Ti boni kai rotaki ngkana iai raoraora temanna ae iai aorakin ana iango. Ma ti kona ni kaotiota tangirana ae bati ngkana ti buokia bwa e na kaitaraa ana kangaanga anne. N te aro raa?

“Waekoa n ongora.”—IAKOBO 1:19.

Te anga teuana ae te kabanea n tamaroa ibukini buokan raoraom, bon arom ni kakauongo ngkana e kani maroro. Tai iangoia bwa ko na kaekai ni kabane baike e taekin. Kakauongo nakon te baere e taekinna ao kaotia bwa ko tabeakinna. Kataia n ota n ana namakin ao tai waekoa n tiribureia. Uringnga bwa e kona n taekini baike e aki nanoni ao n uringaaba imwina riki.—Iob 6:2, 3.

“Taetae ni kabebeteia.”—1 I-TETARONIKE 5:14.

E bae n raraoma raoraom ke e bae ni kabokorakora ma namakinan ae akea bongana. Ni karauan nanona bwa ko tabeakinna, ko kona ni kabebetea ao ni kaungaa, e ngae naba ngkana ko aki ataa raoi te bae ko na taekinna.

“E kaotiota te tangira n taai nako te rao ni koaua.”—TAEKA N RABAKAU 17:17.

Anga te ibuobuoki ae manena. N oneani mwin are aongkoa ko ataa arom n ibuobuoki, tuangnga bwa tera ae ko kona ni karaoia. Ngkana raoraom anne, e kangaanga taekinan baike e kainnanoi, kataa karaoan te bwai teuana ae manena ma ngaia, tao n aron te nakonako. Ke ko kona ni buokia ni  boobwai, ni kaitiaki, ke mwakuri riki tabeua.—I-Karatia 6:2.

“Bwaina te taotaonakinnano.”—1 I-TETARONIKE 5:14.

E kona n aki tauraoi n taai nako ni maroro raoraom anne. Kaungaa bwa ko tauraoi n ongora ngkana e a manga kani maroro. Ibukin aorakina, e kona n taekin ke ni karaoi baike ko na maraki iai. Tao e a manga aki ira nanon ami boraraoi ke e a nibwaunun. Taotaona nanom ao kataia n ota irouna ngkana ko buokia.—Taeka N Rabakau 18:24

“I taraia raoi bwa N na riki bwa te rao ni koaua ae e na kona ni maroro ma ngai. E ngae ngke e aki reke buokana irou, ma I kataia n taai nako n ongora n te baere e na taekinna. N tabetai, e tii kainnanoa temanna bwa e na ongora irouna ao imwina e a namakina naba te raunnano.”—Farrah, a are e rotaki raoraona n te aoraki ae kaineti ma aron amwarakena, aorakin te iango ae te raraoma ao te clinical depression.

“Iai temanna raoraou ae rangi n akoi ao ni kaungaai. E kaoai nakoni mwengana bwa N na katoonga kanana ae kangkang. E rangi n tatangira ao e a bebete irou kaotan au namakin. I boni kaungaaki n aroarona anne!”—Ha-eun, are rotaki n aorakin te iango ae te clinical depression.

“E rangi ni kakawaki bwainan te taotaonakinnano. Ngkana e karaoa buu te bwai teuana ae N na un iai, I boni kauringai bwa e riki anne ibukin aorakina ma tiaki arona ni koaua. E buokai aei bwa N na aki un ao N na riai ni bwaina riki te atataiaomata.”—Jacob, are rotaki buuna n te clinical depression.

“Bon te tia boutokaai ni koaua buu ao te tia kabebeteai naba. Ngkana I namakinna bwa I a taonakinako n te raraoma, e aki taumatoaai bwa N na karaoa te bwai ae I aki kani karaoia. N tabetai, e a kona n nanonaki iai bwa e nang aki reke ana tai ni karaoa te baere e tangiria. E bon rangi ni kakawaki irou buu ibukina bwa bon te aine ae rangi n tituaraoi ao n aki bangaomata.”—Enrico, are rotaki n aorakin te iango ae te raraoma.