1, 2. a) Dapré ou, poukisa lapriyè sa roun bèl kado ? b) Poukisa sa enpòrtan di savé sa Labib-a ka di asou lapriyè ?

 LÒ OU ka gadé inivèr-a, latè-a toupiti òbò l’. Lò Jéova ka gadé latè-a, moun-yan kou roun gout dlo pou li (Psaume 115:15 ; Isaïe 40:15). Menm si nou toupiti òbò inivèr-a, Psaume 145:18 ké 19 ka di : « Jéova pròch di tout sa ki ka aplé l’, di tout sa ki ka aplé l’ ké vérité. I ka bay sa-ya ki gen lakrent pou li tousa yé lé ; i ka tandé lò yé ka doumandé l’ idé yé, é i ka sové yé. » Jéova, Kréyatèr tou-pwisan-an lé pròch di nou : i lé divini nou Zanmi ! É i lé kouté nou lapriyè ! Lapriyè sa vréman roun kado ki bèl toubonnman é a roun bèl privilèj Jéova ka bay nou chak.

² Mé Jéova ké kouté nou sèlman si nou ka palé ké li kou i lé. Annou wè sa Labib-a ka di asou lapriyè.

3. Poukisa ou divèt priyè Jéova ?

³ Jéova lé ou palé ké li annan lapriyè. Kouman nou savé sa ? Li Philippiens 4:6 ké 7. Réfléchi asou sa Bondjé ka ankourajé ou fè : Souvéren inivèr-a ka sousyé so kò di ou bokou é i lé ou di li problèm ou ka jwenn é sa ou gen annan ou tchò.

4. Si ou ka priyè Jéova souvan, ou lanmityé ké li ké divini pi fò. Poukisa ?

⁴ Gras a lapriyè, ou lanmityé ké Jéova ké divini pi  fò. Lò dé zanmi gen labitid di yé konpanyen sa yé ka pansé é lò yé ka palé di yé problèm é di sa ki asou yé tchò, yé lanmityé ka divini pi fò. A menm bagaj-a lò nou ka priyè Jéova. Annan Labib-a i ka di ou sa i ka pansé, sa i ka rousanti é sa i ké fè dimen. Ou pouvé palé ké li souvan, ou pouvé menm di li sa ki ofon ou tchò. Si ou ka fè sa, ou lanmityé ké li ké divini pi fò (Jacques 4:8).

5. Kouman nou savé ki a pa tout lapriyè Jéova ka kouté ?

⁵ Ès a tout lapriyè Jéova ka kouté ? Non. Annan lépòk profèt Izayi, i di Israyélit-ya : « Zòt ka fè roun patché lapriyè, mé mo pa ka kouté zòt : zòt lanmen plen ké disan » (Isaïe 1:15). Si nou pa ka panga, pitèt nou ké fè bagaj ki ké fè nou lésé Jéova pitipiti. A sa moman-an i pa ké kouté lò nou ké priyè.

6. a) Poukisa lafwa enpòrtan toubonnman ? b) Kouman ou pouvé montré ki ou gen lafwa annan Bondjé ?

 ⁶ Si nou lé Jéova kouté lò nou ka priyè, nou divèt gen lafwa annan li (Marc 11:24). Apot Pòl ka di : « San lafwa, nou pa pouvé fè Bondjé plézi, paské sa-la ki ka vini douvan Bondjé divèt krè ki i ka èkzisté é ki i ka divini sa-la ki ka rékonpansé moun-yan ki ka chaché l’ ké tout yé tchò » (Hébreux 11:6). Mé a pa loutou di di nou gen lafwa annan Bondjé. Nou divèt obéyi chak jou pou montré ki nou gen lafwa (li Jacques 2:26).

7. a) Lò nou ka priyè Jéova, poukisa nou divèt fè nou kò toupiti é montré ki nou gen bokou rèspè ? b) Kouman nou pouvé montré ki nou sensèr lò nou ka priyè ?

⁷ Lò nou ka priyè Jéova, nou divèt fè nou kò toupiti é montré ki nou gen bokou rèspè. Poukisa ? Si nou té gen pou palé ké roun rwa ouben ké roun prézidan, nou té ké fè l’ ké rèspè. Jéova sa Bondjé Tou-Pwisan-an. A pou sa nou divèt palé ké li ké plis imilité épi ké plis rèspè ankò (Genèse 17:1 ; Psaume 138:6). Lò nou ka priyè Jéova nou divèt osi di vréman tousa ki annan nou tchò, a pou sa nou pa ké répété menm paròl-ya toulong (Matthieu 6:7, 8).

8. Lò nou ka priyè pou roun bagaj, kisa nou divèt fè ?

⁸ Lò nou ka priyè pou roun bagaj, nou divèt aji osi annan menm sans ké lapriyè nou fè-a. Parèkzanp si nou ka doumandé Jéova bay nou sa nou bézwen pou viv, nou pa pouvé fè fenyan. Si nou pouvé travay, nou pa pouvé rété la ka antann i bay nou tout bagaj. Nou divèt travay rèd é asèpté pran tout kalité travay nou pouvé fè (Matthieu 6:11 ; 2 Thessaloniciens 3:10). É si nou ka priyè Jéova pou i idé nou arété fè roun bagaj ki mové ? Nou pa divèt mété nou  kò annan sitiyasyon ki ké mété tantasyon douvan nou (Colossiens 3:5). Aprézan annou réponn plizyèr késyon asou lapriyè.

9. a) Kimoun nou divèt priyè ? b) Kisa Jean 14:6 ka anprann nou asou lapriyè ?

⁹ Kimoun nou divèt priyè ? Jézi anprann nou priyè « nou Papa ki annan syèl-a » (Matthieu 6:9). I di osi : « Mo sa chimen-an, lavérité ké lavi. Pyès moun pa pouvé alé òbò Papa-a san mo » (Jean 14:6). A pou sa a Jéova rounso nou divèt priyè é nou ka fè l’ o non di Jézi. Kisa sa lé di ? Pou Jéova asèpté nou lapriyè, nou divèt rèspèkté ròl i bay Jézi. Kou nou ja anprann annan sa liv-a, Jézi vini asou latè-a pou sové nou di péché ké lanmò (Jean 3:16 ; Romains 5:12). Jéova bay li osi ròl Gran Prèt ké Jij (Jean 5:22 ; Hébreux 6:20).

10. Ès nou divèt gen roun pozisyon èspésyal pou priyè ?

¹⁰ Ès nou divèt gen roun pozisyon èspésyal pou priyè ? Non. Jéova pa ka doumandé nou asiz, doubout ouben ajounou lò nou ka priyè. Labib-a ka anprann nou ki nou pouvé priyè annan nenpòrt ki pozisyon dipi sa pozisyon-an ka montré ki nou gen rèspè (1 Chroniques 17:16 ; Néhémie 8:6 ; Daniel 6:10 ; Marc 11:25). Sa ki ka konté pou Jéova, a pa nou pozisyon, mé sa ki annan nou tchò. Nou pouvé priyè fò ouben annan nou tchò, nenpòrt ki koté nou fika é nenpòrt ki moman annan lajournen ouben lannwit. Asiré pa pitèt Jéova ké kouté nou, menm si pyès ròt moun pa ka tandé nou (Néhémie 2:1-6).

11. Di kisa nou pouvé palé ké Jéova ?

¹¹ Pou ki bagaj nou pouvé priyè ? Nou pouvé  priyè Jéova pou tout kalité bagaj, dipi sa nou ka doumandé ka alé annan menm sans ké so volonté. Labib-a ka di : « Nenpòrt ki bagaj nou ka doumandé sélon so volonté, i ka tandé nou » (1 Jean 5:14). Ès nou pouvé priyè pou nou pròp zafè ? Wi. Priyè Jéova, a kousidiré ou ka palé ké roun bon zanmi. Nou pouvé palé ké li di tousa ki ka troumanté nou é di tousa nou gen asou nou tchò (Psaume 62:8). Nou pouvé doumandé li so lèspri sen ki pwisan pou nou rivé fè sa ki bon (Luc 11:13). Nou pouvé doumandé l’ osi sajès pou nou pran bon désizyon épi fòrs pou nou tchenbé anba traka (Jacques 1:5). Nou divèt doumandé li pardonnen nou péché (Éphésiens 1:3, 7). Nou divèt priyè osi pou ròt moun-yan, parèkzanp pou nou fanmi, é pou nou frè ké nou sò annan asanblé-a (Actes 12:5 ; Colossiens 4:12).

12. Kisa nou divèt sonjé an prémyé lò nou ka priyè ?

¹² Kisa nou divèt sonjé an prémyé lò nou ka priyè ? Jéova ké so volonté. Nou divèt di li mèrsi ké tout nou tchò pou tousa i ka fè pou nou (1 Chroniques 29:10-13). Kouman nou savé sa ? Lò Jézi té asou latè-a, i anprann so disip-ya priyè (li Matthieu 6:9-13). I di nou divèt priyè an prémyé pou non Bondjé sanktifyé (sa lé di pou tout moun wè l’ kou roun non ki sen ouben sakré). Apré sa i di priyè pou so Rwayonm vini é pou so volonté fèt asou latè-a. I èspliké ki a sèlman lò nou fini priyè pou sa bagaj enpòrtan-yan ki nou pouvé priyè pou nou pròp zafè. Si nou ka sonjé Jéova ké so volonté an prémyé annan nou lapriyè, nou ka montré ki a sa ki pi enpòrtan pou nou.

13. Ki longèr nou lapriyè divèt gen ?

 ¹³ Ki longèr nou lapriyè divèt gen ? Labib-a pa ka di anyen asou sa. Nou lapriyè pouvé kourt ouben long, sa ka dépann di sitiyasyon-an. Parèkzanp anvan nou manjé nou lapriyè pouvé kourt. Mé lò nou ka di Jéova mèrsi ouben lò nou ka palé l’ di nou problèm, nou lapriyè pouvé pi long (1 Samuel 1:12, 15). Nou pa ké fè lapriyè ki long pou fè moun wè, kou sèrten  moun té gen labitid fè annan lépòk Jézi (Luc 20:46, 47). Sa kalité lapriyè-ya pa gen pyès sans pou Jéova. Sa ki pi enpòrtan pou li a ki lapriyè nou ka fè ka vini di nou tchò.

14. Ès nou divèt priyè souvan ? É kisa sa ka anprann nou asou Jéova ?

¹⁴ Ès nou divèt priyè souvan ? Wi. Jéova ka ankourajé nou priyè l’ souvan. Labib-a ka di ki nou divèt « priyè toulong », « pèrsévéré annan lapriyè » é « priyè tout-tan » (Matthieu 26:41 ; Romains 12:12 ; 1 Thessaloniciens 5:17). Jéova toujou paré pou kouté nou. Nou pouvé di li mèrsi chak jou pou so lanmou é pou tousa i ka fè pou nou. Nou pouvé doumandé l’ osi gidé nou, konsolé nou épi bay nou fòrs. Si  lapriyè-a gen bokou valò pou nou, nou ké palé ké Jéova souvan.

15. Poukisa nou divèt di « anmèn » lò roun lapriyè fini ?

¹⁵ Poukisa nou divèt di « anmèn » lò roun lapriyè fini ? « Anmèn » lé di « asiré pa pitèt » ouben « a sa ki pou fèt ». Lò nou ka di « anmèn » a roun fason di montré ki nou sensèr, ki nou ka vréman pansé sa nou fini di (Psaume 41:13). Labib-a ka di nou osi ki a roun bon bagaj lò nou ka di « anmèn » (fò ouben annan nou tchò) lò roun lapriyè piblik fini pou montré ki nou dakò ké sa yé fini di (1 Chroniques 16:36 ; 1 Corinthiens 14:16).

16. Ès Jéova ka réponn lò nou ka priyè ?

¹⁶ Ès Jéova ka réponn lò nou ka priyè ? Wi. Labib-a ka di i sa Sa-la « ki ka tandé lapriyè-a » (Psaume 65:2). Jéova ka kouté lapriyè milyon moun ka fè ké tout yé tchò, é i ka réponn yé plizyèr fason.

17. Kouman Jéova ka sèrvi zanj-ya ké so sèrvitèr-ya asou latè-a pou réponn nou lapriyè ?

¹⁷ Pou réponn nou lapriyè, Jéova ka sèrvi zanj-ya ké so sèrvitèr-ya asou latè-a (Hébreux 1:13, 14). Parèkzanp, roun patché moun ja priyè Bondjé pou konprann Labib-a, é roun ti moman apré, roun Témwen Jéova vini wè yé. Labib-a ka montré ki zanj-ya gen roun ròl annan prédikasyon « bon nouvèl-a » (li Révélation 14:6). Épi bokou annan nou ja priyè pou roun problèm ouben roun bézwen èspésyal, é apré sa, roun frè ouben roun sò vini idé nou (Proverbes 12:25 ; Jacques 2:16).

18. Kouman Jéova ka sèrvi so lèspri sen ké Labib-a pou réponn lapriyè nou ka fè ?

 ¹⁸ Jéova ka sèrvi osi so lèspri sen pou réponn nou lapriyè. Lò nou ka doumandé li idé nou pou nou tchenbé rèd douvan roun problèm, i ka sèrvi so lèspri sen pou gidé nou é pou bay nou fòrs (2 Corinthiens 4:7). I ka sèrvi Labib-a osi pou réponn nou lapriyè é pou idé nou pran bon désizyon. Lò nou ka li Labib-a, nou pouvé trapé vèrsé ki ké idé nou. Anplis di sa, pannan réinyon-yan, Jéova pouvé fè ki roun moun ka di annan so répons sa nou bézwen tandé. Ouben i pouvé fè roun ansyen annan asanblé-a vini palé ké nou di roun lidé annan Labib-a ki ké idé nou (Galates 6:1).

19. Détan nou pouvé krè ki Jéova pa ka réponn nou lapriyè. Poukisa ?

¹⁹ Mé détan, nou pouvé pitèt doumandé nou kò : « Poukisa Jéova pòkò réponn mo ? » Jéova savé kitan é kouman pou i réponn nou lapriyè. É i savé sa nou bézwen. Annan sèrten sitiyasyon nou divèt kontinyé priyè Bondjé pou montré li ki sa nou ka di, a sa ki vréman annan nou tchò é ki nou vréman gen lafwa annan li (Luc 11:5-10). Détan i ka réponn di roun fason nou pa ka antann. Parèkzanp, si nou ka priyè pou roun sitiyasyon ki rèd, pasé i fè sitiyasyon-an disparèt, i pouvé bay nou fòrs pou nou tchenbé rèd (li Philippiens 4:13).

20. Poukisa nou divèt priyè Jéova souvan ?

²⁰ Lapriyè, a pa ti privilèj Jéova bay nou ! Asiré pa pitèt i ka kouté nou (Psaume 145:18). Plis nou ké priyè l’ ké tout nou tchò, plis nou lanmityé ké li ké divini fò.