Ngkana ko kan nakon te tabo teuana ae ko tuai n roroko iai mai mwaina, tera ae ko na karaoia?

1. 1. Kaineta te tabo are ko taku bwa ko riai n nako iai.

2. 2. Iriia tabemwaang ake a taku bwa a ataa te kawai.

3. 3. Kakaaea te bae kona n onimakinaki ae e na kaira kawaim, n aron te GPS, te mwabe, ke bon raoraom ae ko onimakinna ae e ataa te kawai.

Ngkana ti rinea te moan ke te kauoua, ti na boni mwananga ma ti kona n aki roko n ara tabo are ti na nako iai. Ma ngkana ti rinea te katenua, ti kona ni kakoauaa raoi bwa ti na bon roko n te tabo are ti na nako iai.

Maiura aei kaanga ai aron te mwamwananga—ae te mwananga ae ti kantaningaia bwa e na kairira nakon te kukurei n taai aika imwaira. E boboto rokora n ara tabo are ti na nako iai ke aki rokora iai, man arora ni kakaaea kairara ni kaineti ma ara motinnano.

E ngae ngke angiin ara motinnano ake ti kakaraoi, a na bon rotaki iai maiura i nanon teutana te tai, ma iai naba i buakoia ake a rangi ni kakawaki. A kaotaki iai arora ibukin te aroaro ni maiu ae riai—ae ara iango ni kaineti ma te bwai ae eti ao ae kairua. Ti na bon rotaki ma ara koraki aika ti tangiriia n ara motinnano aikai, n te aro ae raoiroi ke ae buakaka i nanon te tai ae maan. A irekereke ara motinnano ma baikai:

• Te wene n taanga ao te tekateka n taanga imwin te mare

• Bwabwainan te koaua, te mwakuri, ao te mwane

• Aroni kaikawaaia ataei

• Arora nakoia aomata

Ko na kangaa ni kakoauaa raoi bwa am motinnano ni kaineti ma baikai, a na boni kairiko ma am utu nakon te kukurei n taai aika imwaim?

E kangai te titiraki ae ti kaaitara ma ngaia ngaira n tatabemanira nako: Tera ae e na buokai ni kaira au motinnano ibukin te aroaro ni maiu ae riai?

E na kabwarabwaraaki n te maekatin aei bukina ngkai te Baibara bon te bwai ni kairiri ae kona n onimakinaki ibukin te aroaro ni maiu ae riai, ao arom ni buokaki iai.