Ai aron ae ti a maeka ngkai n te tabo ae e nang oreaki n te angibuaka are e aranna Iesu bwa “te rawawata ae korakora.” (Mataio 24:21) Ti aki kona ni birinako mai iai. Ma ti kona n ukoukora kamanoara. N te aro raa?

E anga te kairiri aei Iesu Kristo n ana Kabwarabwara i aon te Maunga: “Mangaia are teimatoa n ukoukora moa ana Tautaeka n Uea te Atua ma ana raoiroi.” (Mataio 6:33) Ti na kangaa ni karaoa anne?

Ukoukora moa Ana Tautaeka n Uea te Atua. Ae nanona bwa ti riai n iangoa Ana Tautaeka n Uea te Atua bwa te moanibwai ae kakawaki i buakoni bwaai nako. (Mataio 6:​25, 32, 33) E aera bwa ti riai n iangoia n te aro anne? Bwa a aki kona aomata ni katoki ana kangaanga nako te botannaomata. Tii Ana Tautaeka n Uea te Atua ae konaa.

Ukoukora ana raoiroi. Ti riai ni kabanea ara konaa ni maiuakin ana tua ma ana boto n reirei aika raraoi te Atua. Bukin tera? Bwa ngkana ti iangoia i bon iroura bwa tera ae raoiroi ao ae buakaka, ao e na bon nakobuaka mwina. (Taeka N Rabakau 16:25) Ma ngkana ti maiuakin ana kaetieti te Atua, ti aki tii kakukureia iai te Atua, ma ti boni kabwaia naba iai.​—Itaia 48:​17, 18.

Teimatoa n ukoukora moa Ana Tautaeka n Uea te Atua ma ana raoiroi. E anga te kauring Iesu bwa iai tabeman aika a na katabetabeaki ao a na iangoia bwa a kona ni karekea te mweraoi ni kabatiaan riki aia mwane. Tabemwaang  a na kataua taonakinakoaia ni katabeaiangan te maiu aei ao a aikoa ukoukora Ana Tautaeka n Uea te Atua.​—Mataio 6:​19-21, 25-32.

Ma e berita Iesu bwa akana boutokaa Ana Tautaeka n Uea te Atua, a na boni karekea te bae a kainnanoia ngkai, ao kakabwaia aika akea tokia n te tai ae imwaira.​—Mataio 6:33.

A aki nora tokin te maraki ma te rawawata taan rimwin Iesu ake n te moan tienture, e ngae ngke a ukoukora moa Ana Tautaeka n Uea te Atua ma ana raoiroi. Ma a boni kamanoaki. N te aro raa?

A maiuakin ana kaetieti aika raraoi te Atua, ao ibukin anne a kamanoaki mani kangaanga ake a rotakibuaka iai naake a rawa nakon ana taeka te Atua. A rangi n onimakina ae e na bon roko te Tautaeka n Uea anne, ao a buokaki iai ni kaaitarai kangaangan aika rangi ni kakaiaki. Ao e angania te Atua “te korakora ae riaoni korakoraia aomata” bwa a aonga ni kona ni kekeiaki ma aia kangaanga.​—2 I-Korinto 4:​7-9.

A ongeaba Kristian ake n te moan tienture n te baere e tua Iesu are a na ukoukora moa te Tautaeka n Uea. A tataekina te rongorongo ae raoiroi ibukin te Tautaeka n Uea n taabo nako. (I-Korote 1:23) Iai aika a karaoa anne ni boong aikai?

Iai! A ataia Ana Tia Kakoaua Iehova bwa ai tii teutana riki ao e a kamauna naba te waaki ae ngkai Ana Tautaeka n Uea te Atua. Ngaia are a a kabanea aia konaa ni maiuakina ana taeka Iesu aei: “E na tataekinaki te rongorongo ae raoiroi aei ae taekan te Tautaeka n Uea, n te aonnaba ni kabutaa bwa te bwai ni kaotioti nakoia botannaomata ni kabane, ao ngkanne e a roko naba te toki.”​—Mataio 24:14.

Tera arom nakon te rongorongo ae raoiroi aei? Ti kaumakiko bwa ko na katotongia kaaini kaawani Maketonia are Beroia, ake n te moan tienture. Ngke a ongo te rongorongo ae raoiroi ibukin te Tautaeka n Uea mairoun te abotoro Bauro, ao a butimwaeia “ma te ingaingannano ae moan te korakora.” Ao imwina “a ukeuke raoi n te Koroboki ae Tabu” n noria bwa a koaua baike a ongoraei ke a aki, ao a maiuakini baike a reiakin.​—Mwakuri 17:​11, 12.

Ko kona ni karaoa naba anne. Ngkana ko ukoukora moa Ana Tautaeka n Uea te Atua ma ana raoiroi, ao ko na boni karekea kamanoam ngkai, ao ko na karekea naba te rau ao te mweraoi ae akea tokina n te tai ae imwaira.