Itaia 11:1-16
11 E na rikirake te mwaanga+ mani boton Iete,+Ao e na karikiuaa te bwebwe+ are mani wakaana.
2 Ao e na mena taamnein* Iehova i aona.*+
Anne bukina ae e na wanawana,+ e na bati ana ataibwai,E na anganga te reirei ni kairiri ae raoiroi, e na korakora,+E na bati ana atatai, ao e na korakora maakakin Iehova irouna.
3 Ao e na reke kimwareireina ni maakakin Iehova.+
E na aki motikitaeka n te baere noria ni matana,Ao e na aki naba boaa te aba tii ni kaineti ma te baere a ongo taningana.+
4 E na motiki taekaia akana mangori n te aro ae riai,*Ao e na boaa te aba n te raoiroi ibukia akana nimamannei n te aonnaba.
E na orea te aonnaba n ana kai ni katuuaa wina,+Ao e na kamateia akana buakaka n ikeiken* riana.+
5 E na riki te raoiroi bwa kabaean nukana,Ao te kakaonimaki bwa kabaeani bebeena.+
6 E na iraorao te kameaanti ma te tiibutetei,+Ao e na wene te rebwari i rarikin te kooti ae ataei,Ao a na ikotaki te kao te teei ao te raian ao te man ae kamarikaaki,*+Ao e na kaiririia te teei ae uarereke ae te mwaane.
7 A na uaia n amwarake te kao ma te bea,Ao a na uaia ni wene bunia.
E na kakana te uteute ae mwau te raian n aron te kao mwaane.+
8 E na takaakaro te teei ae mamma i aoni bwangan te naeta ae te kaobura,Ao te teei ae e a tia ni kakoriraki e na kaaki baina i aoni nnen te naeta ae boitin.
9 A na aki manga kaikoaki+Ke ni karaoi baika karuanikai, i aon au maunga ae tabu ni kabutaa,+Ibukina bwa e na boni buta te aonnaba n ataakin Iehova,N aron taari ngkai e kabutaa marawa.+
10 N te bong anne ao e na teirake wakaan Iete+ bwa te kanikina* ibukia botannaomata.+
A na rairaki nakoina natannaomata ibukin te kairiri,*+Ao e na tamaroa ana tabo ni motirawa.
11 N te bong anne ao e na manga anga baina Iehova n te kauatai ni kaokiia nikiraia ana aomata ake a tiku, mai Aturia,+ mai Aikubita,+ mai Bateroti,+ mai Kuti,*+ mai Eram,+ mai Tina,* mai Amata, ao man abamwakoron taari.+
12 E na katea te kanikina* ibukia natannaomata ao n ikotiia tibun Iteraera ake a kamaeinikunaki,+ ao e na ikotiia tibun Iuta ake a kamaenakoaki, mani maninganingan te aonnaba ake aua.+
13 E na nako te bakantang are iroun Eberaim,+Ao a na katiaaki aroia te koraki ake a kairiribai nakon Iuta.
E na aki manga bakantang Eberaim iroun Iuta,Ao e na aki naba kairiribai Iuta nakon Eberaim.+
14 Ao a na titiku rikaaki i aon aia karabee* I-Biritia nako maeao.
A na uaia ni kuribwaiia kaaini Mainiku.
A na arori baia n ekaanako* Etom+ ma Moaba,+Ao a na aantaeka tibun Ammon irouia.+
15 E na tibwatibwaa* Iehova te mwanoku* are ni marawan Aikubita,+Ao ni kateitea baina i etan te Karaanga.*+
E na orei* karaangana aika itiua n ikeikena ae kabuebue,Ao e na kamwanangaia aomata n rinanona nakon iterana, ma aia kau.
16 Ao e na iai te kawai ae totouaki+ ae otinako mai Aturia, ibukia nikiraia ana aomata ake a tiku,+N aron are iai ngkoa ibukin Iteraera n te bong are e otinako iai man te aba are Aikubita.
Taiani Kabwarabwara Mai Nano
^ Nora Nanon Taeka, “Taamnei.”
^ E kaineti nakon te mwaanga ao te bwebwe are n te kibu 1.
^ Nora Nanon Taeka, “Taamnei.”
^ Ke, “te raoiroi.”
^ Ke tao, “Ao a na uaia n amwarake te kao te teei ao te raian.”
^ Ke, “A na ukoukoria natannaomata.”
^ Ke, “te kai ae te kanikina.”
^ Ke, “Itiobia.”
^ Ae taekani Baburon.
^ Ke, “te kai ae te kanikina.”
^ Ebera, “angaia.”
^ Ke, “karokorokoi mwaakaia i aon.”
^ Ke tao, “kabwatakatakaa.”
^ Ebera, “te newe.”
^ Ae taekan te Iuberetiti.
^ Ke tao, “oreia ni karikia bwa.”
