Te rongorongo ae raoiroi boni mairoun Iehova ae te Atua ae kukukurei, are e tangiriia utu nako bwa a na kukukurei. (1 Timoteo 1:11) Boni ngaia are e moani karika te mare. Te mare i aan te Tua, e karekea te kukurei ao te tangira i marenaia kaaro ma natiia. A riai Kristian ni karinea ana tua te tautaeka ni kaineti ma te mare.​—Wareka Ruka 2:1, 4, 5.

Tera ana iango te Atua ibukin te mare? E tangira te mare bwa a na teimatoa ni katiteuanaaki iai taanga ni mare. E tangiria Iehova bwa a riai buumwaane ao buuaine ni bwaina te kakaonimaki ni koaua i marenaia. (I-Ebera 13:4) E ribaa te buuraure. (Maraki 2:16) Ma e kariaia Kristian bwa a na buuraure ao ni manga mare, ngkana iai irouia ae e a tia ni wene ni bure.​—Wareka Mataio 19:3-6, 9.

E karikaki te mwaane ao te aine iroun Iehova bwa a na kaai n ibuobuoki i marenaia i nanon aia tai n tekateka n taanga. (Karikani Bwaai 2:18) E riai te buu te mwaane ae atun te utu, ni katauraoi baika a kainnanoi kaain ana utu ao n reireinia naba taekan te Atua. E riai ni kaotiota tangirani buuna. A riai buumwaane ao buuaine n tangiriia i marenaia ao ni bwaina te ikarinerine. Kioina ngkai akea ae kororaoi, e kakawaki irouia taanga bwa a na ikabwarabure bwa a aonga ni karekea te kakukurei n aia mare.​—Wareka I-Ebeto 4:31, 32; 5:22-25, 33; 1 Betero 3:7.

A riai taanga ni mare ni bwaina te tangira i marenaia, ibukin totokoan rikini kangaanga n aia mare. (1 I-Korinto 13:4, 5) E aki taekinaki n Ana Taeka te Atua bwa te raure bon te anga teuana ibukini katokan te kangaanga ae riiriki n te mare.​—Wareka 1 I-Korinto 7:10-13.

E tangiringkami Iehova bwa kam na kukurei. E anganingkami te taeka n reirei ae te kabanea n tamaroa, bwa kam na kakukureingkami n ami bongi n rikirake. E tangiringkami naba bwa kam na karekea kakabwaiami mani kabonganaan aia atatai ao wanawanaia ami karo. (I-Korote 3:20) E tangiringkami naba bwa kam na karekea te kimwareirei ni karaoa nanon ami tia Karikiriki ao Natina.​—Wareka Te Minita 11:9–12:1; Mataio 19:13-15; 21:15, 16.

Kam riai ni mwakuri korakora, ni katauraoi bwaai n aron te amwarake, te mwenga ao te kunnikai ibukia natimi. (1 Timoteo 5:8) Ma kam riai naba n reireinia natimi bwa a na tangira te Atua ao n reireiaki irouna, bwa a aonga ni karekea te kukurei ni maiuia. (I-Ebeto 6:4) A rangi ni kai anaaki nanoia natimi, n ami katoto ae kam kaotiotia ibukin tangiran te Atua. A kona ni buokaki natimi ni kaboraoi aia iango ma ana iango te Atua, ngkana a boto ami kaetieti man Ana Taeka te Atua.​—Wareka Te Tua-Kaua 6:4-7; Taeka N Rabakau 22:6.

A buokaki natimi ngkana kam kaungaia ao ni kamoamoaia. A kainnanoa naba kaetakia ao te reirei ni kaetieti. A kona ni katanaki man aroaro aika a na uruana kukureia, ngkana a kamanenai reirei ni kataneiai aikai. (Taeka N Rabakau 22:15) Ma kam aki riai ni kairimatoa ke n iowawa n ami reirei ni kaetieti.​—Wareka I-Korote 3:21.

A boreetiaki irouia Ana Tia Kakoaua Iehova, booki aika mwaiti ake a katauraoaki ibukini buokaia kaaro ao ataei. A boto man te Baibara booki aikai.​—Wareka Taian Areru 19:7, 11.