Te Tai Are E Nang Kamaunaaki Iai te Riribai n Aki Toki!
E ngae ngkana ti kouta wakaan te riribai mai nanora, ma ti bon aki kona ni katoka aia riribai aomata. A teimatoa n riribaaki aomata aika akea aia bure. Ngaia are antai ae kona ni kamauna te riribai n aki toki?
Bon tii Iehova ae te Atua ae kona ni katoka butanakon te riribai ni boong aikai. Bon anne ae beritanaki n te Baibara bwa E na karaoia.—Taeka N Rabakau 20:22.
E NA KAMAUNAI TE ATUA BAIKA KARIKA TE RIRIBAI
-
1. TATAN TE RIABORO. Tatan ae te anera i karawa are karitei, boni ngaia raoi ae na bukinaki n rikin te riribai ae ti noria ni boong aikai. Ma te Atua e na boni kamauna Tatan ao naake a kakairi irouna n riribaia aomata.—Taian Areru 37:38; I-Rom 16:20.
-
2. ANA WAAKI AE BUAKAKA TATAN. E na kamaunai te Atua bwaai ni kabane aika karikirakea te riribai n ikotaki naba ma taan tautaeka aika babakanikawai ao mataniwi n Aaro aika kauekea te riribai. A na kamaunaaki naba waaki ni bitineti aika nanonrang, aika babakanikawai, ao ni kakeai bongaia aomata. —2 Betero 3:13.
-
3. A AKI KORORAOI AOMATA. E taekinaki n te Baibara bwa rikiaia aomata bon te aki kororaoi ae nanona bwa a bane ni kabwaka n aia iango, aia namakin, ao a bae ni kani kakaraoa ae bure. (I-Rom 5:12) Teuana mai buakoni kabwakaia akanne boni kani kaotiotan te riribai nakoia tabemwaang. E na boni buokira te Atua ni kamaunai kabwakara akanne ao imwina a nang akea riki te riribai n aki toki.—Itaia 54:13.
E BERITANAKI N TE BAIBARA TE AONNABA AE AI AKEA IAI TE RIRIBAI
-
1. A NANG AKEA TE RIBUAKA. E nang tautaeka n te aonnaba Ana Tautaeka n Uea te Atua. E na tautaeka mai karawa ao e nang karokoa te kaetitaeka ae riai. (Taniera 2:44) A nang akea te inanonano. E nang kaeta te ribuaka ni kabane te Atua aika a aitara ma ngaai aomata ngkai.—Ruka 18:7.
-
2. A NA NAMAKINA TE RAU AOMATA NAKO. Akea ae e na manga karawawataaki man te iowawa ao te buaka. (Taian Areru 46:9) A na bane aomata n tangira te raoi ao e na riki te aonnaba bwa te tabo ni maeka ae mano raoi.—Taian Areru 72:7.
-
3. A NA BANE NI MWENGARAOI AOMATA N AKI TOKI. A na bane ni kaota te tangira ni koaua i marenaia taani maeka iai. (Mataio 22:39) Akea ae e na rawawata tao man ururingani baika aki raraoi. (Itaia 65:17) Ngkana e a kamaunaaki te riribai, “e na korakora kimwareireia [aomata] n te rau ae bati.”—Taian Areru 37:11.
Ko ingainga ni kani maeka n te aonnaba ae aron anne? N taai aikai, a bati naba aomata aika kakorakoraia n tokanikai i aon te riribai mani maiuakinan ana boto n reirei te Baibara. (Taian Areru 37:8) Anne ae a kakaraoia Ana Tia Kakoaua Iehova ni kabutaa te aonnaba. E ngae ngke a roko man aaba ao katei aika kakaokoro, ma a katiteuanaaki ao n itangitangiri i marenaia.—Itaia 2:2-4.
A kukurei Ana Tia Kakoaua Iehova n tibwai baika a tia n reiakin ibukin aroia n tokanikai i aon te ribuaka ao te kabuakakaaki. E kona te bwai ae ko a tia n reiakinna ngkai ni buokiko n tokanikai i aon te riribai ao ni kaotiota tangiraia aomata. Ko kona naba n ataa arom n akoia aomata ao naake a taraa n aki akaitau naba ke a riribaia tabemwaang. Ao ngkanne ko nang kukurei riki ngkai ao e na nakoraoi riki am iraorao ma tabemwaang. Ma ae kakawaki riki, ko na reiakina te bwai ae ko kona ni karaoia i aan Ana Tautaeka n Uea te Atua ngkana ai akea te riribai n aki toki.—Taian Areru 37:29.
Ko Bae Naba n Tangira
TE TAUA-N-TANTANI
Tera ae E na Kakororaoia Ana Tautaeka n Uea te Atua?
E ataia Iesu ae Ana Tautaeka n Uea te Atua bon tii ngaia te tautaeka ae kona ni katoki kangaanga aika n te aonnaba. Tera ae e a tia ni karaoia te Tautaeka n Uea aei ae e rikirake iai onimakinana iroura?
TARATARA!
Te Riribai—Katokana ae Teimaan n Aki Toki
Baikara baika aua aika e na karaoia te Atua ibukini katokan te riribai?
