Jézi anprann moun-yan viv annan lapè. Pourtan, men sa i di so apot-ya roun jou : « Pa pansé ki mo vini mété lapè asou latè-a. Mo pa vini mété lapè, mé zépé. Paské mo vini mété dézòrd ant roun mouché ké so papa, ant roun tifi ké so manman é ant roun bèlfi ké so bèlmè » (Mat. 10:34, 35). Kisa Jézi té lé di ?

Jézi pa té lé séparé fanmi-ya. Mé i té savé ki so ansèyman té ké mété dézòrd annan sèrten fanmi. A pou sa, sa-ya ki té ké lé divini so disip épi batizé té divèt savé kisa ki té pouvé rivé yé akoz di sa désizyon-an. Si yé mouché, yé madanm, ouben rounòt moun annan yé fanmi té ka chaché baré yé chimen, pitèt sa té ké difisil pou yé kontinyé obéyi Jézi.

Labib-a ka ankourajé krétyen-yan rété « byen ké tout moun » (Rom. 12:18). Mé annan roun ran fanmi, ansèyman Jézi pouvé aji kou roun « zépé ». A sa ki ka rivé lò roun moun annan fanmi-a ka asèpté ansèyman Jézi, épi ròt-ya pa lé tandé sa menm. Moun annan menm fanmi-a ka divini « lèlmi » sa-la ki ka anprann lavérité-a (Mat. 10:36).

Sèrten disip Kris ka viv ké moun annan yé fanmi ki pa annan menm rélijyon-an. Détan yé pouvé gen pou désidé si yé ké fè yé fanmi plézi ouben si yé ké fè Jéova ké Jézi plézi. Parèkzanp, yé fanmi pouvé éséyé fòrsé yé fè roun lafèt Bondjé pa kontan. Kimoun yé ké désidé fè plézi ? Jézi di : « Sa-la ki pi kontan so papa ouben so manman pasé mo, pa mérité sa mo disip » (Mat. 10:37). Jézi pa té lé di ki so disip té divèt arété kontan yé manman ké yé papa bokou pou yé mérité sa so disip. I té ka pito montré yé kisa ki té divèt pi enpòrtan annan yé lavi. Si moun annan nou fanmi pa lé nou adoré Jéova, nou ka kontinyé kontan yé. Mé pou nou, nou lanmou pou Bondjé ka pasé anvan.

Lò roun moun annan to fanmi pa lé to adoré Jéova, sa pouvé rèd menm. Mé disip Jézi ka sonjé avèrtisman i té bay : « Sa-la ki pa ka asèpté so poto soufrans épi pa ka swiv mo, pa mérité sa mo disip » (Mat. 10:38). Lò yé fanmi kont yé, krétyen-yan ka wè sa kou roun bagaj roun disip Kris divèt paré pou sipòrté. Mé yé ka èspéré ki, paské yé gen roun bon kondwit, sa ké pouvé fè moun annan yé fanmi vin pi janti épi bay yé anvi konnèt mésaj Labib-a (1 Pierre 3:1, 2).