1. Éé ní e Jìhóvà gbĩ́ kọ dénè nen á naa ẽ́?

 JÌHÓVÀ ne dì pọ́ì kọ̀láá nen. È ólò tú dì pọ́ìá siimá tóm kọ̀láá tṍó e gé ne béèlàfùl. Ge kìn lóó nè Jìhóvà vaá dũunà pá a tọ e bà gé fã́e ní ea dú kà pọ̀b kà béèlàfùl e nen é láá nèe. Jìhóvà gbĩ́ kọ dénè nen á naa vó. Ló éé? Boo béè kọ à vulèi vaá à gbĩ́ kọ é naa nú ea é léeí ló. À gbĩ́ kọ é ié lé gbaa ló kìlmàe ló vaá tõó dùm dọ̀ dè-dè.​—Dìt. 30:​19, 20; Gàl. 6:​7, 8.

 2. Éé ní e Jìhóvà gbĩ́ kọ gbò e ba beè sí agẹbá pọ́lọ́ vaá bà gáà ọga á naa ẽ́? (1 Jọ́ọ̀n 2:1)

² Náa kal ló béè kọọ̀ Jìhóvà náa ólò tú bá kpóó siimá nen kọ á fãàe. À sọtọ́ deè kọ nen á nè béèlàfùl boo nú ea é náa. Èé kọ́ vàẹ beè nen ea beè diia múú sí agẹbá pọ́lọ́ ẹ́? Be náa ọ́gá, bà é kpóe lọl mm̀ bõ̀ònatõ̀ò. (1 Kọ́r. 5:13) Náa kal ló béè vó, Jìhóvà ẹbmà dẽe kọọ̀ nen ea beè sí pọ́lọ́ á ọgá vaá fãàe. Kàsĩ́, níà pọ̀bkà bug ea náa vaá a beè nèi nu ààa ẹ́, kọbé à láá ia ló nè gbò e bà sí pọ́lọ́ vaá bà ọgá. (Bugi 1 Jọ́ọ̀n 2:1.) Jìhóvà palàge vùlèi, vaá à gé ban gbò e ba beè sí pọ́lọ́ kọ bàá ọgá.​—Zèk. 1:3; Róm̀ 2:4; Jém̀z 4:8.

 3. Éé ní eé ló bel boo mm̀ nakà togó bel ge nòí ẽ́?

³ Jìhóvà kọ́ íb tọa ló ea ólò ié tṍó e nen sí pọ́lọ́, nè bé ea ẹb gbò e bà sí agẹbá pọ́lọ́ naa. À gbĩ́ nágé kọ é ẹ̀b nu belí bé e ẹlẹ ẹb nu naa. Mm̀ nakà togó bel ge nòí, èé ló bel boo gbò sĩ́deè eé láá naamá vó. Boo tṍó e gé nó togó  belí, nvèè kpíi ló (1) bé e ba beè sẹlẹ nen ea beè di mm̀ bõ̀ònatõ̀ò ea beè di Kọ́rìnt mm̀ túá gbò gbááá ea beè sí agẹbá pọ́lọ́ naa, (2) dùùlà bá deè tṍ e Pọ́ọ̀l beè nè tṍó e nen ea beè sí agẹbá pọ́lọ́á ọ́gá, nè (3) nú eé láá nó lọl ló bé e Jìhóvà ólò ẹ̀b gbò e bà sí agẹbá pọ́lọ́ naa.

BÉ E BA BEÈ SẸLẸ NEN EA SÍ AGẸBÁ PỌ́LỌ́ EA BEÈ DI MM̀ BÕ̀ÒNATÕ̀Ò EA BEÈ DI KỌ́RÌNT MM̀ TÚÁ GBÒ GBÁÁÁ NAA

 4. Éé ní ea beè naaá mm̀ bõ̀ònatõ̀ò ea beè di Kọ́rìnt mm̀ túá gbò gbááá ẹ́? (1 Kọ́rìnt 5:​1, 2)

⁴ Bugi 1 Kọ́rìnt 5:​1, 2. Ní ea égè taà tóm e Pọ́ọ̀l géè kọ́ kpẹ̀a aa dó dọ dọ́, a beè dã́ pọ́lọ́ kpẹ̀a ea kil ló nú ea nááá mm̀ ãa bõ̀ònatõ̀ò e ba beè nvee Kọ́rìnt. Ene kà vígà págbálà ea beè di bõ̀ònatõ̀òa beè kuná vaà a tẹ̀. Nú ea náa ã́ beè palàge dú pọ́lọ́ naa ní e “bã̀àna gbò e bà náa nyímá ló Bàrì náa é tom gè naa”! Sõò gbò e ba beè di mm̀ bõ̀ònatõ̀òa náa beè ẹ̀b kọ à bọ́ló gè kpó vígà págbálàa lọl mm̀ bõ̀ònatõ̀ò. Be à sẹlẹ, sìgà ọ̀và beè ẹ̀b kọ bà gé zógèè kọ bà íèè sàn nyíe belí Jìhóvà. Sõò Jìhóvà náa ólò sọ̀tọ́ deè kọọ̀ neǹ pọ́lọ́ á tõó zẹ̀ẹ̀ pá a gbò. Àé láá dú kọọ̀ pọ́lọ́ láb e vígà págbálàa beè labví beè bọọ́ ló bã̀àna gbò e bà náa ólò fã̀ Jìhóvà, naa ní e bà ló pọ́lọ́ bel kilma ló bõ̀ònatõ̀ò Bàrì. Be bà náa kpóe lọl mm̀ bõ̀ònatõ̀ò, àé láá kyọ̀ dõona gbò. Vóà naa, éé ní e Pọ́ọ̀l beè kọọ̀ gbò e ba beè di mm̀ bõ̀ònatõ̀òa á naa ẽ́?

 5. Éé ní e Pọ́ọ̀l beè kọ gbò e bà di mm̀ bõ̀ònatõ̀òa á naa ẽ́, vaá éé ní e nú ea beè kọ̀a tõó dọ̀ ẹ? (1 Kọ́rìnt 5:13) (Ẹ̀b nàgé fòtó.)

⁵ Bugi 1 Kọ́rìnt 5:13. Kèbá tùle nyómá káí Bàrì, Pọ́ọ̀l beè emí kpá lẹ̀ẹ̀la tóm má gbò e ba beè di mm̀ bõ̀ònatõ̀ò ea beè di Kọ́rìnt, kọ bàá kpó nen ea sí pọ́lọ́ vaá náa ọ́gáá lọa zẹ̀ẹ̀ va. Móbá ní ea beè bọ́ló kọ gbò e ba beè di mm̀ bõ̀ònatõ̀òa á sẹ̀ẹ̀màè ẽ́? Pọ́ọ̀l beè kọ́ nè va kọọ̀ ‘bàá gá gbaaá ló tọ́ọ̀ nen’ ea dì belí vó. Éé ní e Pọ́ọ̀l géè kọ̀ ẹ? Pọ́ọ̀l beè baatẽ́ kọọ̀ bàá ‘gá zẹ́ẹ́ zọ̀ nen ea di naa vó deá gyã́á.’ (1 Kọ́r. 5:11) Ge zọ̀ nen deá gyã́á é láá naa kọ ó zọ̀ nená loá bel vaá zọ̀ẹ naaá nu. À dọa bàlà kẽ kọ Pọ́ọ̀l géè kọọ̀, gbò e bà di bõ̀ònatõ̀òa á gá zọ̀ nená naaá nu. Ge naa vó é náa kọ nená á gá kyọ̀ dõona gbò e bà di bõ̀ònatõ̀òa. (1 Kọ́r. 5:​5-7) Gbá ló vó, be bà náa zọ́ẹ naaá nu, àé náa kọ á nyimá kọọ̀ a beè siè kà agẹbá pọ́lọ́, vaá vó é láá nvèè bá nèe kọ á ọgá.

 6. Éé ní e gbò e ba beè di mm̀ bõ̀ònatõ̀ò ea beè di Kọ́rìnt beè naa tṍó e Pọ́ọ̀l émí kpá lẹ̀ẹ̀la tóm má va ẹ́, vaá éé ní e gbálà ea beè sí pọ́lọ́á beè naa ẽ́?

 ⁶ Tṍó e Pọ́ọ̀l lẹẹlà kpá lẹ̀ẹ̀la tómá má bõ̀ònatõ̀ò ea beè di Kọ́rìnt lọ̀l, a beè gbóó bugi togó boo bé e gbò e bà di mm̀ bõ̀ònatõ̀òa é lábví láb naa. Sõò nú e Táítọ̀s beè kó nè Pọ́ọ̀l beè ẹẹlẹ̀ẹ nyíe. Gbò e ba beè di mm̀ bõ̀ònatõ̀òa beè tú nú e Pọ́ọ̀l beè emí mm̀ kpá lẹ̀ẹ̀la tómá siimá tóm vaá kpó nen ea beè sí pọ́lọ́ vaá náa ọ́gáá lọa zẹ̀ẹ̀. (2 Kọ́r. 7:​6, 7) Sìgà ẽ́ aa ló tṍó e Pọ́ọ̀l beè lẹ̀ẹ̀là kpá lẹ̀ẹ̀la tómá má va, gbálà ea beè sí pọ́lọ́á beè gbóó ọgá. A beè nyaaná bé ea ólò tõó dùm naa, vaá dààmà togó gè tõó boo nòòkúù lé lab dògò Jìhóvà. (2 Kọ́r. 7:​8-11) Éé ní e Pọ́ọ̀l beè gbóó kọ́ nè gbò e bà di mm̀ bõ̀ònatõ̀òa kọ bàá naa ẽ́?

 BÉ E GBÒ E BA BEÈ DI MM̀ BÕ̀ÒNATÕ̀ÒA BEÈ SẸLẸ NEN EA BEÈ SÍ PỌ́LỌ́ VAÁ À ỌGÁ NAA

 7. Mókà lé nu ní ea beè naaá boo béè kọ bà kpó gbálà ea beè sí pọ́lọ́á lọl mm̀ bõ̀ònatõ̀ò ẽ? (2 Kọ́rìnt 2:​5-8)

⁷ Bugi 2 Kọ́rìnt 2:​5-8. Pọ́ọ̀l beè kọọ̀ ‘kpọ̀té e gã́bug ọ̀và née [a] gbõomáé ló.’ Níí tõó dọ̀ kọọ̀ ge kpó nená lọl mm̀ bõ̀ònatõ̀ò beè naa kọ á nyimá kọọ̀ à dú bíi kọ á ọgàẹ̀. Vaá tã́gíní bé ea ni ọ́gáá, náa dú bíi kọ bàá kpáá nèe kpọ̀té.​—Híb. 12:11.

 8. Éé ní e Pọ́ọ̀l beè kpáá kọ́ nè gbò e ba beè di mm̀ bõ̀ònatõ̀òa kọ bàá naa ẽ́?

⁸ Pọ́ọ̀l beè kọ́ nè gbò e bà di mm̀ bõ̀ònatõ̀òa kọọ̀: “Gbóó iai ló neíe vaá ò neíe agẹ nyíe, naanii ní ea é nyímá kọ kà-kà gé mè ò vulèìe.” Nvèè kpíí ló kọọ̀ níì áá gè tú gbálàa ní e Pọ́ọ̀l beè kọ́ nè gbò e ba beè di mm̀ bõ̀ònatõ̀òa kọ bàá naa ẽ́ nì, sõò a beè gbĩ́ kọ gbálàa á nyimá kọọ̀ baa iàẹ̀ ló neèe nè ge kọ bà vulèèe tení dú ló bel e bà ló nè láb e bà lábví. Vó é náa kọ gbálàa á agala boo kọọ̀, ge kọ à kpáá fãè Jìhóvà náa kọ nyíè gbò e bà di bõ̀ònatõ̀òa á ẹẹ.

 9. Éé ní ea náa vaá be à sẹlẹ a beè tavala ló sìgà gbò gè ia ló nè gbálà ea beè sí pọ́lọ́ vaá à ọgáá ẹ́?

⁹ É kọ a beè tavala ló sìgà gbò e ba beè di mm̀ bõ̀ònatõ̀òa gè tú lé bá tuumá gbálà ea beè sí pọ́lọ́ vaá à ọgáá? Nòòtẽ́ ea di mm̀ dọ̀ Kpá Káíá náa kọ́ vó. Sõò àé láá dú kọ a beè naaá naa vó, boo béè kọọ̀ a láb beè palàge siimà kẹ́ẹ̀ sìgà gbò vaá naa kọ tã̀àgã̀ á bã mm̀ bõ̀ònatõ̀ò. Be à sẹlẹ, a beè tõo nagé ló sìgà pá vígà e ba beè pììgà ge gbàntṍ ló Jìhóvà kọ náa bọ́ló gè kpáá tú nen ea sí íb agẹbá pọ́lọ́á nvee mm̀ bõ̀ònatõ̀ò. (Doolé ló Lúùk 15:​28-30.) Sõò éé ní ea náa vaá a beè bọ́ló kọ bàá zogè kọ bà vulèè gbálà ea beè sí agẹbá pọ́lọ́ vaá à ọgáá ẹ́?

10-11. Éé ní ea gáẹ̀ beè láá naaá beè gbò kànen e ba beè di mm̀ bõ̀ònatõ̀òa náa beè ia ló nè gbálà ea beè sí pọ́lọ́ vaá à ọgáá ẹ́?

¹⁰ Dòòmà dẽe ló nú ea gáẹ̀ beè láá naaá beè gbò kànen náa beè tú gbálà ea beè sí pọ́lọ́ vaá à ọgáá nvee mm̀ bõ̀ònatõ̀ò. Àbèè bé ea gáẹ̀ láá tõó ló gbálàa naa beè gbò e ba beè di mm̀ bõ̀ònatõ̀òa náa beè zogè kọ bà vulèe tṍó e bà túe. Nyíè gbálàa gáẹ̀ palàge “bììlà.” À gáẹ̀ beè láá tõó ẽ́ ló kọọ̀ náa é láá fã nàè Jìhóvà. À gáẹ̀ láá àà nàgé ló gè naa gbò nú ea é náa kọ á zọ̀ Jìhóvà ié lé gbaa ló.

¹¹ Ní ea palàge dú pọ́lọ́ dú kọọ̀, beè pá vígà e ba beè di mm̀ bõ̀ònatõ̀òa náa beè ia ló nè gbálàa, bà gáẹ̀ beè kyọ̀ ba lé gbaa ló kilma ló Jìhóvà. Ló éé? Boo béè kọ bà náa nó bé e Jìhóvà ólò ia ló nè gbò e bà ọ́gá ló ba pọ́lọ́ naa, tãa vó bà nó Sétàn e náa ólò ié sàn nyíe. Sétàn gáẹ̀ tú va siimá tóm, vaá vó gáẹ̀ beè naa kọ gbálàa á gá fã̀ nà Jìhóvà.​—2 Kọ́r. 2:​10, 11; Ẹ́fẹ. 4:27.

12. Mósĩ́ deè ní e gbò e ba beè di mm̀ bõ̀ònatõ̀ò ea beè di Kọ́rìnt beè nó Jìhóvà ẹ?

¹² Mósĩ́ deè ní e gbò e ba beè di mm̀ bõ̀ònatõ̀ò Kọ́rìnt beè nó Jìhóvà tãa vó e bà nó Sétàn ẽ? Ba beè naa vó tení dú ló gè nó bé e Jìhóvà ólò tú lé bá sẹ̀ẹ̀mà gbò e ba beè sí pọ́lọ́ vaá bà ọgá naa. Nvèè kpíí ló nú e sìgà gbò e ba beè emí Kpá Káí beè kọ́ kilma ló Jìhóvà. Dévìd beè kọọ̀ “Ò dúù lé e Jìhóvà, vaá di kpènà ló gè ia ló pọ́lọ́.” (Ps. 86:5) Máíkà beè emí kọọ̀: “Mókà Bàrì ní ea bélí olo é, ea ólò ia ló lọ̀ nè pọ́lọ́ pá a gbò e bà sígá ẹ́?” (Máí. 7:18) Àìzáíà beè emí kọọ̀: “Neǹ pọ́lọ́ á òòà aa ló a sĩ́deè tõò dùm, vaá à nyááná a  bug; á òòa kẽ dú ló Jìhóvà, mè àé íée sàn nyíé ló, á òòa kẽ dú ló bẹẹ Bàrì, boo béè kọ àé ia ló a pọ́lọ́ nèe.”​—Àìz. 55:7.

13. Éé ní ea náa vaá a beè bọ́ló kọ gbò kànen á tú gbálà ea beè sí pọ́lọ́ vaá à ọgáá nvee mm̀ bõ̀ònatõ̀ò ẽ? (Ẹ̀b ńkpó ea kọ́ọ̀ “ Mó Tṍó Ní E Ba Beè Tú Gbálà Ea Beè Sí Pọ́lọ́ Vaá À Ọgáá Nvee Mm̀ Bõ̀ònatõ̀ò Ea Beè Di Kọ́rìnt E?”)

¹³ Kọbé bà láá nó Jìhóvà, a beè dú bíi kọ gbò e ba beè di mm̀ bõ̀ònatõ̀ò ea beè di Kọ́rìnt á tú lé bá tuumá gbálà ea beè sí pọ́lọ́ vaá à ọgáá, vaá zogè kọ bà vulèe. Pọ́ọ̀l beè kọ be bà ia ló nè gbálà ea beè sí pọ́lọ́ vaá à ọgáá bà é zógè kọ bà ‘gbantṍ ló dùùlà bá deè tṍ.’ (2 Kọ́r. 2:9) À dú kà-kà kọọ̀ sìgà ẽ́ beè tení aa ló tṍó e ba beè kpó gbálà ea beè sí pọ́lọ́á lọl mm̀ bõ̀ònatõ̀ò, sõò kọ̀bèl e ba beè nèeá beè naa kọ á ọgá. Vóà naa, náa beè dú bíi kọ gbò kànen á pee tṍó ló gè túe nvee mm̀ bõ̀ònatõ̀ò.

BÉ EÉ LÁÁ NÓ BÉ E JÌHÓVÀ ÓLÒ BEELÁ BEL BOO BÁ EA BỌ́LÓ VAÁ IÉ SÀN NYÍE NAA

14-15. Éé ní e nóò lọl ló nú ea beè naaá mm̀ bõ̀ònatõ̀ò ea beè di Kọ́rìnt e? (2 Pítà 3:9) (Ẹ̀b nàgé fòtó.)

¹⁴ Ba beè emí nòòtẽ́ ea kil ló bá e ba beè sii ló nú ea beè naaá mm̀ bõ̀ònatõ̀ò ea beè di Kọ́rìnta “mm̀ ge dòòmà bá nu nè beele.” (Róm̀ 15:4) Nòòtẽ́á náa kọ é nyimá kọọ̀ Jìhóvà náa ólò aa ló gbò e bà sí pọ́lọ́ vaá bà náa ọ́gá gbẹẹ́ mm̀ a  bõ̀ònatõ̀ò. Sìgà gbò é láá bugi togó kọọ̀ boo béè kọ Jìhóvà dú Bàrì ea íe sàn nyíe, àé sọbá gbò e bà sí pọ́lọ́ vaá bà náa ọ́gá gbẹẹ́ mm̀ bõ̀ònatõ̀ò. Sõò Jìhóvà náa ólò zogè a sàn nyíe naa vó. Náa kal ló béè kọ Jìhóvà ólò ié sàn nyíe, náa ólò sọ̀tọ́ deè kọ gbò e bà di mm̀ a bõ̀ònatõ̀ò á labví kọ̀láá íb láb ea léémá va. Níí dú boo béè kọọ̀, a nòòkúu ea kil ló lé nè pọ́lọ́ náa ólò nyaaá. (Júùd 4) Beè Jìhóvà sọtọ́ deè kọọ̀ nen ea sí pọ́lọ́ vaá náa ọ́gá á gbẹá mm̀ a bõ̀ònatõ̀ò, náa é zógè kọ à íe sàn nyíe boo béè kọọ̀ ge naa vó é láá kyọ̀ dõona gbò.​—Pró. 13:20; 1 Kọ́r. 15:33.

¹⁵ E nó nágé kọọ̀ Jìhóvà náa gbĩ́ kọ tọ́ọ̀ nen á ié kyọ̀àsĩ́, sõò à gbĩ́ kọ dénè nen á dùùà. À ólò ié sàn nyíe kilma ló gbò e bà ọ́gá ló ba pọ́lọ́ vaá gbĩ́ gè ié lé gbaa ló kìlmàé ló. (Èzí. 33:11; bugi 2 Pítà 3:9.) Vóà naa, tṍó e gbálà ea beè di mm̀ bõ̀ònatõ̀ò ea beè di Kọ́rìnta ọ́gá ló a pọ́lọ́, Jìhóvà beè tú neǹ tóm Pọ́ọ̀l kọọmá nè gbò e ba beè di mm̀ bõ̀ònatõ̀òa kọ bàá ia ló nèe vaá túe.

16. Bá e ba beè sii ló nú ea beè naaá mm̀ bõ̀ònatõ̀ò ea beè di Kọ́rìnta tọ́a ní ló naa vàẹ?

¹⁶ Nú ea beè naaá mm̀ bõ̀ònatõ̀ò ea beè di Kọ́rìnta nveè bá nèi kọ é nyimá bé e Jìhóvà íe vulè, dú lé lab dògò, vaá dú Bàrì lé bèèla naa. (Ps. 33:5) Ge nyimá gbò nuí náa kọ á tànii gè kpáá palàge lèèlàẹ. Nyíéi palàge ẹẹ kọ à dú Bàrì sàn nyíe boo béè kọ dénè bẹ̀ì ólò sí pọ́lọ́ vaá è gbĩ́ì kọ á ia ló nèi. Nyíéi palàge ẹẹ nagé kọ Jìhóvà néi nu ààaá, ea náa kọọ̀ á láá ia ló bẹẹ pọ́lọ́. Ge nyimá kọ Jìhóvà vulèi vaá à gbĩ́ kọọ̀ nu á lee ló dénè bẹ̀ì palàge nvèèi nyíé gbàà!

17. Éé ní eé ló bel boo mm̀ togó bel ea bẽene níí ẽ́?

¹⁷ Sõò, èé kọ́ vàẹ kilma ló bá e bà ólò beemá bel ló nen ea sí pọ́lọ́ deè nieí é? Éé ní e gbò kànen mm̀ bõ̀ònatõ̀ò é láá nó lọl ló bé e Jìhóvà ólò nvèè bá nè nen ea sí pọ́lọ́ kọ á ọgá naa ẽ́? Mósĩ́ deè ní ea bọ́ló kọ gbò e bà di mm̀ bõ̀ònatõ̀ò á labví láb tṍó e gbò kànen mm̀ bõ̀ònatõ̀ò bééláfùl ge kpó nen àbèè ge tú nen e ba beè kpó lọl mm̀ bõ̀ònatõ̀ò ẽ? Èé áálá gbò bíbví mm̀ togó bel ea bẽene níí.