn ɉee (Filipə 2:3, 4). Ə́ nɛa awala kɛtii ə́ hilɛ hon a nɛlɛɛ, ə́i kili lɛɛ ɉu yɛ́ ma yii Yálá kaa bɔ ŋɔ kóló kɛ nua diɛ gɛ ya ɓaa di wɔ « mɛni lɛlɛɛ nu kəlee pɔ ». (Timɔtə veelɛnaa 2:24, TMN.) « Nu awala kɛ vaa woo hu yɛɠɛi, gaa lɔ yɛ a kɛi ɓowa kweaa pili nu ɓa, kəlaa kilimaa mun vaa woo a nu kɔlɔi pono ». Yili ɓa, ə́ hwaa woo hu yɛɠɛ, yɛ́ təɠa pa hwaai (Haŋɔn 12:18, TMN). Zehova ŋɔ kili maahəɠɛɛ kaa pai kpɔnmaa tɛɛi ə́ pɔ, ə́ hwaa a nɛlɛɛ a nua wɛlilakɛ pələ (Galatə 5:22, 23 ; Kɔlɔsə 4:6).

YII KA PƐLI GƐI :

• Yálá hwɛli, ə gɛ ə́ lii ə laa, yɛ́ pɛli ə́ wəli tɔɔi, ɓɛlowai ka kaa pai mɛni wala-wala ta ɓoi la ka nu hweelɛi

• Mɛnii ə́ kaa pai moi, da pələi ə́ kaa pai moi la, ə́ kiliŋahiɛ ma a nɛlɛɛ

YII BIBLƏ KAA MOI : Ya húlu lɔ, yɛ́ ka ə́ nɛa, awala kɛtii ə́ hilɛ, ka kɛ kea a kɔlɔ tɔnɔ (Matie 19:5). Kəlaa, ka kaa a nu hweelɛ, ə lɛɛ ka wɔ kiliŋahiɛɠaa da pɛli kɛi a gulaa gee mu. Yili ɓa, maanɛɛ ka gɛ pələ kwɛli ma ka kiliŋahiɛ pələɠaa da ka kwəi mɛniɠaa di kɛ tanɔn (Filipə 2:2). Ka kɛi mɛni ta kɛ, maanɛɛ ka woo tɔɔi ə kɛ tanɔn. Biblə kaa kɛi ma : « Nu a liɛwoo kwɛli, yii gaa bɔ ə gɛ, ɉu a nɛɛ » (Haŋɔn 20:18, TMN). Ka kɛ bɔ ka mɛni wala-wala ta kɛ, ka Biblə ŋɔ liɛwooɠaa lɛɛ laa di ka tənəndɔɔ (Haŋɔn 8:32, 33, TMN).

YII KA PƐLI GƐI :

• Ya kɛi ə́ nɛa awala kɛtii ə́ hilɛ kili pu mɛni ta hu, awala kɛtii yɛ́ ə́ kiliŋahiɛ pələ ɓo ma, maanɛɛ yii kpɔ gaa ə́ kwəi, yɛ gaa ə́ ɲɛi

• Ya kɛi pa lɔi mɛni ta hu, ə́ woo hukulɔ ə́ nɛa awala kɛtii ə́ hilɛ ɓa