ARTIK POU ÉTIDYÉ 4
KANTIK 18 Nou tchò plen ké rékonésans pou ranson-an
Kisa ranson-an ka anprann nou ?
« Men kouman Bondjé montré i kontan nou » (1 JEAN 4:9).
SA NOU KÉ ANPRANN
Nou ké wè sa ranson-an ka anprann nou asou bèl kalité Jéova ké Jézi gen.
1. Poukisa sa bon pou nou di alé annan Mémoryal-a chak lannen ?
TO DÈT dakò pou di ki ranson-an a roun kado ki bèl toubonnman ! (2 Cor. 9:15). Kou Jézi bay so lavi, to pouvé vin zanmi Jéova é to gen èspwar viv pou tout-tan. Nou gen roun patché rézon ka fè nou di nou Bondjé mèrsi pou sa kado i fè nou-a paské i kontan nou ! (Rom. 5:8). Pou idé nou kontinyé gen rékonésans pou ranson-an é pou nou pa janmen di ki a roun ti bagaj, Jézi doumandé nou fè Mémoryal-a pou sonjé so lanmò chak lannen (Luc 22:19, 20).
2. Kisa nou ké wè annan sa artik-a ?
2 Sa lannen-an, Mémoryal-a ké fèt sanmdi 12 avril 2025. Asiré, nou tout ja prévwè alé annan Mémoryal-a. Mé, pannan lépòk Mémoryal-a, annou pran tan réfléchi osi asou sa Jéova ké so pitit fè pou nou, konsa nou ké trapé roun patché bénédiksyon. Annan sa artik-a, nou ké wè sa ranson-an ka anprann nou asou Jéova ké Jézi. Épi annan artik ki ka swiv-a nou ké wè ki bénédiksyon ranson-an ka pèrmèt nou gen é kouman nou pouvé montré nou rékonésans pou sa bèl kado-a.
SA RANSON-AN KA ANPRANN NOU ASOU JÉOVA
3. Kouman roun patché moun rivé sové grasa lanmò rounsèl moun ? (gadé zimaj-a osi).
3 Ranson-an ka anprann nou roun patché bagaj asou jistis Jéova-a (Deut. 32:4). Réfléchi asou sa : A Adan ki bay nou péché-a pas i dézobéyi Bondjé, é akoz di sa, nou ka mouri (Rom. 5:12). Pou libéré nou ni di péché-a ni di lanmò-a, Jéova voyé Jézi pou bay ranson-an. Mé kouman sakrifis rounsèl moun té ké pouvé sové roun patché moun ? Men sa Apot Pòl ka di : « Menm fason patché moun vin gen péché akoz di dézobéyisans sa sèl wonm-an [Adan], menm fason-an osi roun patché moun ké divini jis douvan Bondjé grasa sa sèl moun-an [Jézi] ki obéyi » (Rom. 5:19 ; 1 Tim. 2:6). Kou Pòl ka èspliké l’, menm fason akoz di rounsèl moun ki té parfè mé ki dézobéyi nou divini èsklav péché-a ké lamò-a, a grasa rounsèl moun ki té parfè é ki obéyi ki Bondjé pouvé libéré nou.
Akoz di rounsèl moun, nou èsklav péché-a ké lanmò. É grasa rounsèl moun, Bondjé pouvé libéré nou (gadé paragraf 3).
4. Poukisa Jéova pa lésé pitit Adan ki té ké obéyi l’ viv pou tout-tan ?
4 Ès Jézi té blijé mouri pou sové nou ? Ès Jéova pa té pouvé désidé lésé pitit Adan ki té ké obéyi viv pou tout-tan ? Kou nou pa parfè, pitèt nou ka pansé ki sa té ké roun bon fason pou i réglé problèm-an. Mé a pa konsa jistis Jéova-a ki parfè ka maché. Si i té fè sa, sa té ké lé di ki Adan pa té fè pyès péché é ki so pitit té parfè. Mé sa pa vré.
5. Poukisa nou pouvé sir ki Jéova ké toujou fè sa ki jis ?
5 Kisa ki té ké pasé si Jéova pa té bay ranson-an é té lésé pitit Adan ké Èv viv pou tout-tan menmsi yé pa té parfè ? Si i té fè sa, i pa té ké swiv so prensip asou sa ki bon ké sa ki mové. É pitèt nou té ké doumandé nou kò si i pa té ké mété so jistis asou koté annan rounòt sitiasyon ? Parèkzanp, ès i té ké tchenbé tout promès i fè ? Mé a pa pou nou enkyèt : sa pa ké janmen rivé. Kou i aji ké jistis magré sa té rèd pou li pas i té divèt sakrifyé so pitit i té kontan, nou pouvé sir ki i ké toujou fè sa ki jis.
6. Poukisa nou pouvé di ki ranson-an ka montré nou ki Jéova kontan nou ? (1 Jean 4:9, 10).
6 Ranson-an ka pèrmèt nou konprann ki Jéova jis, mé pi enpòrtan-an i ka pèrmèt nou konprann ki i plen ké lanmou (Jean 3:16 ; li 1 Jean 4:9, 10). Ranson-an ka anprann nou ki Jéova lé nou viv pou tout-tan, mé i lé osi ki nou fè parti di so fanmi. Sonjé sa : Lò Adan péché, Jéova mété l’ dèrò di so fanmi. A pou sa, lò nou ka fèt, nou pa ka fè parti di fanmi Jéova-a. Mé grasa ranson-an, Jéova ka pardonnen nou péché é roun jou tout sa ki gen lafwa annan li é ki ka obéyi li ké pouvé fè parti di so fanmi. Anplis di sa, dipi jòdla nou pouvé divini so zanmi ké zanmi sa-ya ki ka adoré l’. Asiré pa pitèt, Jéova kontan nou bokou ! (Rom. 5:10, 11).
7. Jézi soufri bokou pou bay ranson-an, kisa sa ka anprann nou asou lanmou Jéova gen pou nou ?
7 Nou ké pi byen konpran fòrs lanmou Jéova gen pou nou si nou ka réfléchi asou kouman i soufri lò i wè yé malmennen so Pitit. Satan ka di ki pyès sèrvitèr Bondjé pa ké rété li fidèl anba éprèv. Pou montré ki a pa vré, Jéova pèrmèt so pitit soufri anvan i mouri (Job 2:1-5 ; 1 Pierre 2:21). I wè chèf rélijyé-ya ari di li, i wè plizyèr sòlda bay li kout fwèt jiktan i senyen é i wè yé maré l’ asou roun poto. Apré sa, i wè li soufri jiktan i mouri (Mat. 27:28-31, 39). Si i té lé, i té pouvé fè moun arété fè so pitit soufri lanmenm. Parèkzanp, lò yé di : « Si Bondjé kontan l’, a pou i sové li aprézan », i té pouvé fè l’ (Mat. 27:42, 43). Mé, si i té fè roun bagaj, i pa té ké gen ranson é jòdla nou pa té ké gen pyès èspwar. Donk, i lésé so Pitit soufri jiktan i mouri.
8. Lò Jéova wè so Pitit soufri, ès so tchò fè l’ mal ? Èspliké (gadé zimaj-a osi).
8 A pa pou nou di ki kou Bondjé pwisan, i pa ka rousanti anyen ! I fè nou kou li menm, donk si nou ka rousanti sèrten bagaj, li menm osi ka rousanti sa bagaj-ya. Labib ka di ki détan, Jéova té gen « lapenn » (Ps. 78:40, 41). Lò Jéova wè so Pitit soufri, ès so tchò fè l’ mal ? Pou nou réponn sa késyon-an, annou palé di Abraam ké Izaak. Kou to ja savé, Jéova doumandé Abraam bay so sèl pitit an sakrifis (Gen. 22:9-12 ; Héb. 11:17-19). Imajiné sa Abraam dèt rousanti lò i té k’alé pou tchwé so pròp pitit, Izaak. Mé Jéova li menm, so tchò dèt fè l’ mal ankò plis é i dèt soufri ankò plis lò i wè moun ki pa té gen lafwa fè so Pitit méchansté épi malmennen l’ jiktan i mouri ! (gadé vidéyo Imitez leur foi : Abraham [partie 2] asou jw.org).
Tchò Jéova fè l’ mal bokou lò i wè so Pitit soufri (gadé paragraf 8).
9. Kouman Romains 8:32, 38, 39 ka idé to konprann fòrs lanmou Jéova gen pou to ké pou to frè ké sò-ya ?
9 Ranson-an ka anprann nou ki i pa gen pyès moun ki kontan nou kou Jéova — pa menm moun nou fanmi nou pi kontan ni nou pi bon zanmi (li Romains 8:32, 38, 39). É asiré, Jéova kontan nou plis pasé nou menm nou kontan nou pròp kò. Ès to lé viv pou tout-tan ? Jéova lé sa plis pasé to. Ès to lé i pardonnen to péché ? La ankò, Jéova lé sa plis pasé to. Sèl bagaj i ka doumandé nou fè, a montré ki nou gen lafwa annan li épi obéyi li pou montré ki nou ka asèpté bèl kado i fè nou-a. Ranson-an ka montré nou kouman i kontan nou. É annan monn nouvo-a, nou ké anprann ankò plis bagaj asou sa i fè pou nou paské i kontan nou (Eccl. 3:11).
SA RANSON-AN KA ANPRANN NOU ASOU JÉZI
10. a) Kisa ki raché tchò Jézi ? b) Kouman Jézi sanktifyé non Jéova-a ? (gadé osi karé-a : « Grasa so fidélité, Jézi sankfyé non Jéova-a »).
10 Sa moun ka di asou so Papa enpòrtan pou Jézi (Jean 14:31). Jézi té savé ki yé té ké akizé l’. Yé té ké di ki i dérèspèkté Bondjé é ki i sa roun kriminèl, é i té savé ki yé té ké tchwé l’ akoz di sa. Sa manti-ya té ka riské sali non so Papa é sa té ka raché so tchò. A pou sa i priyè é i di : « Mo Papa, si sa posib, fè sa koup-a pasé lwen di mo » (Mat. 26:39). Jézi rété fidèl jiktan i mouri é a konsa i sanktifyé non Jéova-a.
11. Kouman Jézi montré ki i té kontan moun-yan bokou ? (Jean 13:1).
11 Ranson-an ka anprann nou osi ki Jézi ka gadé pou moun-yan, èspésyalman so disip (Prov. 8:31 ; li Jean 13:1). Jézi té savé ki sèrten bagaj i té ké gen pou fè asou latè-a té ké rèd, parèkzanp, i té ké divèt soufri jiktan i mouri. Mé Jézi pa fè tout sa bagaj-ya ki té rèd jis paské Jéova té doumandé li fè sa. I fè l’ paské i té kontan moun-yan. I préché, i ansényé é i idé moun ké bokou lanmou. Menm dèrnyé jou-a anvan i mouri, i pran tan lavé pyé so apot, ankourajé yé épi fòrmé yé (Jean 13:12-15). É lò i té asou poto soufrans-a, menm si té ka soufri, Jézi bay bandi-a ki té òbò li roun èspwar, i di li ki i té ké annan paradi-a é anplis di sa, i pran tan gadé pou so manman, i doumandé Jan okipé di li (Luc 23:42, 43 ; Jean 19:26, 27). Donk, a pa sèlman lò i mouri i montré nou ki i kontan nou, i montré sa pannan tout so lavi osi.
12. Poukisa nou ka di ki Jézi ka kontinyé fè sakrifis pou nou ?
12 Menmsi Jézi mouri « rounsèl kou pou tout-tan », i ka kontinyé fè sakrifis pou nou (Rom. 6:10). I ka travay rèd pou bay nou sèrten bagaj nou pouvé gen aprézan grasa ranson-an. Sonjé tousa i ka fè pou nou. I Rwa, i Gran Prèt é a li ki chèf asanblé-a (1 Cor. 15:25 ; Éph. 5:23 ; Héb. 2:17). I ka rasanblé wen-yan ké granfoul-a é i divèt fè l’ anvan gran tribilasyon-an fini a (Mat. 25:32 ; Marc 13:27). I ka fè sa ki fo pou so disip gen manjé yé bézwen annan domenn èspirityèl-a pannan dèrnyé jou-ya (Mat. 24:45). É pannan mil lannen-yan i ké dirijé nou, i ké kontinyé fè bagaj pou nou. Jéova vréman bay so Pitit pou nou !
PA JANMEN ARÉTÉ ANPRANN
13. Kisa to pouvé fè pou to kontinyé anprann plis bagaj asou lanmou Jéova ké Jézi gen pou to ?
13 Si to toujou ka pran tan réfléchi asou sa Jéova ké Jézi fè pou to, to ké toujou anprann plis bagaj asou lanmou yé gen pou to. Sa lannen-an parèkzanp, to pouvé li roun ouben plizyèr Lévanjil pannan lépòk Mémoryal-a. Pa éséyé li tròp rounsèl kou. Miyò to li roun ti moso mwens, konsa, to ké pouvé pran tan fè réchèrch pou anprann bagaj to pa té konnèt é ki ké fè to kontan Jéova ké Jézi ankò plis. Apré sa, fè tousa to pouvé pou to partajé sa to anprann ké ròt-ya.
14. Dapré Psaume 119:97, kouman to pouvé kontinyé anprann nouvo bagaj asou ranson-an ké ròt ansèyman ankò ? (gadé zimaj-a osi).
14 Si to batizé dipi roun patché lannen, pitèt to pouvé doumandé to kò si i gen bagaj pou to anprann toujou asou jistis Jéova-a, so lanmou ké ranson-an. Pou byen di, nou ké toujou gen bagaj pou anprann asou sa bagaj-ya ké ròt ankò. Atò kisa to pouvé fè ? Pran tan li épi étidyé tout enfòrmasyon nou gen asou Labib annan nou piblikasyon-yan. É lò to ka tonbé asou roun vèrsé to pa ka byen konprann, fè réchèrch. Épi pannan tout lajournen, réfléchi asou sa to étidyé é asou sa sa ka anprann to asou Jéova, so Pitit ké lanmou yé gen pou to (li Psaume 119:97).
Menmsi nou annan lavérité-a dipi roun patché lannen, nou pouvé fè sa ki fo pou nou gen plis rékonésans pou ranson-an (gadé paragraf 14).
15. Poukisa nou divèt kontinyé chaché pépit èspirityèl ?
15 Si to pa ka trouvé pyès nouvo bagaj ouben pyès bagaj entérésan chak fwa to ka étidyé ouben to ka fè réchèrch, pa dékourajé. To kou moun ka chaché lò ké roun baté. Moun ki ka chaché lò divèt gen bokou pasyans. Détan, yé ka travay lontan, plizyèr jou menm, anvan yé trapé rounsèl ti pépit. Mé yé pa ka lésé tonbé paské menm roun ti moso lò gen bokou valò. Enben, pou nou, chak pépit èspirityèl gen plis valò pasé lò ! (Ps. 119:127 ; Prov. 8:10). Atò, a pou to gen pasyans é a pou to swiv program to fè pou li Labib-a (Ps. 1:2).
16. Kouman nou pouvé imité Jéova ké Jézi ?
16 Lò to ka étidyé, doumandé to kò kouman to pouvé apliké sa to ka anprann. Parèkzanp, to pouvé imité jistis Jéova-a si to pa ka fè préférans. To pouvé imité lanmou Jézi gen pou so Papa ké pou ròt-ya si to paré pou soufri pou défann non to Bondjé é si to ka fè tousa to pouvé pou idé to frè ké sò-ya. É to pouvé imité Jézi si to ka préché pou tout moun, pou yé menm osi gen posibilité asèpté bèl kado Jéova ka fè yé.
17. Di kisa nou ké palé annan artik ki ka vin dèyè-a ?
17 Pi nou ké konprann ranson-an, pi nou ké gen rékonésans pou Jéova ké so Pitit é pi nou ké kontan yé. Yé menm osi ké kontan nou ankò plis (Jean 14:21 ; Jacq. 4:8). Donk, annou profité di tousa Jéova ka bay nou pou nou anprann plis bagaj asou ranson-an. Annan artik ki ka vin dèyè-a, nou ké wè déztrwa bénédiksyon ranson-an ka pèrmèt nou gen é nou ké wè kouman nou pouvé di Jéova mèrsi pou so lanmou.
KANTIK 107 Annou imité lanmou Bondjé
a Annan Éphésiens 1:10, Pòl ka di ki Bondjé ké « mété tout bagaj ansanm grasa Kris, bagaj-ya ki annan syèl-a ké bagaj-ya ki asou latè-a ». Jézi pa ka palé di menm bagaj-a annan Matthieu 24:31 ké Marc 13:2, koté i ka di ki zanj-ya ké rasanblé sa-ya Bondjé « chwazi ». Pòl ka palé di lépòk Jéova ka chwazi sa-ya ki ké dirijé ké Jézi lò i ké wen yé ké lèspri sen. Jézi li menm, ka palé di lò krétyen wen-yan ki asou latè-a toujou ké alé annan syèl-a lò gran tribilasyon-an ké fini.
