TITIRAKI AIKA KAEKAAKI MAN TE BAIBARA

E ongoraei tataro ni kabane te Atua?

E ongoraei aia tataro aomata man natannaomata te Atua. (Taian Areru 145:​18, 19) Ti kaungaaki n Ana Taeka ae te Baibara bwa ti na kaotii nakoina bwaai ni kabane aika ti raraomaeakin. (I-Biribi 4:​6, 7) Ma e ngae n anne, iai naba tataro tabeua ake a aki kakukureia te Atua. N te katoto, e aki kukurei ni kaokiokan tataro aika kamatenanoaki.​—Wareka Mataio 6:7.

E aki kukurei naba Iehova n aia tataro aomata aika a boni motikia i nanoia bwa a na aki karinei ana tua. (Taeka N Rabakau 28:9) N te katoto, n taai ake a karakinaki n te Baibara ao e rawa te Atua n ongoraei aia tataro tibun Iteraera ake a bure n tiritiri. E teretere bwa ti riai ni kakoauaa raoi bwa ti kaboraoi maiura ma tuua bwa a aonga n ongoraeaki ara tataro iroun te Atua.​—Wareka Itaia 1:15.

Tera ae ti riai ni karaoia bwa e aonga n ongoraei ara tataro te Atua?

Ti aki kona ni bubutii nakon te Atua n te tataro ngkana akea ara onimaki. (Iakobo 1:​5, 6) Ti riai ni kakoauaa raoi bwa bon iai ngaia ao e tabeakinira. Ti kona ni kakorakoraa ara onimaki rinanon te ukeuke n reirei n te Baibara, ibukina bwa e boto te onimaki ni koaua i aoni bwaai ni kakoaua ao berita aika n Ana Taeka te Atua.​—Wareka I-Ebera 11:​1, 6.

Ti riai n tataro ma nanora ni koaua ma te nanorinano. E bon nanorinano naba Natin te Atua ae Iesu ngke e tataro. (Ruka 22:​41, 42) Ai ngaia are n oneani mwin are ti na tuanga te Atua bwa tera ae ti na karaoia, ti riai ni kataia ni kaotaira raoi n ana tua rinanoni warekan te Baibara. Ao ngkanne, ti a kona n tataro n te aro ae boraoi ma nanon te Atua.​—Wareka 1 Ioane 5:14.

Ibukin rongorongona riki tabeua, nora mwakoro 17 n te boki aei Tera Ana Reirei ni Koaua te Baibara?, ae boreetiaki irouia Ana Tia Kakoaua Iehova

E kona n reke n te atureti ae www.isa4310.com

[Taamnei n iteraniba 16]

Bukin tera bwa iai tataro tabeua aika a aki kakukureia te Atua?