Imwin tabeua te tai ao e mena Iesu n te aono ‘are n iteran te Ioretan’ ae Berea. (Ioane 10:40) E a mwananga ngkai nako maiaki nako Ierutarem.

Tiaki tii Iesu ni mwananga. A boni mwananga taan rimwina ma ngaia ao “aomata aika uanao,” n ikotaki naba ma taan rikoa te taekiti ao taani bure. (Ruka 14:25; 15:1) A boni mena naba ikanne Baritaio ao taani koroboki ake a tiriburea ana taeka Iesu ma baike e karaoi. A rangi ni bati baika a riai n iangoi imwin ongoraeia ni kaikonaki ake e taekin Iesu ibukin te tiibu are bua, te nati ae bua, ao teuare kaubwai ao Rataro.​—Ruka 15:2; 16:14.

E tabeakinia taan rimwina Iesu tao ibukin are e a tibwa tia n ongo aia tiribure ma aia bwainingare taani kakaaitara. E bon taekini reirei tabeua ake e a tia ngkoa n angareirei iai i Kariraia.

N te katoto, e taku Iesu: “A na bae n roko baika kona ni kabwakaia aomata. Ma ai kananoangara te aomata are karikii kabwakabwaka! . . . Kam na taratarai raoi aromi. Ngkana e karaoa te bure tarim ao boaia, ao ngkana e raira nanona ao kabwaraa ana bure. E ngae ngkana tao e bure nakoim itiua te tai n tebongina ao e okiriko itiua te tai ni kangai, ‘I a raira nanou,’ ao ko riai ni kabwaraa ana bure.” (Ruka 17:1-4) E bae ni kauringaki Betero ni kabanean taeka akanne ana titiraki are e tabekia ibukini kabwaraan te bure itiua te tai.​—Mataio 18:21.

A kona taan rimwina ni kaboraoi maiuia ma ana taeka Iesu? Ngke a kangai nakon Iesu, “Kakorakoraa riki ara onimaki,” ao e boni karau nanoia ni kangai: “Ngkana iai ami onimaki ae uarerekeni koraan te matitati ao kam kangai nakon te aroka ae bubura aei, ‘Kounako mai wakaam ao naako riiki i taari!’ ao e na boni kounako mai wakaana ao e na riki i taari.” (Ruka 17:5, 6) Eng, e boni kona naba te onimaki ae uarereke ni kakororaoi baika kakannato.

E reitaanako ana angareirei Iesu i aoni kakawakin te nanorinano ao iangoam i bon iroum n te aro ae riai, ngke e kangai nakoia abotoro: “Antai iroumi ae iai ana toro ae tabena kamarauan te tawaana ke tararuaan te nanai, ae e na kangai nakoina ngkana e a oki man te tawaana, ‘Nakomai ngkainaba ao amwarake n te taibora’? Ma tiaki e na kangai nakoina, ‘Katauraoa au katairiki, ao karina am kunnikai ni kuuka ao touatinai ni karokoa ae I tia n amwarake ma ni moi, ao imwina ko a kona n amwarake ao ni moi’? E na bon aki kaitaua te toro ibukina bwa e boni karaoa tabena te toro are e mwiokoaki iai. N aron naba anne, ngkana kam a tia ni karaoi bwaai ni kabane ake kam mwiokoaki iai, ao kangai: ‘Akea bongara bwa bon tooro ngaira, te bwai ae ti a tia ni karaoia, bon te bwai ae ti riai ni karaoia.’ ”​—Ruka 17:7-10.

A riai n ataia ana toro te Atua ni kabane ae e kakawaki moanibwaian nanon te Atua. Irarikin anne, a riai n tatabemania nako n uringa kakabwaiaaia ae taromaurian te Atua ngkai a a riki bwa kaaini batana.

E taraa n ae n te tai ae waekoa imwin aei ao e a roko te tia uataeka are e kanakoaki irouni Maria ma Mareta. Boni mwaanen Rataro aine aikai ao a maeka i Betania i Iutaia. E taku te tia uataeka: “Te Uea, noria! e a aoraki teuare ko tatangiria.”​—Ioane 11:1-3.

E ngae ngke e a ataia Iesu bwa e a rangi n aoraki raoraona are Rataro, ma e bon aki taonakinako n te nanokawaki. Ma e taku: “Tiaki te aoraki ni mate te aoraki aei, ma bon ibukin neboan te Atua, bwa e aonga n reke iai karinean Natin te Atua.” E bon tiku ikanne i nanon uabong ao e a taku nakoia taan rimwina: “Ti na manga nako riki Iutaia.” A aki kariaia ao a taku: “Rabi, a ukoukora angaia I-Iutaia bwa a na karebanaiko n atibu n taai aika tibwa nako aikai, ao ko na manga nako naba ikekei?”​—Ioane 11:4, 7, 8.

E kaekaia Iesu ni kangai: “Tiaki bon 12 te aoa n te ngaina? Ngkana e nakonako te aomata n te ngaina, ao e na bon aki okaanako te bwai teuana, ibukina bwa e nora te oota ae kaotaia kaain te aonnaba. Ma ngkana iai ae e nakonako n te bong, ao e na okaanako te bwai teuana, ibukina bwa e aki mena i nanona te oota.” (Ioane 11:9, 10) Tao e nanonna Iesu ae e tuai ni bane ana tai are e kataua te Atua ibukin ana mwakuri ni minita. E riai ni kamanena raoi ana tai ae uarereke aei ngkai e a kani bane.

E reitia riki Iesu ni kangai: “E a matu raoraora are Rataro, ma N na nako ikekei bwa N na kautia.” E teretere bwa a iangoia taan rimwina bwa e boni matu Rataro ao e na manga uti, ao a a taku: “Te Uea, ngkana e matu, ao ane e na manga marurung.” E a kamataataa raoi Iesu nakoia ni kangai: “E a boni mate Rataro . . . Ma ti a nakoina.”​—Ioane 11:11-15.

E ataia Toma bwa e kona n tiringaki Iesu i Iutaia, ao iai nanona ni kani boutokaia ai ngaia are e a kaumakiia taan rimwina ake raona ni kangai: “Ti na nako naba bwa ti na mate ma ngaia.”​—Ioane 11:16.