IBUKIA KAARO
8: Te Banna ni Katoto
AE NANONAKI IAI
Kaaro ake a katea te banna ni katoto a maiuakina te baere a reireinia iai natiia. N te katoto, e kangaanga bwa ko na kariaa natim bwa e na bwabwaina te koaua ngkana e ongongo ae ko kangai, “Tuangnga bwa akea ngai n te auti,” ngkana ko aki kani kaekaa temanna ae roko.
“E taneiai te aba ma te taeka ae ‘Karaoa ae I tuangko, ma tai katotongai.’ Ma e aki nakoraoi aei irouia ataei. Kaanga ai aron ongantari ngaiia ake a toomi bwaai nako ake ti taekin ao ni karaoi, ao a na tuangira ngkana e aki boraoi ara katoto ma te baere ti kataia n reireinia.”—David.
TE BOTO N REIREI MAN TE BAIBARA: “Ngkoe ae ko tataekina ae kangai, ‘Ko na tai iraa,’ ko iraa?”—I-Rom 2:21.
BUKINA NGKAI E KAKAWAKI TE BANNA NI KATOTO
A kai iraraang riki ataei ke bon rooro n rikirake irouia aia karo, ao tiaki irouia aomata riki tabeman, ke tabonroroia. Ae nanona bwa e rangi n angaraoi riki iroum kairaia natim nakon te kawai ae eti, ao riki ngkai ko maiuakina te bae ko tataekinna.
“Ti kona ni kaokioka taekinan te bwai teuana irabubua te tai ao n iangoia bwa e na ongo natira, ma n te tai naba are ti aki karaoa iai te bae ti taekinna aei, ao e a bon ataia naba natira. A tatarai raoi baika ti karaoi natira, e ngae naba ngkana ti taku bwa a aki.”—Nicole.
TE BOTO N REIREI MAN TE BAIBARA: “Te wanawana are mai karawa . . . e aki mwamwanaa te aba.”—Iakobo 3:17.
TE BWAI AE KO KONA NI KARAOIA
Tuoa arom. Tera am kaakibotu ae ko mamataku iai? Tera arom nakoni buum ao natim? Aekakira raoraom? Ko mwamwannanoia tabemwaang? Ni kauarerekeana, ko maiuakini baika ko tangiriia natim bwa a na maiuakin?
“Ti aki kabaeia natira bwa a na maiuakina te kaetieti ae ti aki maiuakinna.”—Christine.
Kabwaraa am bure ibukin am kairua. A bon ataia natim ae ko aki kororaoi. Ma ngkana ko kangai, “Kabwaraa au bure” n te tai ae riai nakoni buum ao nakoia natim, ko a reireinia iai te bae kakawaki ae bwabwainan te koaua ao te nanorinano.
“A riai natira n ongo mairoura ae ti butimwaea ara kairua ao a riai n ongo ara kabwarabure. Ngkana ti aki kakaraoa anne, ane a na bon tii rabakau naba ni karabai aia kairua.”—Robin.
“Ngkai kaaro ngaira, a rangi ni kai iraraang natira iroura, ao ara katoto bon te bwai n reirei ae te kabanea n oomwaaka, ibukina bwa a nonoria n taai nako. Kaanga ai aron ae a a bon rereireinaki naba n anuani maiuia aia karo.”—Wendell.
Ko Bae Naba n Tangira
TE TAUA-N-TANTANI
Tera te Bwai ae Karika te Karo Bwa E na Raoiroi?
Ko na kangaa ni kaikawaiia natim?
