1-2. a) Poukisa nou pouvé di ki nou sitiasyon ka sanblé ké sa di Jwif-ya ki routounen Jérizalèm ? b) Kisa ki rivé lò Jwif-ya routounen Jérizalèm ? (gadé frise chronologique-a «  Sa ki pasé annan lépòk Ajé, Zakari ké Èsdras »).

 ÈS SA ka rivé to pè pou dimen ? Pitèt to pédi to travay é to ka doumandé to kò kouman to ké bay to fanmi manjé. Ouben pitèt to pè pou to fanmi paské koté to ka rété-a, sitiasyon politik-a pa bon, yé ka pèrsékité nou ouben paské yé ka anpéché nou préché kou nou lé. Si a sa, sa artik-a ké ankourajé to bokou paské i ka èspliké kouman Jéova idé Jwif-ya tan-lontan lò yé jwenn sa kalité problèm-yan.

² Jwif-ya ki té viv Babilòn pannan tout yé lavi té divèt gen bokou lafwa pou lésé yé bèl ti lavi yé té gen annan sa péyi-a é pou yé alé annan roun péyi bokou annan yé pa té djè konnèt. Lò yé rivé laba, sa té rèd pou yé. Sa pa té fasil pou yé té bay yé fanmi manjé ké bwè. Nasyon-yan a yé lantou té ka éséyé baré yé chimen é i té gen roun patché problèm politik annan Anpir Pèrs-a. Akoz di sa, roun ran annan yé pa té ka rivé mété zafè roukonstrwi tanp Jéova-a an prémyé annan yé lavi. A pou sa, bò d’ lannen 520 anvan nou lépòk, Jéova voyé dé profèt, Ajé ké Zakari, pou idé Jwif-ya viré gen balan (Agg. 1:1 ; Zach. 1:1). Kou nou ké wè l’, sa profèt-ya rivé bay yé bokou balan. Mé apéprè 50 lannen pita, yé té dékourajé ankò. Èsdras, roun moun so travay a té roukopyé Lalwa é ki té vayan annan sa, soti Babilòn pou ankourajé yé mété vré ladorasyon-an an prémyé annan yé lavi (Esd. 7:1, 6).

3. Ki késyon nou ké réponn ? (Proverbes 22:19).

 ³ Profési Ajé ké Zakari idé sèrvitèr Bondjé-ya tan-lontan kontinyé fè Jéova konfyans lò yé té ka pèrsékité yé. É sa profési-ya pouvé idé nou, nou menm osi, pou nou kontinyé fè li konfyans lò nou ka jwenn problèm annan nou lavi (li Proverbes 22:19). Annan sa artik-a, nou ké wè mésaj Bondjé doumandé Ajé ké Zakari bay Jwif-ya é nou ké wè èkzanp Èsdras. Sa ké pèrmèt nou réponn sa késyon-yan : Kouman tout problèm Jwif-ya jwenn aji asou yé ? Poukisa nou divèt kontinyé mété volonté Jéova-a an prémyé annan nou lavi lò sitiasyon-an rèd pou nou ? É kouman nou pouvé fè Jéova ankò plis konfyans lò nou ka jwenn problèm annan nou lavi ?

4-5. Kisa ki pitèt fè Jwif-ya pédi balan yé té gen pou roukonstrwi Tanp-a ?

⁴ Lò Jwif-ya ki té prizonyé Babilòn rivé Jérizalèm, yé té gen bokou travay pou fè. Annan roun ti moman, yé roukonstrwi lotèl Jéova-a é yé mété fondasyon Tanp-a (Esd. 3:1-3, 10). Mé yé pédi balan yé té gen o koumansman vitman. Poukisa ? Paské, non sèlman yé té divèt roukonstrwi Tanp-a, mé anplis di sa yé té divèt fè yé kaz, rabouré latè, sonmen épi bay yé fanmi manjé (Esd. 2:68, 70). Épi osi, yé lèlmi pa té ka arété chaché roun mwayen pou anpéché yé roukonstrwi Tanp-a (Esd. 4:1-5).

⁵ Sa pa té fasil pou Jwif-ya ki té viré Jérizalèm pou yé té trapé sa yé té bézwen pou viv. É kou aprézan, a té Anpir Pèrs-a ki té ka dirijé péyi-a, yé té divèt fè ké sitiasyon politik-a ki pa té bon. Lò Siris, rwa Pèrs-a mouri an 530 anvan nou lépòk, a Kanbiz ki vin rwa apré li. I désidé alé fè lagèr ké Léjip. Lò yé té ka alé an Éjip, so sòlda dèt di Jwif-ya bay yé manjé, dlo ké roun koté pou rété. Donk, sa té dèt ankò pi rèd pou yé. Anplis di sa, lò Daryis I^é, sa-la ki vin rwa apré Kanbiz, koumansé dirijé, i té gen patché problèm toujou annan péyi-a. Moun-yan té ka révòlté kont gouvèrnman Pèrs-a. Akoz di sa, roun patché Jwif té divèt enkyèt é pitèt yé té ka doumandé yé kò kouman yé té ké fè pou pran swen di yé fanmi. Akoz di tout sa problèm-yan, roun ran annan yé té ka pansé ki a patékò bon moman-an pou roukonstrwi tanp Jéova-a (Agg. 1:2).

6. a) Ki ròt problèm Jwif-ya jwenn ? b) Dapré Zacharie 4:6, 7, kisa Jéova promèt Jwif-ya ?

⁶ (Li Zacharie 4:6, 7.) Jwif-ya pa té gen bokou bagaj pou viv é yé té ka rété annan roun péyi koté i té gen bokou problèm politik. Mé anplis di sa, yé lèlmi té ka pèrsékité yé. An 522 anvan nou lépòk, yé lèlmi rivé fè gouvèrnman Pèrs-a défann yé roukonstrwi Tanp-a. Mé, Zakari promèt yé ki Jéova té ké sèrvi so lèspri sen ki pwisan pou tiré tousa ki té ka baré yé chimen. É a sa ki fèt : an 520 anvan nou lépòk, rwa Daryis pèrmèt yé roukoumansé roukonstrwi Tanp-a é i bay yé soumaké pou fè l’. I jis bay gouvèrnèr péyi-ya lòrd idé yé (Esd. 6:1, 6-10).

7. Lò Jwif-ya ki té viré Jérizalèm mété volonté Bondjé-a an prémyé annan yé lavi, ki bénédiksyon yé trapé ?

 ⁷ Jéova sèrvi Ajé ké Zakari pou promèt so sèrvitèr ki i té ké idé yé si yé té ka mété zafè roukonstrwi Tanp-a an prémyé annan yé lavi (Agg. 1:8, 13, 14 ; Zach. 1:3, 16). Kou sa profèt-ya té ankourajé yé, Jwif-ya roukoumansé roukonstrwi  Tanp-a an 520 anvan nou lépòk é yé pa menm pran senk lannen pou fini l’. Kou yé mété volonté Jéova-a an prémyé annan yé lavi, menm si yé té ka jwenn problèm, Jéova idé yé gen sa yé té bézwen pou viv mé osi sa yé té bézwen pou yé té rété pròch ké li. Kisa sa bay ? Aprézan yé té pouvé adoré yé Bondjé ké tchò kontan (Esd. 6:14-16, 22).

8. Kouman sa ki marké annan Aggée 2:4 pouvé idé nou kontinyé mété volonté Bondjé-a an prémyé annan nou lavi ? (gadé nòt-a osi).

⁸ Gran tribilasyon-an ka rivé ké ti kouri ! Nou ka randé nou kò kont ki sa enpòrtan toubonnman pou nou obéyi lòrd yé bay nou-a : préché (Marc 13:10). Mé pitèt sa rèd pou nou mété prédikasyon-an an prémyé annan nou lavi si nou gen problèm soumaké ouben si yé ka éséyé baré nou chimen lò nou ka préché. Kisa ki pouvé idé nou mété Rwayonm-an an prémyé annan nou lavi ? A pou nou sir ki « Jéova chèf larmé-ya b » la òbò nou. I ké idé nou si nou ka kontinyé mété rwayonm an prémyé annan nou lavi. Donk, nou pa bézwen pè (li Aggée 2:4).

9-10. Kouman roun frè ké so madanm wè ki sa Jézi di annan Matthieu 6:33 vré ?

⁹ Annou palé di Oleg ké Irina c, roun frè ké so madanm ki pyonyé. Yé té alé viv rounòt koté pou idé roun asanblé é apré sa, yé pédi yé travay paské i té gen roun patché problèm soumaké annan péyi-a. Roun jou yé té gen travay, roun jou yé pa té gen travay. Yé rété konsa pannan roun lannen. Mé yé toujou wè Jéova idé yé ké bokou lanmou. É tanzantan, frè ké sò-ya té ka idé yé. Oleg, ki té dékourajé o koumansman, ka èspliké kouman li ké so madanm  kontinyé fè Jéova konfyans menm si sitiasyon-an té rèd : « Nou éséyé pasé bokou tan annan prédikasyon-an é sa pèrmèt nou kontinyé mété nou lidé asou sa ki pi enpòrtan annan lavi-a. » Toupannan yé té ka chaché roun travay, Oleg ké Irina kontinyé préché bokou.

¹⁰ Roun jou, yé té fin préché é yé té ka rantré annan yé kaz lò roun vwazen di yé ki roun di yé zanmi té fè 160 kilomèt pou mennen dé sak manjé bay yé. Oleg ka di : « Sa jou-a, sa kou-a ankò, nou byen wè ki Jéova ké asanblé-a ka vréman gadé pou nou. Nou sir di sa : Jéova pa janmen ka bliyé so sèrvitèr-ya menm si yé té ké di ki yé fin bat » (Mat. 6:33).

11. Si nou ka kontinyé mété volonté Bondjé-a an prémyé annan nou lavi, di kisa nou pouvé sir ?

¹¹ Jéova lé nou kontinyé fè disip, i lé nou mété sa an prémyé annan nou lavi paské sa ka pèrmèt moun-yan sové yé lavi. Kou nou di l’ annan  paragraf 7-a, Ajé ankourajé sèrvitèr Jéova-ya roukoumansé roukonstrwi Tanp-a kousidiré anyen pa té rivé anvan. Jéova promèt yé ki si yé té ka fè sa, i té ké ‘béni yé’ (Agg. 2:18, 19). Nou menm osi, nou pouvé sir ki Jéova ké béni éfòr nou ké fè si nou ka mété travay i bay nou fè-a an prémyé annan nou lavi.

12. Poukisa Èsdras ké Jwif-ya ki té prizonyé Babilòn é ki té ka vwayajé ké li té bézwen gen roun lafwa ki té fò ?

¹² An 468 anvan nou lépòk, Èsdras ké roun dézyèm group Jwif ki té prizonyé Babilòn, lésé Babilòn pou alé Jérizalèm. Yé lafwa té divèt fò pou fè roun vwayaj konsa paské larout-ya té danjéré é yé té ka poté roun ofrann Rwa-a té bay yé pou fè Tanp-a. Yé té gen bokou lò ké arjan. Donk volèr-ya té pouvé ataké yé (Esd. 7:12-16 ; 8:31). Anplis di sa, yé randé yé kò kont ki yé pa menm té an sékirité Jérizalèm. I pa té gen bokou moun é yé té divèt ranjé miray-ya ké lapòt-ya. Kouman èkzanp Èsdras pouvé idé nou fè Jéova konfyans ankò plis ?

13. Kisa ki idé Èsdras fè Jéova konfyans ankò plis ? (gadé nòt-a osi).

¹³ Èsdras té wè Jéova idé so sèrvitèr-ya lò yé té annan éprèv. Lontan anvan sa, an 484 anvan nou lépòk, lò Èsdras té ka rété Babilòn, Rwa Asiyéris té fè roun lalwa pou bay lòrd tchwé tout Jwif-ya annan tout Anpir Pèrs-a (Est. 3:7, 13-15). Èsdras ké tout ròt Jwif-ya té an danjé. Lò yé té tandé palé di sa lalwa-a, Jwif-ya ki té annan « tout provens-ya » té arété manjé é yé té fè kousidiré yé té an dèy. Yé té priyè Jéova pou i idé yé wè kisa yé té divèt fè (Est. 4:3). Imajiné sa Èsdras ké ròt Jwif-ya dèt rousanti lò finalman yé tchwé sa-ya menm ki té lé tchwé yé ! (Est. 9:1, 2). Sa Èsdras viv annan sa lépòk-a dèt préparé li pou éprèv-ya i té ké jwenn pita é sa dèt idé li vin ankò plis sir ki Jéova pouvé protéjé so sèrvitèr d.

14. Lò roun sò wè sa Jéova fè pou li lò i té annan traka, kisa sa anprann li ?

¹⁴ Lò nou anba traka é nou ka wè Jéova pran swen di nou, nou ka fè li konfyans ankò plis. Annou wè sa ki rivé Anastassia ki ka rété an Éròp dé lès. Kou i pa té lé mélé annan lapolitik, i démisyoné. I ka di : « A té prémyé fwa mo pa té gen soumaké ». I ka di ankò : « Mo di Jéova annan ki sitiasyon mo té fika é mo wè kouman i  byen pran swen di mo. Si roun jou mo pa gen travay ankò, mo pa ké pè. Si mo Papa ki annan syèl-a ka pran swen di mo jòdla, i ké pran swen di mo dimen osi. »

15. Kisa ki idé Èsdras kontinyé fè Jéova konfyans ? (Esd. 7:27, 28).

¹⁵ Lò Jéova té ka fè bagaj pou li, Èsdras té ka wè l’. Èsdras réfléchi asou tousa Jéova té fè pou idé l’ é sa dèt idé l’ kontinyé fè li konfyans. Men sa i di : « Jéova mo Bondjé té la ké mo » (li Esdras 7:27, 28). É i di apéprè senk fwa menm bagaj-a annan liv-a ki ka poté so non (Esd. 7:6, 9 ; 8:18, 22, 31).

16. Annan ki kalité sitiasyon nou pouvé byen wè Jéova aji annan nou lavi ? (gadé zimaj-a osi).

¹⁶ Lò nou ka jwenn roun problèm, Jéova pouvé idé nou. Mé nou divèt lésé Jéova montré nou ki i ka fè roun bagaj pou nou. Kouman nou pouvé fè sa ? Parèkzanp, nou pouvé doumandé nou patron bay nou jou konjé pou nou alé annan roun gran asanblé ouben nou pouvé doumandé li chanjé nou lèr travay pou nou pouvé alé annan tout nou réinyon. Pitèt nou ké rété èstébékwé lò nou ké wè ki rézilta-a pi bon pasé sa nou té ka antann é sa ké pèrmèt nou fè Jéova plis konfyans.

17. Kouman Èsdras té ka montré ki i té gen imilité lò sa té rèd pou li ? (gadé zimaj-a anlè prémyé paj-a).

¹⁷ Èsdras té gen imilité, i té ka doumandé Jéova idé li. Chak fwa Èsdras té ka santi ki i pa té pouvé ankò ké tout rèsponsabilité i té gen, i té ka priyè Jéova ké imilité (Esd. 8:21-23 ; 9:3-5). Kou Èsdras té ka konté asou Jéova, sa té ka pousé ròt-ya idé li épi imité so lafwa (Esd. 10:1-4). Lò afòrs nou enkyèt nou gen mal vant paské nou pa savé kouman nou ké fè pou manjé ké bwè ouben paské nou pè pou nou fanmi, annou priyè Jéova ké lafwa.

18. Kisa ki ké pèrmèt nou fè Jéova plis konfyans ?

¹⁸ Nou ké fè Jéova plis konfyans si, ké imilité, nou ka doumandé l’ idé nou é si nou ka asèpté nou frè ké so-ya idé nou. Erika, ki gen trwa timoun, savé a kisa ki pédi moun nou kontan : annan roun ti moman, i fè roun fos kouch é so mari mouri. Mé i pa janmen arété fè Jéova konfyans. Men sa i ka konprann : « To pa jen savé kouman Jéova ké idé to. Détan, fason i ka idé to-a ka fè to rété èstébékwé. Mo wè ki souvan, i sèrvi mo zanmi pou réponn mo lapriyè. Souvan, yé di ouben yé fè roun bagaj é mo sir a té Jéova ki té ka  réponn mo. Si nou ka di nou zanmi sa nou gen asou nou tchò, sa ké pi fasil pou yé idé nou ».

19-20. Kisa èkzanp Jwif-ya ki pa rivé routounen Jérizalèm ka anprann nou ?

¹⁹ Èkzanp Jwif-ya ki pa rivé routounen Jérizalèm pouvé anprann nou roun patché bagaj osi. Akoz di yé laj, roun maladi ki grav ouben paské yé té gen fanmi pou okipé, roun ran annan yé pa té pouvé pati. Magré sa, yé soutni sa-ya ki routounen Jérizalèm. Yé bay yé roun patché bagaj yé té ké bézwen pou Tanp-a (Esd. 1:5, 6). Aparaman, apéprè 19 lannen pita, apré prémyé group Jwif-a té rouvini Jérizalèm, yé té toujou gen labitid voyé bagaj pou idé yé (Zach. 6:10).

²⁰ Menm si nou pa pouvé fè tousa nou té ké lé fè pou Jéova, nou pouvé sir ki i kontan tout éfòr nou ka fè ké tout nou tchò pou fè l’ plézi. Poukisa nou pouvé sir di sa ? Jéova doumandé profèt Zakari sèrvi lò ké arjan Jwif-ya ki té rété Babilòn té voyé pou fè roun kouròn ké sa (Zach. 6:11). Sa ‘kouròn-an ki té bèl toubonnman’ té divèt rété annan tanp Jéova-a « pou sonjé » ofrann yé té bay ké tout yé tchò (Zach. 6:14, nòt). Men sa nou pouvé sir : Jéova pa ké janmen bliyé tout éfòr nou ka fè ké tout nou tchò pou adoré l’, menm si nou ka jwenn traka (Héb. 6:10).

21. Kisa ki ké idé nou pa pè pou dimen ?

²¹ Annan sa dèrnyé jou-ya, nou sir nou ké trapé problèm é anyen pa ké ranjé annan sa monn-an (2 Tim. 3:1, 13). Mé annou pa enkyété nou kò tròp. Annou sonjé sa Jéova di so sèrvitèr annan lépòk Ajé : « Mo la ké zòt […]. Pa pè » (Agg. 2:4, 5). Nou menm osi, a pou nou sir ki Jéova ké la ké nou si nou ka kontinyé fè sa nou pouvé pou nou fè so volonté. Si nou ka apliké sa nou anprann annan profési Ajé ké Zakari, é si nou ka swiv èkzanp Èsdras, nou ké kontinyé fè Jéova konfyans kèlkéswa traka nou ké jwenn dimen.