Ai kubanakora aine ngke a a nora te tabo are e kaiiaki iai bwa e taraa n ae akea kaaina! E birinako Maria are te I-Maketara nakon “Timon Betero ao te tia rimwin Iesu are temanna are e tatangiria Iesu” ae te abotoro Ioane. (Ioane 20:2) Ma a nora te anera aine ake tabeman ake a tiku n te ruanimate. Ao e mena n te ruanimate te anera temanna riki ae “kunnikaia n te kamwarai ae mainaina.”​—Mareko 16:5.

E tuangia te anera temanna ni kangai: “Tai maaku, bwa I ataia bwa kam kakaaea Iesu are e kamateaki i aon te kai. Bon akea ikai, bwa e a tia ni kautaki n aron are e taku. Nakomai nora te tabo are e wene iai ngkoa. Ao naako kawaekoaingkami n tuangia taan rimwina bwa e a kautaki mai buakoia maate, ao tuangia ni kangai, ‘Noria! are e a nako n rimoami nako Kariraia.’” (Mataio 28:5-7) Ma “a taonaki n te mimi ae bati ao a rurubenebene” aine aikai ao a a birinako ni kaongoia taan rimwina.​—Mareko 16:8.

N te tai aei ao e a tia n roko Maria irouia Betero ao Ioane. E ikenrawa ao e kaongoia ni kangai: “A a uotaanako te Uea man te ruanimate, ao ti aki ataa ike a kawenea iai.” (Ioane 20:2) A taeki waeia ni birinako Betero ao Ioane. E birimwaaka Ioane ao e moan roko n te ruanimate. E taraa nanon te ruanimate ao e nori taian ninira ma e boni mena naba i tinaniku.

Ngke e a roko Betero, e a rinnako naba. E nori taian ninira aika rinen ao te kunnikai are e niraki iai atun Iesu. E a rinnako ngkai Ioane ao e a kakoauaa ana rongorongo Maria. N aki ongea are e a kaman taekinna Iesu, ma bon akea i buakoia ae ota n ae e a tia ni kautaki. (Mataio 16:21) A minotaki aia iango naakai ao a a okira mwengaia. Ma e bon tiku ikanne Maria are e a tia ni manga okira te ruanimate.

N te tai aei ao a a mwananga aine riki tabeman n tuangia taan rimwina ae e a tia ni kautaki Iesu. Ngke a tabe ni biri bwa a na kawariia ao e a kaitiboo Iesu ma ngaiia ao e taku nakoia: “Kam na mauri!” ‘A kawaria ao a bobaraaki i rarikini waena ma ni karinea.’ E taku ngkanne Iesu nakoia: “Tai maaku! Naako kaongoia tariu bwa a aonga n nako Kariraia, ao a na norai ikekei.”​—Mataio 28:9, 10.

Imwain anne ngke e riki te mwaeiei ao a kaoti anera ao “a rurubenebene taan tantani ibukini maakakina ao a riki n ai aroia maate.” Ngke a oki nanoia ao a rinnako n te kaawa ao a “kaongoia mataniwi n ibonga bwaai ni kabane aika riki.” A maroro ngkanne ibonga ma aia unimwaane I-Iutaia. E a moti te babaire bwa e na karabaaki te baerei ni kamaraan atoia tautia ao a na kangai: “A roko taan rimwina n te bong ao a iraea rabwatana ngke ti matu.”​—Mataio 28:4, 11, 13.

A kona n tiringaki tautian Rom ngkana a matunako n aia tai n tei, ngaia are a berita ibonga ni kangai: “ngkana e ongo te kowana [aia kewe ae a matunako], ti na kabwarabwaraa te baei nakoina ao kam na aki tabeaianga iai.” (Mataio 28:14) A butimwaea te kamaraato tautia ao a karaoa are a tua ibonga. Ngaia are e a butanako te kewe i buakoia I-Iutaia ni kaineti ma kimoaakin rabwatan Iesu.

E bon tiku naba n nanokawaki n te ruanimate Maria are te I-Maketara. Ngke e bwatiku n taraa nanona ao e a noriia anera aika uoman aika bwaimainaina! E tekateka temanna i etannatu ike e wene iai rabwatan Iesu ao temanna i bukiniwae. A titirakina neiei ni kangai: “Neiko e aera ngkai ko tang?” E kaeka neiei ni kangai: “A uotaanako au Uea, ao I aki ataa ike a kawenea iai.” E rairaki neiei ao e nora te aomata temanna. E kaoka teuaei aia titiraki anera ao e reitia n taku: “Antai ae ko kakaaea?” E iangoia neiei bwa te tia kawakina te onnaroka teuaei, ao e taku nakoina: “Nao, ngkana tao ko uotaanako rabwatana, tuangai te tabo ae ko kawenea iai, bwa N na anaia n uotianako.”​—Ioane 20:13-15.

E bon taetae Maria nakon Iesu are e a mangauti ma e bon tuai ni kinaa n te tai aei. Ma ngke e kangai teuaei, “Maria!” e a ataia neiei ae bon Iesu, bwa e kinaa tein ana taetae nakoina. E taetae neiei ma te kimwareirei ni kangai: “Raboni!” (ae nanona “te tia Reirei!”) E waekoa n taua bwa e maaka are e nang waerake nako karawa. E a kaumakia Iesu ni kangai: “Tai tauai bwa I tuai n rierake nakon te Tama. Ma naako nakoia tariu ao kangai nakoia, ‘N na rierake nakon Tamau ao Tamami, ao nakon Atuau ao Atuami.’”​—Ioane 20:16, 17.

E birinako Maria nakon te tabo are a botaki iai abotoro ao tabeman riki taan rimwin Iesu. E tuangia ni kangai: “I a tia n nora te Uea!” ao a reita ana rongorongo neiei ma are a a tia n ongoraeia mairouia aine ake tabeman. (Ioane 20:18) Ma a tii iangoia bwa “tiaki oi n rongorongo baikai.”​—Ruka 24:11.