I rangi n tatangiri ana karikibwai te Atua ma ngke te teei ngai. A aki toki n nako ni kaukiang au utu n taiani buakonikai aika katikimata ao naama aika kantara ake a otabwaninia ara kaawa ae Jyväskylä, i Nukan Finland. I rangi n tatangiriia naba maan. Ngke I uarereke, I kan tautauia katamwa ao kamea ni kabane aika I noriia! Ngke I a ikawai, I a moanna n tabeaianga n aroia aomata ae a aki toki ni kammarakia maan n te aro ae riao. Imwin tabeua te tai, I a kaaina te botaki ae tabe ma karaoani mwakuri aika riai nakoia maan, ike I a kaitiboo iai ma aomata aika titeboo au iango ma ngaiia.

Ti kakorakoraira n anai nanoia aomata ibukin riaini karaoani mwakuri aika riai nakoia maan. Ti tibwainako kaongora ao ni bairei taiani mwaati ao kaotioti ibukini kaotan nanora n ribai taian titooa ake a kabooakinako iai kunia maan ao mwakuri ni kataitai i aoia. Ti katea naba te botaki ae boou ae tabe ma kamanoaia maan. Ti aki toki n reke n te kangaanga irouia taan tautaeka ibukina bwa ti bairei tuua aika kakawaki ni kanakoraoi ara kakaae. N tabetai, I a katikaki ni kabureaki ao ni kateaki n te boowi.

Irarikin tabeaiangau ibukia maan, I boni karawawataaki naba ni kangaanga riki tabeua ni katobibia te aonnaba. Imwin tabeua te tai, I a irekereke ma botaki aika bati n ikotaki naba ma te Amnesty International ao te Greenpeace. I kabanea korakorau ni boutokai aia mwakuri. I boutokaia aomata aika maiu ni kainnano, aika akea kanaia, ao tabeman riki aika aki tau aroia.

Ma teutana imwin teutana, I a ataia ae I aki kona ni bitii aroia aomata. E ngae ngke a a tia botaki akanne ni kaetii kangaanga tabeua aika uarereke, ma e taraa n ae a a tabe n rikirake n rangi ni kakaiaki riki. Titeboo ma a rotakibuaka kaain te aonnaba ni kabane n te buakaka ao akea ae tabe iai. I namakinna bwa ai akea korakorau.

: Kioina ngkai I nanokawaki ibukin akeani korakorau, I a moanna n iaiangoa te  Atua ao te Baibara. I a tia ngkoa n reirei n te Baibara ma Ana Tia Kakoaua Iehova. E ngae ngke I ataia bwa a akoi taani Kakoaua ao ni kaotiota tabeakinau, ma I tuai ngkanne n tauraoi ni bita maiu. N te tai aei, e a bitaki au iango.

I anaa au Baibara ao ni moanna ni warekia. I namakinna bwa e rangi ni kabebeteaki iai nanou. I nori kibun te Baibara aika bati ake ti reireiaki iai bwa ti riai n akoia maan. N te katoto, e taekinaki ae kangai n Taeka N Rabakau 12:10: “E akoia ana man te aomata ae e raoiroi; e ioawa te aomata ae e buakaka.” (Te Baibara ni Katorika) I ataia naba bwa bon tiaki te Atua ae karikii kangaanga n te aonnaba. Ma a a rikirake n rangi ni kakaiaki ibukina bwa angiia aomata a aki tou mwin ana kaetieti te Atua. I rangi ni kukurei ngke I a ataia bwa e nanoanga ao n atataiaomata Iehova.—Taian Areru 103:8-14.

N te tai aei, I a kunea te booma ibukin te bubutii n te boki ae Tera Ana Reirei ni Koaua te Baibara? ngaia are I a kanoaia ao ni kanakoa. Imwin tabeua te tai, a a roko taani Kakoaua aika te taangana n au auti ao n tuangai bwa a kukurei n reirei ma ngai n te Baibara, ao I kariaia. I a moanna naba n iririi bobotaki ni Kristian n te Tabo n Taromauri. Ao ibukin anne, e a moanna n ribu wakaan te koaua i nanou.

I kakaitau ibukin te Baibara bwa I a kona ni karaoi bitaki aika bati ni maiu. I kaaki te moko ao te manging n akea te taubaang. I kaitiaka aron taraakiu ma kunnikaiu ao au taetaenikawai. Ao I aantaeka nakoia naake a tautaeka. (I-Rom 13:1) I kitana naba te aroaro ni maiu ae kammaira are I rangi n inaomata ngkoa iai.

Te bitaki ae te kabanea ni kangaanga irou bon iaiangoani bobotaki ibukin inaomataia aomata ao maan n te aro ae eti. E aki kona ni waekoa n riki anne n te tai ae kimototo. N te moantai, I namakinna ae I a mwamwanaia kaaini botaki aikai ngkana I butiaaina mai iai. Ma e ngae n anne, I ataia ae Ana Tautaeka n Uea te Atua bon tii ngaia te kantaninga ni koaua ibukini bitakin ara aonnaba. I a iangoia bwa N na kabanea korakorau ni boutokaa te Tautaeka n Uea anne ao ni buokiia aomata bwa a na reiakinna.—Mataio 6:33.

: Ngkai te tia anai nanoia aomata ngai nakoni bitaki aika boou, I aki toki n iangoia aomata bwa uaekaki bwa a raoiroi ke a buakaka ao I tauraoi ni kaaitaraia te koraki ake I iangoia bwa a buakaka. Ma I rangi ni kakaitau ni buokau man te Baibara bwa e aikoa korakora riribaakia tabemwaang irou. Ma I kataia ni karikirakea te tangira ni Kristian nakoia aomata nako. (Mataio 5:44) Ibuakon aaro riki tabeua, I a kaotiota te tangira aei n tibwaakin te rongorongo ae raoiroi ibukin Ana Tautaeka n Uea te Atua. I kukurei n nora aron te mwakuri n nanoanga aei, ni boutokaa te rau ao te kukurei ao n angania aomata te kantaninga ni koaua.

E a reke raun au iango ni katukan taekani bwaai nako i nanoni bain Iehova. I kakoauaa raoi bwa ngkai ngaia te tia Karikiriki, e na bon aki kariaia karaoan te ribuaka nakoia maan ma aomata n aki toki ke ni kariaia uruakin ara aonnaba ae tamaroa. Ma e na waekoa ni karaoi mwin urubwai ni kabane rinanon ana Tautaeka n Uea. (Itaia 11:1-9) I bon rangi ni kimwareirei tiaki tii n ataakini koaua aikai ma ibukin naba buokaia aomata nako bwa a na onimakini. I aikoa iangoia bwa I riai ni bita aroia aomata n te aonnaba.