Eng, e kaota te bwai ni kakoaua te Baibara ae kakoauaaki raoi iai bwa bon iai te Atua. E kaungaira bwa ti na karikirakea onimakinan te Atua, ti na aki kamatakiaki n aia kewe Aaro, ma ti na kabonganai ‘wanawanara’ ao n “iangoraoi.” (I-Rom 12:1; 1 Ioane 5:​20, kabwarabwara mai nano) Iangoi bukina aika boto i aon te Baibara aikai:

• Bairean raoi te iuniweeti ae karika te maiu e kaotaki iai bwa iai te tia Karikiriki. E taku te Baibara: “E koaua bwa a kateaki auti nako iroun te aomata, ma ane e katei bwaai ni kabane bon te Atua.” (Ebera 3:⁠4) A bebete taeka aikai, ao a bati aomata aika bubura aia reirei aika kunea bwa e rangi n eti. *

• Ngkai aomata ngaira, iai iroura te kan atatai ni kaineti ma manenan te maiu aei, kaanga namakinan te kan amwarake e ngae ngke ti a bon tibwa tia n amwarake. Aei ae nanonna naba te Baibara ni ‘kainnanoan te Atua’ iroura, ae irekereke ma kan ataakin te Atua ao taromauriana. (Mataio 5:3; Te Kaotioti 4:​11) Ngkai iai iroura kan ataakin te Atua, e oti ngkanne bwa bon iai te Atua, ao bon te tia Karikiriki ae tatangira ngaia, ae tangiria bwa ti na kinaa riki.​​—⁠Mataio 4:⁠4.

• Taetae ni burabeti aika bwarabwara raoi aika n te Baibara a boni koreaki imwain te tai are e na koro iai bukia, ao a bon riki n aron are a kaman taekinaki. Etin ao bwarabwaran raoi taian taetae ni burabeti aikai, e a kamatoaaki iai bwa a kairaki korean rongorongo aikai n taamnei ae mwaaka.​​—⁠2 Betero 1:​21.

• Iai otaia i aoni bwain te aonnaba taani korea te Baibara aikai ae a aki ataia kaain aia roro. N te katoto, n taai ake rimoa, a kakoauaa aomata aika bati ae e toka te aonnaba i aon te man, n aron te erebwanti, te beeki , ke te kao. Ni kaitaraan anne, e taekinna te Baibara bwa “e katinetinea te aonnaba i aon te akea” te Atua. (Iob 26:⁠7) N aron naba anne, e kabwarabwaraa n te aro ae mataata te Baibara tein te aonnaba aei bwa e ‘mronron.’ (Itaia 40:22) A bati aika kakoauaa bwa a a kaman atai koaua aika eti aikai taani korea te Baibara, kioina ngkai a boni karerekei aia rongorongo mairoun te Atua.

• E kaekai titiraki aika bati aika kangaanga te Baibara, aeka n titiraki aika ngkana a aki kaekaaki raoi ao a kona ni kaira temanna bwa e na aki kakoauaa te Atua,. N te katoto: Ngkana ngaia bwa e tatangira ao moan te mwaaka te Atua, e aera ngkanne ngkai a riki rawawata ao baika buakaka n te aonnaba? E aera ngkai a a riki Aaro bwa taani kairiri nakon te buakaka ao tiaki te raoiroi?​​—⁠Tito 1:​16.