Kà lèlà May 24, 2022, kà agẹ bá pọ́lọ́ nu beè naaá mm̀ ńkem̀ boǹ Uvalde, ea di Texas, U.S.A. Núíz pẹpà ea kọlà The New York Times, kọ́ọ̀ “ene kà gbálà beè tã́ náa fẹẹmá 19 gbò pá nvín nè bàà kà neǹ dòbá . . . gbẹá Robb Elementary School.”

 À dú pọ́lọ́ kọọ̀ íb gbò pọ́lọ́ nuí ólò naaá tọọ̀ kpá lee. Núíz pẹpà ea kọlà USA Today kọ́ọ̀ áá mm̀ United State, “ba beè tãa nú ea é dú 249 nen gbẹá boo beè tọọ̀ kpá gbáá e aà m-má​—ea el ní e bà ólò tãá kọ̀láá gbáá lọ̀l gé mm̀ gbáá 1970 a.”

 Éé ní ea náa vaá gbò pọ́lọ́ nuí gé nááá ẽ́? Mósĩ́ deè ní eé láá ĩ̀ìmà kèbá gbò dìtõ̀òí ẽ́? É kọọ̀ è íè ból dẽesĩ́ kọọ̀ dùm gboo-gboo ló é beè iná kùbmà? Kpá Káí áálá gbò bíbví.

•    Kpá Káí baatẽ́ tṍó e dìí naamá “gbò dee e tṍó é gé tà,” tṍó e “bà náa é tó sàn nen” vaá gbò nen é “sí bàg,” bàé sí agẹ-agẹ bá pọ́lọ́ vaá tõó dùm gboo-gboo ló. Gbò e bà gé lábví gbò pọ́lọ́ lábví “é kil sĩ́ gè kpáá dú pọ́lọ́ èl bé e bà dì naa.” (2 Tìmotì 3:​1-5, 13) Kọbé ò kpáá nyimá bọ̀ọ̀vẹ̀, bugi togó bel ea kọ́ọ̀ “É Kọọ̀ Kpá Káí Beè Gbẹẹ́ Sĩ́ Kọ́ Nú Ea Kil Ló Bé E Gbò Nen Gé Bugi Togó Vaá Labví Láb Naá Deè Nieí?”

 Gã́bug nen é láá bĩiná kọọ̀, ‘Éé ní ea náa Bàrì náa kpeg gbò pọ́lọ́ nú ea dì belí gè tã́ náa gbàà gbò e bà di tọọ̀ kpá kọ á gá naaá ẽ́?’ Kọbé ò nyímá bé e Kpá Káí áálá naa, bugi togó bel ea kọ́ọ̀ “Éé Ní Ea Náa Pọ́lọ́ Nu Ólò Naaá Ló Gbò Lé Nen Ẽ́?”

•    “Kọ̀láá kà nu e ba è emí m Kpá Káí, ba è emí mm̀ ge dòòmà bá nu nè beele, kọbé tení dú ló . . . ge siá kpóó ló e Kpá Káí néi, è láá ié ból dẽesĩ́.”​—Róm̀ 15:4.

 Gbò nòòkúu ea di mm̀ Kpá Káí é láá nvèè bá nè ni kọ ó ĩ̀ìmà kèbá dùm gboo-gboo ló ea di mm̀ bàlà booí. Ẹ̀b Awake! ea togó bel kọ́ọ̀ “Will Violence Ever End?” kọbé ò kpáá dã́ bọ̀ọ̀vẹ̀.

 Kọbé ò íe lọ̀ọ̀gà bug ea kil ló bé e gbò tẹ̀ nè gbò kà é láá nvèè bá nè ba gbò nvín naa kọ bàá ié àgẹ ló kilma ló gbò nu pọ̀ ea gé nááá, bugi togó bel ea kọ́ọ̀ “Gbò Kpẹ̀a Ea Síìmà Pọ̀ Nen Nè Pá O Nvín.”

•    “Àé áálá va lọl kèbá nàà uú boo nè dùm gboo-gboo ló.”​—Psalm 72:14.

•    “Bàé kiilà ba gẹ̀ bé naamá nu gè kã̀àmà nu vaá kììà ba sòbá naamá nu gè siimá tóm. Dó náa é dalà nà ba gẹ̀ bé boo béè ge naamá uú boo dõòna kà dó, àbèè kọọ̀ bàé kpáá nó bé.”​—Máíkà 4:3.

 Bàrì é náa nú e gbò nen náa é láá naa. A Boǹ Méné ea é dí káálá é kyọsĩ́ kọ̀láá kà nuù bé vaá nvèè kùbmà ló dùm gboo-gboo ló. Kọbé ò kpáá nyimá gã́bug nú ea kil ló gbò nú e Boǹ Méné Bàrì é náa, bugi togó bel ea kọ́ọ̀ “ ‘Fẹ́ẹ́-fẹẹ̀ Ló É Dí Kọ̀láá ketõ̀ò’ Mm̀ Boǹ Méné Bàrì.”