ƝAAKWƐLƐI 01

Biblə a pɛli kpɔnmaa tɛɛ ləi ə́ pɔ ?

NWOO MƐN

Nu kəlee a kɛ gbɔɔ maaləngɛi yɛ hwilɛn na yɛnɛɛ ɓa, haa, mɔnɔ ə ma kɛ yɛnɛɛ dɔwɔ pələ. Gwa kɛ nwɔnɔ gu kiliŋahiɛi gu maakpaanŋaa diɛ, pələi gwa tɛɛ la guɔ pɛli wali hɔlɔɓoi yii yaan gu gu maamɛniɠaa ɲɛikulɔ ə lɛɛ pələi gwa pɛli kɛi la kwəinɛɛ hu gu yəi bɛlɛn. Nu tamaa daa gaa diɛ ma Biblə a pɛli yɛnɛɛ ŋɔ kɛɛmaalən gbea-kpeaa mukulɔi, kəlaa gəlee hwəli, daa gaa nwɔnɔ diɛ ma a kɛ liɛwoo lɛlɛɛɠaa tɛɛ di pɔ di wɔ yɛnɛɛ yii ɓo pələ hu holo kəlee. Ə́ wɔ kili ɓa, Biblə a pɛli kpɔnmaa tɛɛ nu lɔpee gəlee pɔ ?

1. Gɛɛmaalənŋaa Biblə a mukulɔ, daɠaa ɓaa lə ?

Biblə a gɛɛmaalən maamɛni wala-walaɠaa ŋɛi mukulɔ : Yɛnɛɛ ə gɔwɔtɔɔ ləi ? Yɛnɛɛ kɛ mɛni nwun maa lə ? Lə mɛni ɓa nukanŋaa da kɛ mɔnɔ mɛɛi ? Lə ɓə a tɛɛ nu haa pulu ? Lə mɛni ɓa kɔ mɛni laa toɔi yiihu kpɔ kɛnɛ yapa liilaa ɓə nu kəlee kaa bɔ ? Nɔi ŋɛi gu kaa mɛi, lə mɛni ɓə tinaa pai həlii ma ? Biblə a gu hwaŋalɔ guɔ pɛli gɛɛmaalənŋaa tii mukulaaɠaa kwɛlii ə lɛɛ nu miliɔn damaa daa mukulaaɠaa hɔlɔɓo, yili aa di kwəinɛɛ.

2. Biblə a pɛli kpɔnmaa tɛɛ ləi gu pɔ, guɔ pɛli kɛi kwəinɛɛ hu, gu wɔ yɛnɛɛ hu holo kəlee ?

Biblə a liɛwoo lɛlɛɛɠaa tɛɛ gu pɔ. Gwa gɔɔmaa həɠə a pɛlɛn nua kalan pələi da pɛli kɛi la kwəinɛɛ leelee hu. A gu liɛwoo kɛ pələi gwa pɛli gu tɔɔ la kpaan gu wɔ liihɛlɛn mɛniɠaa hu ə lɛɛ pələi gwa pɛli gu kwəinɛɛ hɔlɔɓo la gu kɛ kóló hu. Yii Biblə a galan yɛ hwilɛn na mɛniɠaa ŋɛi gu mo diɛ, da mɛni takpɛliɠaa, ə́ ka pai gɔlɔn ɉii gwa kɛi ɉɛɓɛi ŋɛi kalan gee ɓa. Yili kaa pai kpɔnmaa tɛɛ ə́ pɔ ə́ ɲaakaa yɛ́ ma, “ Ɉɛɓɛ maahɛɠɛɛ hu woo kəlee [yii lɔpee gaa Biblə hu] a pɛli nu maakwɛlii ” (Timote veelɛ 3:16).

Ɉɛɓɛi ŋɛi ho a Bible, kelaa a kpɔnmaa tɛɛ ə́ pɔ, ə́ gɛ yɛ́ kpinii yɛ́ pɛli Biblə ɲaakaai. Yili ɓa, ku kaa ə́ hwaŋalɔi yɛ́ pɛli vɛlisɛɛɠaa ɓoi diɛi di kaa ɉɛɓɛ ɲaakwɛlɛiɠaa kəlee hu ə lɛɛ yɛ́ di kɔɔn yii ə́ gɔlɔn ma.

Ə́ WƆ MƐNIKƆLƆNŊAA TA PƐLƐ MA

Gaa pələi Biblə aa kpɔnmaa tɛɛ la nu tamaa pɔ, pələi ya pɛli Biblə ɓoɔ dɔlɔɔ kulɔi la, ə lɛɛ gaa lə mɛni ɓa maanɛɛ ə́ kpɔnmaa hu hwɛli Biblə ɲaakaa mɛni ɓa.

3. Biblə a pɛli gu tənəndɔɔi

Biblə kaa lɔ yɛ nwɔn nən gɛnɛ. A pɛli ə kpɔnmaa tɛɛ gu pɔ guɔ pɛli gu wɔ mɛniɠaa həɠəi ɉu a nɛlɛɛ, ə lɛɛ ə kpɔnmaa tɛɛ gu pɔ guɔ pɛli tinaa mɛniɠaa kɔlɔn ɉii.

Maatɛnɛ 119:105 ɓo, ə lɛɛ ka lono kɛ gɛɛmaalənŋaa ŋɛi mɛi :

Nui Maatɛnɛ hɛɓɛi ŋɛi pɛɛn ə kɛi giliŋahiɛ ləi yɛ hwilɛn na Biblə ɓa ?
Ə́ kiliŋahiɛ pələ kaa ləi yɛ hwilɛn na Biblə ɓa ?

4. Biblə a pɛli gu wɔ kɛɛmaalənŋaa mukulɔi

Nɛɛnu ta ə gaa yɛ ma gɛɛmaalənŋaa kpɔ ə kɛi gɛ gbɔɔ ɓa kwəlan damaa yee mu, Biblə a gɛɛmaalənŋaa tii mukulɔ. Vidio kaa, ə lɛɛ ka lono kɛ gɛɛmaalənŋaa ŋɛi mɛi.

VIDIO : Hó ə́ wɔ kilitɔɔmaalaa lɛɛ laa ho kulɔ ə́ yəi ! (1:48)

Vidio ŋɛi hu, kɛɛmaalən ləkɛɛɠaa ɓə nɛɛnui ŋɛi ə kɛi gɛ gbɔɔ ɓa ?
Biblə kalanŋaa ə kpɔnmaa tɛɛ ləi bɔ ?

Biblə a gu hwaŋalɔ yii yaan guɔ kɛɛmaalənŋaa kɛ. Matie 7:7 ɓo, ə lɛɛ ka lono kɛ gɛɛmaalən ŋɛi mɛi :

Kɛɛmaalən ləkɛɛɠaa ɓə ya kɛ gɛi ə́ kpɔɔ ɓa yii Biblə a pɛli ə di mukulɔ ?

5. Ya pɛli ə́ wɔ Biblə ɓoɔ ɲaanɛɛ kulɔi

Nu tamaa da kɛ Biblə ɓoɔ ɲaanɛɛ kulɔi ə lɛɛ diɛ dɔnɔ kulɔ. VIDIO kaa, ə lɛɛ ka lono kɛ gɛɛmaalənŋaa ŋɛi mɛi.

VIDIO : Biblə ɓoɔ (2:05)

Muhəɠəninɛɠaa ŋɛi vidio hu, di kɛi di kiliŋahiɛ ləi toloo yɛ hwilɛn na hɛɓɛ ɓoɔ ɓa ?
Lə mɛni ɓa di kiliŋahiɛ pələ kaa kea a dee yɛ hwilɛn na Biblə ɓoɔ ɓa ?

Biblə a mo guɔ yɛ ma a pɛli ma ə liɛwoo tɛɛ gu pɔ, liɛwooi a gu hwaŋalɔ yɛ kilitɔɔmaalaa tɛɛ gu pɔ. Romə 15:4 ɓo, ə lɛɛ ka lono kɛ gɛɛmaalən ŋɛi mɛi :

Mɛni laakwəlamoɔɠaa Biblə hu yɛ hwilɛn na kilitɔɔmaalaa da hwaŋalɔ ɓa, nwɛli aa too yɛ́ ?

6. Nu takpɛliɠaa da pɛli kpɔnmaa tɛɛ gu pɔ gu Biblə ɲaakaa

Nu tamaa daa gaa diɛ ma pələi ma diɛ kpinii da kɛ Biblə ɓoi la, da nu takpɛliɠaa da kɛi lono kɛ Biblə mɛi, yili a kpɔnmaa tɛɛ di pɔ kpɔ kɛnɛ. Gɛlaɠaa 8:26-31 ɓo, ə lɛɛ ka lono kɛ gɛɛmaalən ŋɛi mɛi :

Gwa tɛɛ ləi gu Biblə ɲaakaa ? Nwoo kpuwɔ 30 da 31 kaa.

Etiopimun maakpaan ə kɛ kpɔnmaa ɓa ə gɛ yɛ pɛli Biblə ɲaakaai. Nu tamaa daa gaa diɛ ma pələi ma diɛ kpinii da kɛ Biblə ɓoi la, da nu takpɛliɠaa da kɛi lono kɛ Biblə mɛi, yili a kpɔnmaa tɛɛ di pɔ kpɔ kɛnɛ.

NUTAƓAA DA KƐ KƐI MA : “ Biblə kalanŋaa kaa a lowai hukalaa. ”

Lə ɓə ə́ kaa pai moi diɛ ? Lə mɛni ɓa ?

YII GU GALAN

Biblə a liɛwoo lɛlɛɛɠaa tɛɛ gu pɔ gu wɔ yɛnɛɛ yii ɓo pələ hu holo kəlee, yɛ gu wɔ kɛɛmaalən gbea-kpea mukulɔ ə lɛɛ yɛ hwaŋalɔ da kilitɔɔmalaa tɛɛ nua pɔ.