LÉSON 7
A kisa ki rwayonm Bondjé-a ?
1. A kisa ki rwayonm Bondjé-a ?
Rwayonm Bondjé-a sa roun gouvèrnman ki annan syèl-a. I ké ranplasé tout sé ròt gouvèrnman-yan é i ké fè ki volonté Bondjé fèt ni annan syèl-a ni asou latè-a. A vréman roun bon nouvèl ! Sé moun-yan bizwen roun bon gouvèrnman é a sa rwayonm Bondjé-a ké mennen titalò. I ké fè tout sé moun-yan asou latè-a viv byen ansanm. — Li Daniel 2:44 ; Matthieu 6:9, 10 ; 24:14.
Tout rwayonm gen roun rwa. Jéova chwazi so Pitit, Jézi Kris, pou i sa Rwa di so rwayonm. — Li Révélation 11:15.
Gadé vidéyo A kisa ki Rwayonm Bondjé-a ?
2. Poukisa Jézi sa miyò Rwa-a ?
Pitit Bondjé-a sa miyò Rwa-a paské i bon é i ka défann sa ki jis (Matthieu 11:28-30). Anplis, i ké dirijé latè-a dipi laro syèl-a. Atò, a pa ti pwisans i gen pou édé nou. Apré so rézirèksyon, i routounen laro syèl-a é i asiz « òbò Bondjé a so drèt » pou antann i divini Rwa (Hébreux 10:12, 13). Apré, Bondjé fè li divini Rwa di so rwayonm. — Li Daniel 7:13, 14.
3. Kimoun ki ké dirijé ké Jézi ?
Roun group yé ka aplé « sé sen-yan » ké dirijé ké Jézi annan syèl-a (Daniel 7:18). Sé prémyé sen-yan ki té chwazi té sa sé apot fidèl-ya di Jézi. Jéova kontinyé chwazi wonm ké fanm fidèl, jis jòdla. Kou Jézi, yé ka résisité ké roun kò èspirityèl. — Li Jean 14:1-3 ; 1 Corinthiens 15:42-44.
Konmyen moun ké alé annan syèl-a ? Jézi té di ki yé té ké roun « piti troupo » (Luc 12:32). Yé ké 144 000 ki ké dirijé latè-a ké Jézi. — Li Révélation 14:1.
4. Kisa ki rivé lò Jézi divini Rwa ?
Rwayonm Bondjé-a koumansé dirijé an 1914 *. Kisa Jézi fè an prémyé lò i divini Rwa ? I jité Satan ké so démon-yan asou latè-a. Satan té tèlman kòlè, i koumansé simen problèm asou tout latè-a (Révélation 12:7-10, 12). Dipi sa tan-an, moun-yan gen pi bokou malò. Lagèr, lafamin, maladi-ya ké sé tranblémandétèr-ya ka fè parti di roun « sign » ki ka montré ki titalò Rwayonm-an ké dirijé latè-a. — Li Luc 21:7, 10, 11, 31.
5. Kisa rwayonm Bondjé-a ka fè jòdla ?
Gras a roun aktivité prédikasyon, rwayonm Bondjé-a ka rasanblé roun patché moun di tout péyi. Milyon wonm ké fanm ki enb ka chwazi viv anba dominasyon rwayonm Jézi ka dirijé-a. Rwayonm Bondjé-a ké protéjé yé lò i ké détrwi sa monn-an. A pou sa, tout sa ki lé profité di bénédiksyon sa rwayonm-an ké poté, divèt chwazi Jézi pou Rwa é obéyi li. — Li Révélation 7:9, 14, 16, 17.
Pannan 1 000 lannen, Rwayonm-an ké akonpli projè Bondjé té gen o koumansman pou sé moun-yan. Tout latè-a ké divini roun paradi. Pou fini, Jézi ké roubay so Papa Rwayonm-an (1 Corinthiens 15:24-26). Ès i gen roun moun ou té ké anvi palé di rwayonm Bondjé-a ? — Li Psaume 37:10, 11, 29.
^ § 6 Pou konnèt plis bagaj asou profési Labib-a ki té ka anonsé ki rwayonm Bondjé-a té ké koumansé dirijé an 1914, gadé liv Kisa Labib-a ka anprann nou ?, paj 217-220.
