ƝAAKWƐLƐI 41
Lə ɓə Biblə a mo yɛ hwilɛn na haɠakpɔn mɛni ɓa ?
Lonoɠaai vilɛnŋaa haɠakpɔn mɛni ɓa nu tamaa da nwumɛ nono huwu maai tii kɛi. Kəlaa Biblə nwɛi, a haɠakpɔn mɛni hukulɔ kpɔ a ɉuponoɔ ə lɛɛ yɛ gɛ a maawiɛlaa. Yii a mo yɛ hwilɛn na haɠakpɔn mɛni ɓa nɛlɛɛ guɔ. Yili hwa gu kwəi pili guɔ maahɔlɔɓo Biblə kaa a hɛɓɛ yii a həɠə Zehova Yálá yəi yai a gu pɛlimun. Yili ɓa yii nɛlɛɛ guɔ ya ɓə gɔlɔn. Yii maanɛɛ gu gɛ yii yaan gu wɛli yɛ too ma, ə lɛɛ yii a pɛli ə kpɔnmaa tɛɛ gu pɔ gu yiipoo yii kpɛɛ ho ma hɔlɔɓo a mo guɔ.
1. Zehova a haɠakpɔn mɛni kaa ləi ?
Haɠakpɔn mɛni kaa a Zehova ŋɔ mɛinɛɛ yii aa gɛ húlulɔ nua diɛ. Mɛinɛɛ tii ɓə a gɛ hulɔnu da nɛɛnu diɛi daa húlulɔ diɛ pɛli longaai, ə lɛɛ diɛ pɛli di wɔ wɛlikɛmaalaa lɛi di kee ni diɛ. Yili ɓə a gɛ Biblə yɛ kɛ ma : “ Ə́ ɲaanɛɛ kulɔ ka ə́ laŋa nɛa ” (Hanwon 5:18, 19). Zehova kaa bɔ hulɔnu da nɛa di kɛ a di təlimoɔ di kee ɓa, ə lɛɛ di ta di ho wɛlimɛni maanɛŋɛn ɉəɠə (Hebreu 13:4 ɓo, Ɉɛɓɛ yili ninɛ).
2. Da kɛ ma wɛlimɛni maanɛŋɛn vilɛnŋaa lə ɓa ?
Biblə kaa kɛi ma “ wɛli hon nua, yili mukulaa ɓaa nuai da wɛlimɛni maanɛŋɛn ɉəɠə, di ta lɔpee heei ho Yálá nwɔ tɔɔlaai hu ” (Korɛntə dɔlɔɔ 6:9, 10). Grɛkə-woo hu da kɛ wɛlimɛni maanɛŋɛn ma pornéïa. Pornéïa mukulaa hwilɛnŋaa mɛni haaɓai ŋɛi ɓa. 1) nuai da haɠakpɔn a diɛi húlu ho di lowai, 2) hinaai da laa a di keeni awala kɛtii nɛaai da laa a di keeni, 3) nuai da laa a taatɛlɛɛ. Gwa gu “ yee kulɔ maaliɓiti túwɔ́ hu, yili mukulaa ɓaa gu gu yee kulɔ wɛlimɛni maanɛŋɛn ɉu, ” gwa yili pulu mɛinɛɛɠaa hɔlɔɓo ə lɛɛ gu wɛli a too Zehova ɓa (Tesalonikə dɔlɔɔ 4:3).
Ə́ WƆ MƐNIKƆLƆNŊAA TA PƐLƐ MA
Gaa pələi ya pɛli pui la wɛlimɛni maanɛŋɛn dɔwɔ ə lɛɛ pələi ya pɛli yili pulu mɛinɛɛɠaa hɔlɔɓoi la.
3. Pu wɛlimɛni maanɛŋɛn dɔwɔ
Ɉosɛfə ə kɛ a hulɔnon da yii da Zehova di wɔ ɓəlannaa huwala-walaa kɛ kpɔ kɛnɛ. Ə tɔɔ a nwanai kpɔ a neelee yɛ pɛli lənəi nɛɛnu ta woo ɓa yii kɛ bɔ da yaa di laa. Gɔwɔtɔɔi 39:1-12 ɓo, ə lɛɛ ka lono kɛ gɛɛmaalənŋaa ŋɛi mɛi :
-
Lə mɛni ɓə gɛ Ɉosɛfə yɛ pu nɛɛnui tii tɔwɔ ? (Nwookpuɔ 9 kaa).
-
Pui tii Ɉosɛfə ə mo ə́ wɔ kili ɓa mɛni lɛlɛɛ ɓə tii ə gɛi ? Lə mɛni ɓa ə́ kaa moi tii ?
Háákələi, muhəɠəninɛɠaa da pɛli pui ləi wɛlimɛni maanɛŋɛn dɔwɔ yɛ pələi Ɉosɛfə ə gɛ la ? VIDIO kaa.
Zehova kaa bɔ nu lɔpee gəlee ə maakwea wɛlimɛni maanɛŋɛn ma. Korɛntə dɔlɔɔ 6:18 ɓo, ɉɛɓɛ yili ninɛ hu, ə lɛɛ ka lono kɛ gɛɛmaalənŋaa ŋɛi mɛi :
-
Mɛni ləkɛɛɠaa ɓə a pɛli ə nu too wɛlimɛni maanɛŋɛn ɉəɠɛɛ hu ?
-
Ya pɛli pui ləi wɛlimɛni maanɛŋɛn dɔwɔ ?
4. Ya pɛli ə́ tɔɔ kpaan ɲaahɛn mɛni hu
Lə ɓə a gɛ, gɛ laa hwa nɛɛ nu yɛ pɛli tɔɔi kpaan wɛlimɛni maanŋɛn ɉəɠɛɛ ŋɔ ɲaahɛn mɛni hu ? VIDIO kaa, ə lɛɛ ka lono kɛ gɛɛmaalən ŋɛi mɛi.
-
Nan non ɉulɔnui ŋɛi vidio hu, ɓɛlowai ə ɲaakaa la yɛ ma ŋɔ kiliŋahiɛɠaa ə lɛɛ da duwɔ pələɠaa a pɛli ə gɛ hwa lɛɛ a dəlimoɔ nɛa ɓa lə ɓə ə gɛ ?
Ə ma kɛ nuai di təlimoɔ Yálá ɓa diɛ kpɛliman a kɛ a lowai taɠaa diɛ di ɲaa wala ə gɛ di wɔ kiliŋahiɛ maa ə lɛɛ a ɉəɠɛɛ. Lə ɓə ya pɛli gɛi yii yaan hó kɛ lɔ ma yɛ́ ə́ kiliŋahiɛ mɛni ɲɔnwɔɔɠaa diɛ ? Filipə 4:8 ɓo Ɉɛɓɛ yili ninɛ hu, ə lɛɛ ka lono kɛ gɛɛmaalənŋaa ŋɛi mɛi :
-
Mɛni ləkɛɛ ɓə maanɛɛ guɔ gu kiliŋahiɛ ma ?
-
Gwa kɛi gu wɔ lowai kɛnɛ həɠə Zehova ŋɔ kólói kɛ mɛni hu, ə lɛɛ guɔ Biblə ɓo yili a kpɔnmaa tɛɛ ləi gu pɔ guɔ pɛli tɔɔi kpaan ɲaahɛn mɛni hu ?
5. Zehova ŋɔ tɔnŋaa lɛlɛɛi guɔ
Yii kpɔ bɛliɛ ɉu gu maamɛni ɓa Zehova ə gɔlɔn. Yii gwa pɛli gɛi gu maa ə lɛɛ a ɉəɠɛɛ gu túwɔ́ pələɠaa hu a ɉukulɔ guɔ, ə lɛɛ mɛinɛɛɠaa gwa pɛli gu ɉɔlɔɓo yili hu. Hanwon 7:7-26 awala kɛtii VIDIO kaa, ə lɛɛ ka lono kɛ gɛɛmaalənŋaa ŋɛi mɛi.
-
Ɉulɔnon ŋɛi ə́ too ləi ɲaahɛn mɛni hu ? (Hanwon 7:8, 9 kaa).
-
Wɛlimɛni maaŋɛn ɉəɠɛɛ pulu mɔnɔɠaa ɲaanwanaai kpɔ kɛnɛ yɛ pələi Hanwon 7:23, 26 a nɛ la. Gwa lɛɛ a gu maahəɠɛɛ gu túwɔ́ pələɠaa hu mɛni ləkɛɛɠaa ɓə gwa pɛli maa laai ?
-
Gu wɔ kiliŋahiɛ maa a kɛ a ɉəɠɛɛ yili a kpɔnmaa tɛɛ ləi gu pɔ, guɔ pɛli yɛnɛɛ yii kpɛɛ ho ma hɔlɔɓoi ?
Hulɔnu a kɛi laa a məlan ɉulɔnu awala kɛtii nɛɛnu yɛ laa a məlan nɛɛnu, gɛ mɛni ɓa Biblə hwa hwaa yili ɓa nutaɠaa da yili kaa a wɛlikpɛɛmaalaa. Kəlaa, Zehova ŋɛi a wɛlikɛmaa Yálá gaa bɔ nu lɔpee gəlee ə yiipoo yii kpɛɛ ho ma hɔlɔɓo. Ə gɛ guɔ pɛli yiipoo yii kpɛɛ ho ma hɔlɔɓoi, maanɛɛ gu Zehova ŋɔ tɔnŋaa pɔ túwɔ́ɓo. Korɛntə dɔlɔɔ 6:9-11 ɓo, Ɉɛɓɛ yili ninɛ hu, ə lɛɛ ka lono kɛ gɛɛmaalən ŋɛi mɛi :
-
Hulɔnu a kɛi laa a məlan ɉulɔnu awala kɛtii nɛɛnu yɛ laa a məlan nɛɛnu, duwɔ pələ tɔnɔi tii lɔ ɓə nwɛli kpɛɛ Yálá ɓa ?
Ə gɛ gu wɛli yɛ pɛli tooi Yálá ɓa, maanɛɛ gu tɛi-tɛi kəlee gu gu túwɔ́ pələ maahwalən. Yili kaa mɔɔn a mɛni yii kpɔ maanɛɛ gu gɛ ? Maatɛnɛ 19:9, 12 ɓo [19:8, 11, NWT] ə lɛɛ ka lono kɛ gɛɛmaalən ŋɛi mɛi :
-
Ə́ wɔ kili ɓa Zehova ŋɔ tɔnŋaa pɛliɛ ɉu ? Lə mɛni ɓa ə́ kaa moi tii ?
Zehova aa kpɔnmaa tɛɛ nu tamaa pɔ diɛ pɛli ŋɔ tɔn-nwooɠaa pɔ tuwɔɓoi. A pɛli kpɔnmaa tɛɛi yɛ́ kpɛliman ə́ pɔ.
NUTAƓAA DA KƐ KƐI MA : “ Akɛ nu hweelɛ wɛli kaa di keeni diɛ mɛni ɲɔnwɔɔ hwaa di laa a di keeni. ”
-
Da mo tii yɛ́ ə́ kaa pai kɛi ma lə ?
YII GU GALAN
Haɠakpɔn mɛni kaa a Zehova ŋɔ mɛinɛɛ yii aa gɛ hɔlɔnu da nɛɛnu yii daa húlulɔ diɛ.
Nɛɛ ə́ kili pɔ
-
Túwɔ́ pələ ləkɛɛɠaa ɓə gaa a wɛlimɛni maanɛŋɛn ?
-
Lə ɓə a pɛli kpɔnmaa tɛɛ gu pɔ gu ho too wɛlimɛni maanɛŋɛn ɉu ?
-
Gwa lɛɛ Zehova ŋɔ tɔnŋaa mu mɛinɛɛ ləkɛɛɠaa ɓə gwa ɉɔlɔɓo ɉu ?
MƐNI TAKPƐLIƓAA
Gaa lə mɛni ɓa hulɔnu da nɛɛnu yii di kaa ɓɔ di kɛ di kee ɓa maanɛɛ di húlulɔ.
Hinaai da laa a di keeni awala kɛtii nɛaai da laa a di keeni gaa lə mɛni ɓa yii Biblə a mo yɛ hwilɛn na diɛ, yili hwa nɛ yɛ ma maanɛɛ gu nuai tii wɛli kpɛɛ guɔ.
Yálá ŋɔ tɔn-nwooɠaai vilɛnŋaa haɠakpɔn mɛni ɓa, gaa pələi a gu maakpɛ la.
Hulɔnu ta yii da məlaa hinaa di kɛi laa, ŋɔ pɔlɔkiliinŋaa kaa, yɛ́ pɛli gaai yii gɛ yɛ duwɔ pələ maahwalən nwɛli yɛ pɛli tooi Yálá ɓa. Ŋɔ pɔlɔkiliinŋaa mɛiwoo ka “ Di ɉón a maahwiɛlaa. ”
“ Biblə a nua di wɔ yɛnɛɛ maahwalən ” (La Tour de Garde, 1er avril 2011)
a Pornéïa mukulaa hwilɛnŋaa lɔ nwɔnɔ duwɔ pələɠaa ŋɛi diɛ : A pɛli ə kɛ nua diɛ di laa pɛlɛ di keeni ɲɛitɔwɔ ɓa, a pɛli ə kɛ nua diɛ haɠakpɔn di pulupələ, a pɛli nwɔnɔ ə kɛ diɛ di keeni ɲɛitɔwɔ yɔwɔɔn.
