Tii te taina taekinan te taitai n te Baibara n Nakoaia Ibonga 19:28, ae kangai: “Kam na tai korotaitai i aomi.” E anga te tua aei te Atua nakon te natannaomata ae Iteraera ike a a kaokoroaki iai ma kaain rarikia ake a korei i aon rabwataia araia ke kanikinaeaia atuaia. (Te Tua-Kaua 14:2) E ngae ngke te Tua are a anganaki tibun Iteraera a aki kabaeaki iai Kristian, ma e kakawaki iangoan raoi te boto n reirei ae boutokaa te tua aei.

E riai te Kristian ni korotaitai ke ni korotaamneia rabwatana?

 Ko kona ni buokaki ni kiibu aika oti aikai ibukin iangoan anne:

•   “A riai ni katamaroaia aine n . . . te aro ae riai.” (1 Timoteo 2:9, New American Bible) E kaineti te boto n reirei anne nakoia aine ao mwaane. Ti riai ni karinea aia namakin tabemwaang ao n aki kan taraaki.

•   Iai tabeman ake a taitai bwa a kani karekea kinaakia ke inaomataia, ao tabeman a taitai ibukini kaotan inaomataia i aon rabwataia. Ma te Baibara e kaungaia Kristian ni kangai: “Kam na anga rabwatami bwa te karea ae maiu ae itiaki, ao ae butimwaeaki iroun te Atua, ae te beku ibukin te Atua ma wanawanami.” (I-Rom 12:1) Kabongana ‘wanawanam’ n nenera raoi bukina ngkai ko kan taitai. Ngkana ko kan taitai ibukina bwa ko kakairi irouia aomata ke ko kani kaotia ae ko kaaina te kurubu teuana, uringnga are rimwi riki e kona ni manga bitaki am iango, ma e aki kona ni mauna am taitai. Ataan raoi bukini kani karaoana, e kona ni buokiko ni karaoa te motinnano ae raoiroi.—Taeka N Rabakau 4:7.

•   “A na nakoraoi ana babaire te aomata ae mwakuri korakora, ma a na boni karako aia bwai aomata ni kabane aika taenoa.” (Taeka N Rabakau 21:5) N angiin te tai e ienikuriaki motinnanoan te korotaitai, ma iai mwina ae maan nakon te reitaki ao te mwakuri. E kona ni bobuaka te korotaitai ao ni kammaraki kanakoana. E oti ni mwin te kakaae ao n rikirakeni bitineti ibukini kanakoan te taitai, bwa a mwaiti aomata ake a taitai aika a tibwa iangoia bwa e raoiroi riki ngke a aki korotaitai.