SI ZÒT alé asou zilé Sangir, an Endonézi, i ja gen plizyèr lannen, pitèt zòt wè trwa di nou sò asou plaj-a. Moun-yan ki asou sa zilé-a byen konnèt yé paské yé ka préché ; yé ka idé moun-yan konprann Labib-a. Mé sa kou-a, yé té ka fè roun bagaj konplètman diféran asou plaj-a.

Pou koumansé, yé té ka maché annan dlo-a é yé té ka charyé gro ròch asou plaj-a. Sèrten ròch té gro kou roun balon foutbol. Apré sa, sa madanm-yan té ka asiz asou ti ban an bwa épi, ké roun marto, yé té ka kasé sa gro ròch-ya pou fè ti ròch gro kou dizé poul. Yé té ka mété sa ti ròch-ya annan syo plastik, é yé té ka monté roun èskalyé pou mennen yé jik annan yé kaz. Apré sa, yé té ka mété yé annan gran sak pou moun mété yé annan kamyon pou sèrvi yé apré pou fè larout.

Annan sa sò-ya, i té gen Hulda. So sitiasyon té ka pèrmèt li pasé plis tan ka fè sa pasé dé ròt sò-ya. An jénéral, i té ka sèrvi tout soumaké i té ka ganyen pou bay so fanmi sa i té bézwen pou viv chak jou. Mé la, i té gen rounòt òbjèktif. I té lé achté roun tablèt élèktronik pou sèrvi aplikasyon JW Library^®. Hulda té savé ki vidéyo-ya ké tout ròt bagaj i gen asou sa aplikasyon-an té ké pèrmèt li préché pi byen épi konprann Labib-a pi byen.

Pannan roun mwa é dimi, Hulda travay dézèr chak maten é i kasé asé ròch pou plen roun ti kamyon. Anfen i té gen asé soumaké pou achté roun tablèt.

Hulda ka di : « Mo té las, é tout mo kò té ka fè mo mal afòrs mo té kasé ròch. Mé lò mo koumansé sèrvi sa nouvo tablèt-a ki ka pèrmèt mo vin pi vayan annan prédikasyon-an é préparé mo réinyon pi fasilman, tout doulò-ya pati. » I di osi ki so tablèt idé l’ bokou lò pandémi-a koumansé, paské tousa asanblé-a té ka fè, a té asou Entèrnèt. Nou byen kontan Hulda rivé fè sa i té désidé.