Ngkana ti a atai riki aroaron temanna ao ti na rangi ni kinaa te aomata anne, ao e kona n nene riki ara iraorao. N aron anne, ngkana ti a atai riki aroaron Iehova, ti nang ataia riki bwa aekakira aroarona, ao e kona n nene ara iraorao ma ngaia. Iai aua aroaron te Atua aika kamimi aika rianako riki n aroni mwaakana, wanawanana, ana kaetitaeka ae riai, ao ana tangira.

“Ngkoe ae te Uea ae Moan te Rietata ae Iehova! Noria! Ko karaoa karawa ma aonnaba ni mwaakam ae korakora.”​—IEREMIA 32:17.

E noraki mwaakan te Atua n te karikibwai. N te katoto, ngkana ko tei i aan otan taai tera ae ko namakinna? Kabuebuen taai. Ko a bon namakina iai mwamwakurini mwaakan Iehova ni karikibwai. Mwaitira korakoran taai? E taekinaki bwa kabuebuen taai tao 15,000,000 te tekurii tieutieti. Ni katoa teekan ao taai e kaakanakoa te korakora ae titeboo ma te korakora ae nako ngkana a bane n rebwetaua boom aika mwaakaroiroi aika birion ma birion mwaitiia.

Ma e bon uarereke taai ni kabotauaki ma itoi aika tirion ma tirion mwaitiia n te iuniweeti aei. A katautaua taan rabakau bwa buburan te itoi ae te kabanea n totoa ae arana UY Scuti, tao 1,700 te tai okiokini buburan taai. Ngkana e tei te UY Scuti ni nnen taai, ao e na rabunaanako naba te aonnaba ao n rokoroko n te buraneti ae Tubita. Tao e buokira aei n ota raoi  n ana taeka Ieremia ae e karaoa karawa ma aonnaba Iehova ae te Atua ae taekan te iuniweeti, ni mwaakana ae korakora.

Ti kangaa ni kabwaia mani mwaakan te Atua? E boboto maiura i aon ana karikibwai te Atua n aron taai ao bwain te aonnaba aika kamimi. E kabongana naba mwaakana te Atua ni kakabwaiaia iai aomata nako. N te aro raa? N te moan tienture, ao e anga te mwaaka te Atua nakon Iesu bwa e na karaoi iai kakai. Ti wareka ae kangai: “A a noraaba ngkai mataki ao a a nakonako mwauku, a a kaitiakaki rebera ao a a ongo bonotaninga, a a kautaki maate.” (Mataio 11:5) Tera aroni boong aikai? E taku te Baibara: “E anga te korakora nakon ane e kua . . . e na manga reke korakoraia te koraki ake a kabotoi aia kantaninga i aon Iehova.” (Itaia 40:​29, 31) E kona te Atua n anga “te korakora ae riaoni korakoraia aomata” bwa ti aonga ni kekeiaki ke n nanomwaaka i aoni kangaanga ao kataaki ni maiura. (2 I-Korinto 4:7) Ko aki ngkanne kani kaania te Atua ae rangi n tatangira ni kakabongana mwaakana ibukira ae akea tiana?

“Ai mwaitira am mwakuri ngkoe ae Iehova! Ko karaoi ni kabane n te wanawana.”​—TAIAN ARERU 104:24.

Ngkana ti a atai riki taekani baike e karikii te Atua, ao ti na rangi ni mimi riki ni wanawanana. Bon iai te kamatebwai teuana ae aranaki bwa te biomimetics, ke te biomimicry, are a nenera iai ana karikibwai Iehova taan rabakau ni bwain te aonnaba, ao ni katotongi n aia karaobwai. A moa baikai man te kabaebae n uaa ae ai te karao wanikiba.

E oti kamimin riki wanawanan te Atua n rabwatan te aomata. N te katoto, iangoa aron rikin te teei. E moa mani kaitiboon te bunnimoa ma ana man ni kariki te mwaane, ao e a reke naba te cell teuana ae a bane iai rongorongon tein te aomata are nang riki arei. E a manga bwenaua te cell arei nakon cell aika bati ae titeboo raoi teia. Ma n taina ae riai, ao a a kakaokoro tein cell akanne ao a a manga bwenaua riki nakon aeka n cell aika kakaokoro aika bubua ma bubua ake a riki bwa taian raraa, ia, ao ri. N te tai ae waekoa ao e a moana mwakurina te rabwata. Tii i nanon ruaiwa namwakaina ao e a rikirake te cell ane tii teuana ngkoa anne n riki bwa te merimeri ae karaoaki man cell aika birion ma birion mwaitiia. Te wanawana ae noraki n te karikibwai aei, e a kairiia aika bati bwa a na boraoi n iango ma are e taekinna te tia korea te Baibara ae e kangai: “I karaoiroiko ibukina bwa e kakamaakai aroni karaoau n te aro ae kamimi.”​—Taian Areru 139:14.

Ti kangaa ni kabwaia mani wanawanan te Atua? E ataa te bae ti kainnanoia te tia Karikiriki bwa ti aonga ni kukurei. Kioina ngkai e rangi ni bati ana atatai ma wanawanana, e katauraoa te reirei ni kairiri n ana Taeka ae te Baibara. N te katoto e kaumaki ni kangai te Baibara: “Teimatoa n . . . tauraoi n ikabwarabure.” (I-Korote 3:13) E kaota te wanawana te reirei ni kairiri anne? Eng. A noria taokita bwa te kabwarabure e kona ni kamaturaoa te aomata ao ni kakerikaaka rietatan raraana. E kauarerekea naba kakaiakin te rawawatannano ao aoraki riki tabeua. Te Atua kaanga ai aron raoraora ae wanawana ae mumutiakinira ae e anganganira te taeka n reirei ae manena. (2 Timoteo 3:​16, 17) E aki kan reke raoraom ae aekakin aei?

“E tangira te kaetitaeka ae riai Iehova.”​—TAIAN ARERU 37:28.

E kakaraoa ae eti te Atua. Ni koauana, “e bon aki kona te Atua ae koaua n iangoa karaoan ae buakaka, ao Teuare Moan te Mwaaka bwa e na karaoa ae kairua!” (Iobi 34:10) A eti ana motikitaeka n aron are e taekinna te tia areru ibukin Iehova ni kangai: “Ko na motiki taekaia botannaomata n te riai.” (Taian Areru 67:4) Ibukina bwa “Iehova e nora te nano” e aki kona ni mwanaaki n ara mwamwanaa te aba, ma e kona n nora te koaua ao ni karaoi mooti aika eti raoi. (1 Tamuera 16:7) Irarikin anne, e nori mwakuri n ribuaka nako te Atua ao babakanikawai n te aonnaba, ao e beritanna bwa n te tai ae waekoa ao a nang “koreakinako akana buakaka man te aonnaba.”​—Taeka N Rabakau 2:22.

Ma tiaki te tia motikitaeka ae iowawa te Atua ae tatauraoi ni katuuaaea te aba. E kaokaota te nanoanga ngkana e riai. E taku te Baibara: “E nanoanga Iehova ao e atataiaomata” nakoia naba akana buakaka ngkana a rairi raoi nanoia. Tiaki ngkanne te kaetitaeka ae riai anne?​—Taian Areru 103:8; 2 Betero 3:9.

Ti kangaa ni kabwaia man ana kaetitaeka ae riai te Atua? E kangai te abotoro Betero: “E bon aki inanonano te Atua, ma a butimwaeaki irouna aomata nako aika maakua ma ni kakaraoa ae raoiroi, mai buakoia natannaomata nako.” (Mwakuri 10:​34, 35) Ti kabwaia man ana kaetitaeka ae riai te Atua ibukina bwa e aki kona ni kaota te inanonano. Ti kona ni butimwaeaki irouna ao n riki bwa taan taromauria n aki ongeia bwa tera ara reeti, abara, ara reirei, ke arora.

Ibukina bwa e tangiria te Atua bwa ti na ota ao ni kabwaia man ana kaetitaeka ae riai, e karikira ma mataniwin nanora. E kabwarabwaraa te Baibara bwa te mataniwinnano bon te tua ‘ae koreaki i nanora ae kaotioti’ bwa tao a eti ara mwakuri ke a aki. (I-Rom 2:15) Ti na kangaa ni kabwaia iai? Ngkana e kataneiaaki raoi mataniwin nanora, ti na kairaki iai bwa ti na tannako mani mwakuri aika karuanikai ke aika ribuaka.  Ao ngkana ti karaoa ae kairua, e kona ni kairira bwa ti na raira nanora ao ni kaetii arora. E boni kona ni buokira otara n ana kaetitaeka ae riai te Atua ao ni kaanira naba ma ngaia!

“Te Atua bon te tangira.”​—1 IOANE 4:8.

E kaotiota te mwaaka te Atua, te wanawana, ao te kaetitaeka ae riai, ma e aki taekinaki n te Baibara bwa te Atua bon te mwaaka, te wanawana, ke te kaetitaeka ae riai, ma e taekinaki bwa te Atua bon te tangira. Bukin tera? Ibukina bwa e kona te Atua ni karaoa te bwai teuana mani mwaakana, ao e kairaki ana mwakuri n ana kaetitaeka ae riai ao ni wanawanana. Ma e kairaki te Atua n ana tangira bwa e na karaoa te mwakuri. E aanaki baike e karaoi ni kabane n te tangira.

E ngae ngke e aki tare Iehova n te bwai teuana, ma e kairaki n ana tangira bwa e na karikiia ana karikibwai aika wanawana i karawa ao n te aonnaba, ake a kona ni kakabwaiaaki ao ni kimwareirei n ana tangira ao n ana mwamwannano. E tatangira ni katauraoa te aonnaba bwa e na riki bwa mwengaia ae nakoraoi ana karikibwai aika aomata. Ao e teimatoa ni kaota te tangira nakoia aomata nako n arona ni “kaotaa taai i aoia aomata aika buakaka ma aika raoiroi, ao e kabwakaa te karau i aoia aomata aika eti aroia ma aika aki eti.”​—Mataio 5:45.

Irarikin anne, “e rangi n tatangira Iehova ao n nanoanga.” (Iakobo 5:11) E kaotiota tangiraia naake a toui raoi mwaneka ibukini kan ataakina ao kaaniana. E taraiia aomata aikai te Atua n tatabemania nako. Ni koauana, “e mumutiakiningkami.”​—1 Betero 5:7.

Ti kangaa ni kabwaia man ana tangira te Atua? Ti nora tamaroani bungin taai. Ti kukurei ngkana ti ongo ngarengaren te teei. Ti kimarimari n tangirara iroun temanna kaain ara utu. Tao a aki rangi ni kakawaki baikai, ma a kanakoraoa riki maiura.

Te bwai teuana ae ti kabwaia naba iai ao e oti iai ana tangira te Atua, bon te tataro. E kaumakira te Baibara ni kangai: “Tai raraomaeakina te bwai teuana, ma a na kaotaki ami bubutii ni bwaai ni kabane nakon te Atua, n te tataro ma te kakorakora n tataro ni bubutii n raonaki n te katituaraoi.” N aron te tama ae tatangira, e tangiria Iehova bwa ti na butiia buokara ma nanora ni koaua. Ao e berita rinanon ana tangira ae aki bangaomata bwa e na anganira “te rau . . . ae riaon aia iango aomata.”​—I-Biribi 4:​6, 7.

E buokiko te maroro ae kimototo aei ni kaineti ma aroaron te Atua aika kakawaki aikai, n aroni mwaakana, wanawanana, ana kaetitaeka ae riai, ao ana tangira, n ataia bwa aekakira aroaron te Atua? Ibukini kaotan am kakaitau riki nakon te Atua, ti kaoko bwa ko na reiakina te bae e a tia ni karaoia ao te bae e na karaoia ibukini kabwaiam.