Bondjé òrganizé désandan Abraam kou roun nasyon, é i bay yé roun séri lalwa. I aplé sa nasyon-an « Israyèl ». É yé té divèt pratiké ké protéjé vré rélijyon-an ké Paròl Bondjé-a (Psaume 147:19, 20). A konsa moun di tout nasyon té ké pouvé rousouvwè bénédiksyon gras a Israyèl. — Li Genèse 22:18.

Bondjé chwazi sé Israyélit-ya pou yé té sa so témwen. Yé istwè ka montré ki, lò nou ka obéyi lalwa Bondjé, nou ka trapé bénédiksyon (Deutéronome 4:6). Gras a sé Israyélit-ya, dòt moun di ròt nasyon té pouvé anprann konnèt vré Bondjé-a. — Li Isaïe 43:10, 12.

Pitipiti, Israyèl pédi favèr Bondjé. A pou sa Jéova chwazi asanblé krétyen-an pou ranplasé sa nasyon-an (Matthieu 21:43 ; 23:37, 38). Jòdla, a pa sé Israyélit-ya ki sa so témwen, mé a sé vré krétyen-yan. — Li Actes 15:14, 17.

Jézi òrganizé so disip pou yé préché é pou yé fè disip osi annan tout sé nasyon-yan (Matthieu 10:7, 11 ; 24:14 ; 28:19, 20). Sa travay-a ka fèt pannan dèrnyé jou-ya di sa monn-an, kou sa pa té janmen fèt anvan. A prémyé fwa Jéova ka rasanblé milyon moun di tout nasyon annan vré rélijyon-an (Révélation 7:9, 10). Sé vré krétyen-yan òrganizé pou ankourajé ké édé yé konpanyen. Toupatou asou latè-a yé ka swiv menm program ansèyman biblik-a pannan yé réinyon. — Li Hébreux 10:24, 25.

Annan sé lannen 1870-ya, roun piti group moun ki té ka étidyé Labib-a routrouvé plizyèr vérité ki té rété séré dipi roun bon moman. Lò yé konprann ki Jézi té òrganizé asanblé krétyen-an pou préché, yé koumansé préché Rwayonm-an asou tout latè-a. An 1931, yé désidé pran non Témwen Jéova. — Li Actes 1:8 ; 2:1, 4 ; 5:42.

Apré lanmò Jézi, i té gen asanblé krétyen-yan annan plen péyi. Roun kolèj santral (roun group wonm ki gen èspéryans) ki té ka rékonnèt Jézi kou Chèf asanblé-a, té ka dirijé yé (Actes 16:4, 5). Jòdla osi sé Témwen Jéova-ya gen dirèksyon roun Kolèj santral. A roun group ansyen ki gen èspéryans. Yé ka véyé asou sé filial-ya ki ka tradwi, ki ka enprimé é ki ka distribiyé piblikasyon ki bazé asou Labib-a annan plis di 800 lang. Konsa, i ka poté ankourajman ké dirèksyon pou plis di 120 000 asanblé annan monn-an. Annan chak asanblé i gen dé wonm ki ka ranpli kondisyon pou yé ansyen ou rèsponsab. A ké lanmou yé ka pran swen di « troupo Bondjé-a ». — Li 1 Pierre 5:2, 3.

Sé Témwen Jéova-ya òrganizé pou préché bon nouvèl-a é pou fè disip. Kou sé apot-ya, nou ka préché di kaz an kaz (Actes 20:20). Nou ka propozé sé moun-yan ki vréman kontan lavérité-a étidyé Labib-a. Mé nou pa sa roun òrganizasyon rounso. Nou sa roun fanmi ki gen roun Papa ki kontan nou. Nou sa frè ké sò, roun ka gadé pou ròt (2 Thessaloniciens 1:3). Sé adoratèr Jéova-ya òrganizé pou fè l’ plézi é pou édé sé lézòt-ya. A pou sa yé ka fòrmé fanmi-a ki pi éré asou latè-a. — Li Psaume 33:12 ; Actes 20:35.