ARTIK POU ÉTIDYÉ 6
KANTIK 18 Nou tchò plen ké rékonésans pou ranson-an
Poukisa nou gen rékonésans pou pardon Jéova-a ?
« Bondjé té tèlman kontan monn-an ki i bay so sèl Pitit » (JEAN 3:16).
SA NOU KÉ ANPRANN
Nou ké wè sa Jéova fè pou i pouvé pardonnen nou péché. Sa ké idé nou gen plis rékonésans pou pardon Jéova-a.
1-2. Poukisa nou pouvé di ki nou sitiasyon ka sanblé ké sitiasyon jennjan-an nou palé annan paragraf 1-an ?
IMAJINÉ sa : Roun jennjan ka viv ké so papa ké so manman ki rich. Mé roun jou, so paran ka mouri annan roun aksidan. Jennjan-an krazé nèt. Mé i gen rounòt vyé nouvèl : i ka anprann ki so papa ké so manman manjé tout soumaké-a é ki yé lésé roun patché dèt asou so kont. Donk, i pa ké ganyen pyès soumaké. Pasé sa, i ké gen pou péyé tout dèt so papa ké so manman lésé bay li, é moun-yan lé i péyé sa lanmenm ! Mé problèm-an, a ki i pa ké janmen rivé ranboursé tout sa dèt-ya.
2 Nou pouvé di ki nou sitiasyon ka sanblé ké sitiasyon sa jennjan-an. Nou prémyé papa ké manman, Adan ké Èv, té parfè é yé té ka rété annan roun bèl paradi (Gen. 1:27 ; 2:7-9). Yé té pouvé viv roun bèl lavi pou tout-tan. Mé roun jou, tout bagaj chanjé. Bondjé mété yé dèrò di paradi-a é yé pa té pouvé viv pou tout-tan ankò. Ki éritaj yé té pouvé lésé bay yé timoun ? Labib ka di : « Akoz di rounsèl wonm [Adan], péché-a antré annan monn-an é akoz di péché-a lanmò antré osi, é a konsa lanmò détenn asou tout moun paské yé tout té péché » (Rom. 5:12). Sa Adan lésé pou nou, a péché-a. É akoz di péché-a, nou ka mouri. Péché nou érité-a, a kou roun gro dèt nou pyès pa pouvé ranboursé (Ps. 49:8).
3. Poukisa nou pouvé di ki lò nou ka péché, a kousidiré nou gen roun dèt ?
3 Labib ka di ki péché-a kou roun « dèt » (Mat. 18:32-35). Lò nou ka péché, a kousidiré nou ka dévé Jéova soumaké, é pi nou ka péché, pi nou ka dévé l’. I gen drwa doumandé nou péyé pou péché nou fè-ya. Si i pa té fè sa ki fo pou pardonnen nou péché, nou té ké divèt mouri pou péyé nou péché é nou pa té ké gen pyès èspwar rouviv (Rom. 6:7, 23).
4. a) Si Bondjé pa té idé nou, kisa ki té ké rivé tout sa ki ka péché ? (Psaume 49:7-9). b) Annan Labib, « péché »-a, a kisa ? (gadé karé-a : « Péché-a »).
4 Ès nou pouvé viré gen tousa Adan ké Èv pédi ? Nou pa pouvé rivé fè l’ nou rounso (li Psaume 49:7-9). Si Bondjé pa té idé nou, nou pa té ké gen èspwar ni viv pou tout-tan ni résisité. Anfèt, nou té ké kou zannimo-ya. Nou té ké mouri san nou pa janmen gen èspwar rouviv ankò (Eccl. 3:19 ; 2 Pierre 2:12).
5. Kisa nou Papa ki kontan nou fè pou i té pouvé débarasé nou di péché Adan bay nou-a ? (gadé zimaj-a).
5 Sonjé èkzanp jennjan-an nou pran o koumansman sa artik-a. Kisa sa té ké fè l’ si roun mouché ki gen bokou soumaké té ka propozé l’ péyé tout so dèt ? Asiré, jennjan-an té ké asèpté é i té ké gen bokou rékonésans pou sa mouché-a. Menm fason-an, Jéova, nou Papa ki kontan nou, bay nou roun kado ki ka pèrmèt li péyé dèt nou ganyen-an, sa lé di péché Adan bay nou-a. Men sa Jézi èspliké : « Bondjé té tèlman kontan monn-an ki i bay so sèl Pitit, pou tout moun ki ka montré yé lafwa annan li pa détrwi, mé pou yé gen lavi pou tout-tan » (Jean 3:16). Anplis di sa, sa kado-a ka pèrmèt nou gen roun bèl lanmityé ké Jéova.
Jézi préché sa bon nouvèl-a : Jéova ka sèrvi ranson-an pou pardonnen nou péché (Jean 3:16). Apré sa, Jézi bay ranson-an lò i mouri (gadé paragraf 5).
6. Kisa nou ké wè annan sa artik-a, é poukisa ?
6 Kouman sa bèl kado-a ka pèrmèt Bondjé pardonnen nou péché ? Pou nou réponn sa késyon-an, nou ké wè sa Labib ka di asou zafè viré byen ké Bondjé, pardonnen nou péché, ranson-an ké bénédiksyon nou ka jwenn grasa ranson-an. Pi nou ké réfléchi asou sa Jéova fè pou pardonnen nou, pi nou ké gen rékonésans pou so pardon.
JÉOVA LÉ NOU DIVINI SO ZANMI
7. a) Ki ròt bagaj Adan ké Èv pédi ? b) Kou nou sa pitit Adan ké Èv, kisa nou bézwen ? (Romains 5:10, 11).
7 Kou Adan ké Èv péché, yé pa té pouvé viv pou tout-tan ankò. Mé anplis di sa, yé pédi yé lanmityé ké yé Papa, Jéova. Anvan yé péché, Adan ké Èv té ka fè parti di fanmi Jéova-a (Luc 3:38). Mé lò yé dézobéyi l’, i mété yé dèrò di so fanmi. A té anvan yé gen tan fè timoun (Gen. 3:23, 24 ; 4:1). Kou nou sa yé pitit, nou bézwen viré byen ké Jéova (li Romains 5:10, 11). Sa lé di ki nou bézwen viré sa so zanmi. Dapré roun liv a, mo grèk yé ka sèrvi pou di « viré byen » pouvé lé di « fè roun lèlmi divini roun zanmi ». Sa ki pi bèl, a ki a Jéova li menm ki pran douvan pou fè sa ki fo pou nou viré byen ké li. Kouman i fè sa ?
SA JÉOVA FÈ
8. Kisa Jéova fè pou nou viré byen ké li ?
8 Jéova désidé viré byen ké moun asou latè-a menmsi yé pa parfè. É pou i fè sa, i désidé pardonnen yé péché. Annan Ékritir ébrayik-ya, pou palé di zafè pardonnen nou péché, yé ka sèrvi roun mo ki pitèt lé di « kouvri ». Pou kouvri nou péché, sa lé di pou pardonnen nou, Jéova ranplasé sa Adan pédi ké roun bagaj ki té gen menm valò-a. Ékritir grèk-ya ka palé osi di sa Jéova fè pou moun asou latè-a viré byen ké li (Rom. 3:25).
9. Kisa Jéova fè pou i té pouvé pardonnen péché Israyélit-ya ?
9 Pou pèrmèt Israyélit-ya gen roun bon lanmityé ké li, Jéova fè roun bagaj pou pardonnen yé péché. An Israyèl, chak lannen yé té ka fè roun lafèt èspésyal yé té ka aplé jou Réconciliation-an. Sa jou-a, gran prèt-a té ka fè sakrifis zannimo pou pèp-a. Kou lavi zannimo gen mwens valò pasé lavi moun, sa sakrifis-ya pa té pouvé kouvri péché-ya nèt. Mé dipi Israyélit-ya té ka répanti é té ka fè sakrifis Jéova té ka doumandé yé fè-a, i té ka asèpté pardonnen yé péché (Héb. 10:1-4). Anplis di sa, sakrifis Israyélit-ya té ka fè jou Réconciliation-an ké ròt jou annan lannen-an té ka idé yé konprann ki yé té ka péché, é ki yé té bézwen rounòt bagaj pou kouvri yé péché nèt.
10. Kisa Jéova fè pou i té pouvé pardonnen nou péché nèt ?
10 Mé, kisa Jéova fè pou i té pouvé pardonnen nou péché nèt ? I fè sa ki fo pou so Pitit i kontan-an « divini roun sakrifis rounsèl fwa sèlman, pou i poté péché roun patché moun » (Héb. 9:28). Jézi bay « so lavi pou péyé ranson-an an échanj di bokou moun » (Mat. 20:28). Sa ranson-an, a kisa ?
PRI RANSON-AN POU NOU VIRÉ BYEN KÉ JÉOVA
11. a) Dapré Labib, a kisa ki ranson-an ? b) Kimoun sèlman té pouvé péyé ranson-an ?
11 Dapré Labib, Jéova désidé ki roun moun té divèt péyé roun ranson, konsa, sa té ké pèrmèt li pardonnen nou péché é nou té ké pouvé viré byen ké li. Ranson-an ka pèrmèt nou viré gen sa Adan pédi. Sonjé sa : Adan ké Èv pédi lavi parfè yé té gen-an é yé pa té pouvé viv pou tout-tan ankò. Donk, ranson-an té divèt gen menm valò ki sa yé té pédi (1 Tim. 2:6). Sèl fason roun moun té pouvé péyé ranson-an, a 1) si a té roun wonm parfè, 2) si i té pouvé viv pou tout-tan asou latè-a é 3) si i té paré bay so lavi pou nou. Lavi sa moun-an té ké pèrmèt nou viré gen sa nou té pédi-a.
12. Poukisa Jézi té pouvé péyé ranson-an ?
12 Gadé trwa rézon ki ka pèrmèt nou konprann poukisa Jézi té pouvé péyé ranson-an. 1) I té parfè ; « i pa fè pyès péché » (1 Pierre 2:22). 2) Kou i té parfè, i té pouvé viv pou tout-tan asou latè-a. 3) I té paré mouri épi bay sa lavi-a i té pouvé gen pou tout-tan asou latè-a pou nou (Héb. 10:9, 10). Jézi té parfè kou Adan, prémyé wonm-an, té parfè anvan i péché (1 Cor. 15:45). A pou sa, lò i mouri pou nou, i té pouvé péyé pri-a pou ranplasé sa Adan té pédi-a (Rom. 5:19). A konsa Jézi divini « dèrnyé Adan-an ». Nou pa bézwen rounòt moun ki parfè vini péyé sa Adan pédi-a pas Jézi mouri « rounsèl kou pou tout-tan » (Héb. 7:27 ; 10:12).
13. Kisa nou wè ?
13 Kisa nou wè ? Nou wè ki Jéova ka kouvri nou péché, sa lé di ki i ka pardonnen nou péché pou nou viré byen ké li. Mé pou i té pouvé pardonnen nou péché, roun moun té divèt péyé ranson-an. Lò Jézi bay so lavi pou nou, so disan ki gen bokou valò péyé ranson-an é sa ka pèrmèt nou viré byen ké Bondjé (Éph. 1:7 ; Héb. 9:14). Kisa sa bay ?
BÉNÉDIKSYON-YAN
14. Kisa nou ké wè aprézan ?
14 Ki bénédiksyon nou ka jwenn grasa sa Jéova fè pou pardonnen nou péché ? Nou ké wè dé bagaj ki ké idé nou konprann sa nou ka ganyen grasa pardon Jéova-a.
15-16. a) Annan Labib, kisa sa lé di « viré achté » ? b) Kisa nou ka rousanti pou Jéova ké Jézi lò nou ka sonjé sa yé fè pou nou ?
15 Labib ka di ki, kou Bondjé péyé ranson-an, i viré achté nou, sa lé di i libéré nou. Nou pa bézwen péyé pou nou péché, Jéova ka éfasé yé nèt. Men sa apot Pyèr di parapòrta sa : « Zòt savé ki, a pa ni ké arjan ni ké lò, bagaj ki ka gaté, yé libéré zòt [ouben « viré achté zòt »] di lavi initil zòt rousouvwè di zòt gangan. Mé a ké roun disan ki gen valò, kou disan roun ti-mouton ki pa gen ni défo ni tach, disan Kris-a » (1 Pierre 1:18, 19).
16 Ranson-an ka libéré nou di dé bagaj ki ka fè nou soufri bokou : péché ké lanmò (Rom. 5:21). Nou gen bokou rékonésans pou Jéova ké Jézi pas disan Jézi ki gen bokou valò ka libéré nou ! (1 Cor. 15:22).
17-18. a) Poukisa Jéova pouvé di ki nou jis ? b) Ki bénédiksyon nou ka jwenn paské Jéova ka di ki nou jis ?
17 Jéova ka di ki nou jis paské i pa ka doumandé nou péyé pou péché nou ka fè, i ka éfasé tout nou péché nèt é a kousidiré nou pa té janmen péché. Mé sa pa lé di ki i pa ka tchenbé kont di so jistis. I pa ka di ki nou jis paské nou mérité l’. É anplis di sa, lò nou ka péché, i ka byen di i pa dakò ké sa menm. Si Jéova ka pardonnen nou péché, a paské nou gen lafwa annan sa i fè pou pardonnen nou péché é nou gen lafwa annan ranson-an (Rom. 3:24 ; Gal. 2:16).
18 Kisa sa lé di pou nou chak ? Pou sa-ya Bondjé chwazi pou yé dirijé ansanm ké Jézi annan syèl-a, Bondjé ja ka di ki yé jis é yé ja divini so pitit-yé (Tite 3:7 ; 1 Jean 3:1). I ka pardonnen yé péché. A kousidiré yé pa té janmen fè pyès péché é donk, yé pouvé fè parti di Rwayonm-an (Rom. 8:1, 2, 30). Kanta sa-ya ki ké viv asou latè-a, Bondjé ka di ki yé jis, yé ka divini so zanmi é i ka pardonnen yé péché (Jacq. 2:21-23). Patché moun-yan ki ké janbé Armagédon ké gen posibilité viv pou tout-tan (Jean 11:26). Kanta « moun ki jis » ké « moun ki pa jis » ki mouri, yé ké résisité (Actes 24:15 ; Jean 5:28, 29). Pou fini, tout sa ki ka adoré Jéova asou latè-a ké « gen libèrté ké laglwar pitit Bondjé-ya » (Rom. 8:21). A pa ti antann nou ka antann sa jou-a koté nou ké parfè é nou ké pouvé viré sa pitit nou Papa, Jéova !
19. Kouman nou sitiasyon vin miyò grasa sa Jéova ké Jézi fè pou nou ? (gadé osi karé-a : « Sa Jéova fè pou pardonnen nou »).
19 Nou pouvé di ki nou té annan menm sitiasyon ké jennjan-an nou palé annan koumansman sa artik-a. I té pédi tousa i té gen é i té gen roun gro dèt i pa té ké janmen pouvé ranboursé. Menm fason mouché-a ki té gen bokou soumaké idé l’, Jéova idé nou osi. Nou sitiasyon chanjé paské Jéova fè sa ki fo pou i pouvé pardonnen nou péché é paské Jézi péyé ranson-an. Grasa nou lafwa annan Jézi, Bondjé pouvé libéré nou di péché ké lanmò. É lò Jéova ka pardonnen nou péché, a kousidiré nou pa té janmen péché. Mé pi enpòrtan-an, a ki dipi aprézan, nou pouvé sa zanmi Jéova, nou Papa ki annan syèl-a é ki kontan nou.
20. Kisa nou ké wè annan artik ki ka vin dèyè-a ?
20 Nou tchò plen ké rékonésans pou Jéova ké Jézi lò nou ka réfléchi asou sa yé fè pou nou (2 Cor. 5:15). Si a pa té yé, nou té fin bat ! Artik ki ka vin dèyè-a ké palé di plizyèr èkzanp Jéova ka pran pou idé nou konprann ki lò i ka pardonnen nou, nou konsyans pa bézwen bat nou ankò pou fot nou fè-a.
KANTIK 10 Louons Jéhovah, notre Dieu !
a F. Danker ké K. Krug, The Concise Greek–English Lexicon of the New Testament, The University of Chicago Press, 2009.
