E karikiia aomata te Atua bwa a na wene n taanga tii i marenan te mwaane ao te aine ake a a tia ni mare. (Karikani Bwaai 1:​27, 28; Nakoaia Ibonga 18:22; Taeka N Rabakau 5:​18, 19) E kabuakakaa te wene n taanga i tinanikun te mare te Baibara, e ngae naba ngkana i marenan te mwaane ma te mwaane ke te aine ma te aine, ke tao bon i marenan te mwaane ma te aine. (1 I-Korinto 6:​18) E nanonaki naba iai te wene n taanga, kumekumean ana bwai ni kakariki temanna, ao te oro n te wi ke te iein n te kurabe.

 E ngae ngke e kabuakakaa te mwakuri ae te wene n taanga i marenaia mwaane ma mwaane ao aine ma aine te Baibara, ma e aki kariaia bwa ti na ribaiia aomata aika kakaraoi baikai. Ma e tua te Baibara nakoia Kristian bwa a na “karineia aomata nako.”​—1 Betero 2:​17, Good News Translation.

 E kona ni bungiaki temanna bwa e na tangira raona ni mwaane ke n aine?

E aki kabwarabwaraaki raoi n te Baibara bwa a kangaa aomata aikai n riki n aroia aei, ma e tii kaotia bwa ti bane ni bungiaki ma kani karaoan ae e aki boraoi ma baike e tua te Atua. (I-Rom 7:​21-​25) E ngae ngke e aki kaatuuaki kabwarabwaraan aron rikin te aeka n namakin aei, ma e boni katabuakaki n te Baibara.

 Aroni kakukureian te Atua e ngae ngke iai iroum tangiran te kani wene n taanga ma raom ni mwaane ke n aine.

E taku te Baibara: “Tai tautoronaki ni baika e tangiri rabwatam. Katoka tangiran te aeka ni wene n taanga ae bure.” (I-Korote 3:5, Contemporary English Version) Ngkana ko na katoki tangirani baika bure, aika kairiri nakoni mwakuri aika bure, ko riai ni kaetieta am iango. Ngkana ko kakaona am iango ni baika raraoi, ko na kakai tauraoi riki ni kanakoi tangirani baika bure. (I-Biribi 4:8; Iakobo 1:​14, 15) E ngae ngke ko na bae ni kabokorakora ni karaoan anne n te moantai, ma e na bebete rimwi riki. E berita te Atua bwa e na buokiko ni ‘kabooua nanom ae ngaia ae kaira am iango.’​—I-Ebeto 4:​22-​24.

 A kabokorakora n aron anne mirion ma mirion aomata aika bwarua naba te kani wene n taanga, ma a kani kaboraoi maiuia ma ana kaetieti te Baibara. N te katoto, a motinnanoia naake a tuai n reke buuia aika tao e na kangaanga reken raoia, ke tao naake a tekateka n taanga ma buuia ngkai aika a aki kona ni karaoa te wene n taanga, bwa a na taotaon nanoia n aki ongei kariri ake a boo ma ngaai. A teimatoa ni maeka ma te kukurei, ngaia are e kona naba n riki anne nakoia naake iai irouia tangiran te kani wene n taanga ma raoia ni mwaane ke n aine, ngkana a boni kani kakukureia raoi te Atua.​—Te Tua-Kaua 30:19.