IANGOIA bwa ko rianna n te kawai ae rotongitong. E ngae ngke e a maan n tia ni bung taai, ma ko aki maroaa bwa iai am tooti ae otamwaaka. Ngkana ko kaotaa naano ao ko nori raoi baika i matam. Ao ngkana ko a manga kaitaraa mooa, e a kaotaanako kawaim ae raroa.

Titeboo naba te Baibara ma te tooti anne n aanga tabeua. N aron ae ti noria ni kaongora ake imwaina, e kona ni buokira Ana Taeka te Atua ni kaaitarai baika i matara, aika kangaanga aika ti rinanoi ni katoabong n te aonnaba aei. Ma e bati riki buokara n te Baibara. E kaotaa naba kawaira bwa ti na nori taai aika a na roko, ike ti a kona iai n nora te kawai ae kairiri nakon te kukurei ma te raunnano aika akea tokia, ao n nakonako iai. (Taian Areru 119:105) N te aro raa?

Ti na rinanoi aanga aika uoua ae kona iai te Baibara n anganira te kantaninga ae riai ibukin taai aika a na roko: 1 E buokira ni karekea te kantaninga ni maiura, ao 2 e reireinira aroni karekean te iraorao ae akea tokina ma ara tia Karikiriki.

Iai n te Baibara taeka n reirei aika kona n onimakinaki ibukin arora ni kaaitarai ara kangaanga, ma bon tiaki tii te boki n ibuobuoki te Baibara. E aki tii kaungaira bwa ti na iaiangoi baika ti kainnanoi, ma e reireinira naba bwa ti na iangoira ni kaineti ma te bwai ae kakawaki riki. Ao ngkanne e a tibwa kona ni manena maiura.

N te katoto, e kangai te boto n reirei man te Baibara: “E kakukurei riki te anga nakon te anganaki.” (Mwakuri 20:35) Ko kona n iangoa te tai are ko buoka iai temanna n te bae kainnanoia? Ke tao te tai are ko kakauongo iai nakon raoraom ae bunra nanona? Tiaki e rau nanom ni buokan temanna ni kanakoraoa ana bong?

Ti rangi ni kukurei ngkana ti anganga ao n aki kantaningaa booni mwina. E taku te tia kororongorongo temanna: “E rangi ni kangaanga bwa ko na anga boni ngkoe ao n aki karekea ae bati riki nakon are ko  anga, bwa ko anga ibukin ataakin te baere e na reke iroum.” Ma ngkana ti anga boni ngaira, riki nakoia ake a aki kona ni kabooa mwin ara akoi, ti a boni karekea iai kaniwangara. Ti a irekereke iai ma te bae kakawaki riki. Ti a uaia iai ni mwakuri ma te tia Karikiriki are e tarai aeka ni mwakuri n akoi akanne bwa kataarauana. (Taeka N Rabakau 19:17) A rangi ni kakawaki irouna baika ti karaoi nakoia akana kainnano, ao e berita bwa e na kabooi mwia n te maiu ae akea tokina n te bwaretaiti n te aonnaba, ae bon te kantaninga ae kakukurei n te tai ae e na roko!—Taian Areru 37:29; Ruka 14:12-14. *

Ae kakawaki riki, ti reiakinna n te Baibara bwa ti kona ni karekea te maiu ae manena n taromaurian te Atua ae koaua ae Iehova. Ti kaungaaki n Ana Taeka bwa ti na neboia, ti na karinea, ao n ongeaba irouna, aika baika riai n reke irouna. (Te Minita 12:13; Te Kaotioti 4:11) Ni karaoan anne, ti a kakororaoa iai te bwai ae kamimi iangoana aei: Ti a kakukureia iai ara tia Karikiriki. E boni kaungaira te Atua ni kangai: “Bwaina te wanawana . . . ao kakimwareireia nanou.” (Taeka N Rabakau 27:11) Iangoa aei—ngkana ti karaoi ara motinnano ma te wanawana aika aanaki ni booto n reirei man te Baibara, ti a kakimwareireia iai nanon Tamara ae tatangira are i karawa. Bukin tera? Ibukina bwa e tabeakinira ao e tangiria bwa ti na kabwaia man iriran ana kairiri. (Itaia 48:17, 18) Ni koauana, iai te bae kakawaki riki nakon taromaurian te tia Tautaeka n te iuniweeti ao kakimwareireiana?

Ti reiakinna naba n te Baibara bwa ti na karekea ara iraorao ma ara tia Karikiriki. E kangai te Baibara; “Kaania te Atua, ao ane e na kaaningkami.” (Iakobo 4:8) N tabetai ti a manga nanououa bwa ti boni kona ni karekea ara iraorao ma te tia Karikiriki ae moan te mwaaka ke ti aki. Ma e karaui nanora te Baibara bwa ngkana ti “ukoukora te Atua” ao ti na boni “kunea,” ibukina bwa “e bon aki raroa mairoura n tatabemanira nako.” (Mwakuri 17:27) Moan te kakawaki ibukira nakon taai aika a na roko ana taeka n reirei te Baibara i aon te riki bwa raoraon te Atua. N te aro raa?

Iangoa aei: Ti bane ni kataia ni birinako mairoun te tia kairiribai are te kabane ae te mate, ma akea ae e konaa. (1 I-Korinto 15:26) E ngae n anne e maiu n aki toki te Atua. E aki kona ni mate, ao e tangiriia raoraona bwa a na maiu naba n aki toki. E kaotaki te bae e tangiria Iehova ibukia akana ukoukoria n taeka aika kai ota ma n tamaroa aika n te Baibara aikai: “Kam bia karekea te maiu n aki toki.”—Taian Areru 22:26.

Ko na kangaa ni karekea te iraorao ae akea tokina ma te Atua? Teimatoa n reiakina taekana rinanon ana Taeka ae te Baibara. (Ioane 17:3; 2 Timoteo 3:16) Ukera buokam mairouna bwa ko aonga n ota n te Baibara. E karaui nanora te Baibara bwa ngkana ti “teimatoa ni butiia te Atua” te wanawana ma nanora ni koaua, ao e na bon anganira. * (Iakobo 1:5) Kakorakorako ni maiuakini baike ko reiakin, ao ni kariaia Ana Taeka te Atua bwa e na riki bwa ‘taurani waem’ ao ‘ootani kawaim,’ ngkai ao n aki totoki.—Taian Areru 119:105.