E karika te moani mare Iehova * ae te Atua. Ti tuangaki n te Baibara bwa e karika te moan aine ao e “kairia nakon te aomata arei.” E rangi ni kukurei Atam ao e taku: “Bon rin riu aei ngkai, ao irikon irikou.” (Karikani Bwaai 2:22, 23, BG) E teimatoa Iehova n tangiriia aomata aika tekateka n taanga imwini mareia bwa a na kukurei. E kaineti te mare ae taekinaki n te boroutia aei ma te reitaki ae kinaaki n te tua.

Ko kona n iangoia bwa a na nakoraoi bwaai ni kabane ngkana ko mare. Ni koauana, a bae n iai aia kangaanga tabeua te buu te mwaane ao te buu te aine, e ngae naba ngke a rangi n tangiriia i marenaia. (1 I-Korinto 7:28) N te boroutia aei ao ko na nori iai booto n reirei n te Baibara aika kona ni karekea te kukurei n tekatekam n taanga imwini marem ao am utu ngkana a maiuakinaki.—Taian Areru 19:8-11.

TE BAE E TAEKINAKI N TE BAIBARA: Bon atun te utu te buu te mwaane.—I-Ebeto 5:23.

Ngkana te buu te mwaane ngkoe, e kantaningaiko Iehova bwa ko na mwannanoa buum. (1 Betero 3:7) E karika neienne bwa raom ae riai ao e tangiriko bwa ko na karinea ma n tangiria. (Karikani Bwaai 2:18) E riai ni korakora tangirani buum n te aro ae ko kukurei ni moanibwaia nanona.—I-Ebeto 5:25-29.

Ngkana te buu te aine ngkoe, e kantaningaiko Iehova bwa ko na rangi ni karinea buum ao ni buokia ni kakororaoa mwiokoana. (1 I-Korinto 11:3; I-Ebeto 5:33) Boutokai ana babaire ao kabanea nanom n ibuobuoki ma ngaia. (I-Korote 3:18) Ni karaoan anne, ko na rangi n tamaroa i matani buum ao Iehova naba.—1 Betero 3:1-6.

TE BAE KO KONA NI KARAOIA:

• Titirakina buum arom ae ko na riki iai bwa te buu mwaane ke te buu aine ae raoiroi. Kakauongo raoi ao karaoa ae ko kona ni katamaroaa arom iai

• Bwaina te taotaonakinnano. E kainnanoaki te tai ae maan ibukin reiakinan aromi ni kakukureingkami i marenami

TE BAE E TAEKINAKI N TE BAIBARA: Ko riai n tabeakina nanoni buum. (Biribi 2:3, 4) Kakaraoa ae riai nakoni buum bwa e kakawaki n ururingan are e tangiriia ana toro Iehova bwa a na bwaina te “nimamannei nakoia aomata nako.” (2 Timoteo 2:24) “Bon iai ane barantiko n ai aron ewaran te aba n te kabaang: Ma bon te mauri neweia akana wanawana.” (Taeka N Rabakau 12:18, BG) E na buokiko taamnein Iehova bwa ko na taetae ma te akoi ao te tangira.—Karatia 5:22, 23; I-Korote 4:6.

TE BAE KO KONA NI KARAOIA:

• Tataroakina buokam bwa ko na teimatoa n nimamannei ao ni kauka am iango imwaini maroroakinani baika rangi ni kakawaki ma buum

• Iangoa raoi am taeka ae ko na taekinna ao arom iai

TE BAE E TAEKINAKI N TE BAIBARA: Ngkana ko mare, ko a riki n “tii te irikona” ma buum. (Mataio 19:5) Ma bon aomata aika uoman ngkami ao kam kona ni kakaokoro n iango. Ngaia are kam riai n reiakinna bwa kam na bwaina te katiteuanaaki n ami iango ao n ami namakin. (I-Biribi 2:2) E kakawaki te katiteuanaaki ngkana kam karaoi ami motinnano. E taekinaki ae kangai n te Baibara: “A bane ni kamatoaki naano n te kabowi.” (Taeka N Rabakau 20:18, BG) Kariaia kairakimi ni booto n reirei man te Baibara ngkai kam kaai ni karaoi ami motinnano.—Taeka N Rabakau 8:32, 33.

TE BAE KO KONA NI KARAOIA:

• Maroroakina am namakin ma buum ma tiaki tii rongorongo ke baike ko iaiangoi

• Karekea ana iango buum imwaini karaoani baika ko na karaoi