Ngke e kitana Ierutarem Iesu ni bwakantaain te Moanibong, ao e okira Betania are mena i mainikun te Maunga ae Oriweta. E bae n tiku n te tairiki anne n aia auti raoraona ake Rataro, Maria, ao Mareta.

Ngkai ai bon ingabongin Nitian 11, ao a a manga mwananga naba Iesu ma taan rimwina n okira Ierutarem, ae ai ana kabanea naba n tai ni kaoti n te tembora. Aei ana kabanea ni bong n uarongorongo nakoia aomata imwain ae e karaoa te Toa ae te Riao ao ni moani karaoa te Kauring ibukini matena, ao imwina e nang kaboowiaki ao ni kamateaki.

Ni kawaia mai Betania n riaon te Maunga ae Oriweta nako Ierutarem ao Betero e a nora te aroka are kamaraiaaki iroun Iesu, ni moaningabongin ngkoananoa. E taku: “Rabi noria! e a rai te aroka are te biiku are ko kamaraiaa.”​—Mareko 11:21

Ma e aera Iesu ngke e karaia te aroka anne? E kaota bukina ngke e kangai: “I tuangingkami te koaua, ngkana arona bwa iai ami onimaki ao kam aki nanououa, ao kam na aki tii karaoa ae I karaoia nakon te aroka ae te biiku. Ma ngkana kam kangai naba nakon te maunga aei, ‘Mwemwenako ao bwaaka i taari,’ ao e na bon riki. Ao bwaai ni kabane ake kam bubutii n te tataro ma te onimaki, ao kam na karekei.” (Mataio 21:21, 22) E a manga kaoka naba te bae kakawaki are e a tia n taekinna mai mwaina ibukin te onimaki are kona ni kamwainga te maunga.​—Mataio 17:20.

Ngke e karaia te aroka arei Iesu, e anga iai te reirei ae e riai onimakinan te Atua. E taku: “Bwaai ni kabane ake kam tataroi ma ni bubutii, kam na onimakina rekeia iroumi, ao a na bon reke.” (Mareko 11:24) Ai kakawakira te reirei aei nakoia taan rimwin Iesu ni kabane! Ai moarara riki ngkai a nang kaaitara abotoro ma kataaki aika korakora. Ma iai riki irekereken rain te aroka aei ma te onimaki.

Te natannaomata ae Iteraera ai aron te aroka ae te biiku aei, ae mwamwanaa te aba taraakina. Iai ana berita te natannaomata aei ma te Atua, ao a taraa ni kakairi n ana Tua. Ma a bon aki onimaki ao a aki karikii uaa aika raraoi. A rawa naba nakon Natin te Atua! Ngaia are ngke e karaia te aroka ae te biiku Iesu, e a kaota te bwai ae e na riki nakon te natannaomata ae aki onimaki aei ae aki karikiuaa.

E aki maan ao a a roko i Ierutarem Iesu ma taan rimwina. N aron ae e taneiai iai Iesu, e nakon te tembora ao e moana ana angareirei. A bae mataniwi n ibonga ma aia unimwaane aomata n uringa ana mwakuri Iesu are ngkoananoa nakoia taan raimwane, ngaia are a a kaitaraa ni kangai: “E reke mai ia mwiokoam ni karaoi baikai? Ke antai ae mwiokoiko bwa ko na karaoi baikai?”​—Mareko 11:28.

E kaeka ni kangai Iesu: “N na titirakiningkami te titiraki teuana. Ngkana kam kaekaai ao N na tuangingkami naba bwa te mwioko raa ae I karaoi iai baikai. E mwiokoaki mai ia Ioane bwa e na bwabetito? Mai karawa ke mairouia aomata? Kaekaai.” A a manga boni kaitaraaki taani kakaaitaraa aikai. A iango i marenaia ibonga ao unimwaane bwa a na kangaa ni kaeka. “Ngkana ti kangai, ‘Mai karawa,’ ao ane e na kangai nakoira, ‘Ma e aera ngke kam aki kakoauaa?’ Ma tao ti na kangai, ‘Mairouia aomata’?” Bwa a maakuia te koraki, “bwa a bane n taku bwa bon te burabeti Ioane.”​—Mareko11:29-32.

E a aki kona n reke aia kaeka ae riai taani kaitaraa Iesu aikai, ngaia are a a kangai: “Ti aki ataia.” E a manga taku Iesu nakoia: “N na aki naba tuangingkami bwa te mwioko raa ae I karaoi iai baikai.”​—Mareko 11: 33.