Yɛ afi 2005 lɛ, yoo ko ni yɔɔ India ni atsɛɔ lɛ Sowbhagya lɛ wu ni esumɔɔ lɛ waa gbo. Be ni ewu lɛ yɔɔ wala mli lɛ, ekwɛ lɛ kɛ amɛbiyoo Meghana, ni eye afii etɛ lɛ jogbaŋŋ. Shi be ni nuu lɛ gbo lɛ, shihilɛ lɛ mli bawa waa kɛhã Sowbhagya kɛ ebiyoo lɛ, no ji ebawa akɛ amɛbaaná shika ni amɛkɛye nii.

 Nɔ ni wo shihilɛ lɛ mli wu ji akɛ, mɛi bakpoo Sowbhagya. Ewekumɛi lɛ kɛ lɛ kɛ ebiyoo lɛ ye tamɔ amɛji nibalɔi, ni amɛkɛɛ Sowbhagya shii abɔ akɛ etɔ amɛ kɛ lɛ kwɛmɔ. Sowbhagya bɔi sɔlemɔ ko ni yɔɔ he ni amɛyɔɔ lɛ yaa akɛ aleee nɔ, no baashɛje emii lo; shi akɛni ohiafo ji lɛ hewɔ lɛ, sɔlemɔ lɛ mli bii lɛ kɛ lɛ yeee jogbaŋŋ. Sowbhagya yabɔi nitsumɔ taomɔ koni ená shika kɛkwɛ ehe kɛ ebiyoo lɛ hu. Egbee hiɛ aahu, shi enáaa nitsumɔ lɛ eko.

 Sowbhagya wie akɛ: “Akɛni mihiɛnɔkamɔ fɛɛ tã hewɔ lɛ, mikpɛ miyiŋ akɛ manu tsofã koni magbo. Kɛ̃lɛ, mile jogbaŋŋ akɛ kɛ́ mibɛ lɛ, mibiyoo lɛ kɛ naagbai babaoo baakpe. No hewɔ lɛ, mikpɛ miyiŋ akɛ mafo mi kɛ mibiyoo lɛ fɛɛ wala sɛɛ nyɔŋlo.” Akɛni Sowbhagya nu he akɛ ehe bɛ sɛɛnamɔ, ni mɔ ko hu sumɔɔɔ esane hewɔ lɛ, eyi mli etee eyahe pɔizin.

 Be ni ekuɔ esɛɛ kɛbaa shĩa lɛ, ewo oketeke, ni Yehowa Odasefonyo ko ni atsɛɔ lɛ Elizabeth lɛ yata emasɛi ni ebɛŋkɛ lɛ ni ekɛ lɛ bɔi sanegbaa. Sowbhagya kɛɛ Elizabeth akɛ, eetao nitsumɔ, ni Elizabeth kɛɛ lɛ akɛ ebaaye ebua lɛ ni ená eko. Elizabeth kɛɛ lɛ akɛ, eeya ni ekɛ mɔ ko ayakase Biblia lɛ. Enɛ hã Sowbhagya naa kpɛ ehe, ejaakɛ eyɛ mli akɛ ekpa sɔlemɔi babaoo amli moŋ, shi enuko pɛŋ akɛ akɛ mɛi kaseɔ Biblia lɛ. Elizabeth kɛɛ Sowbhagya akɛ, ebasara lɛ yɛ shĩa koni etsɔɔ lɛ bɔ ni wɔkɛ mɛi kaseɔ Biblia lɛ wɔhãa.

 Be ni Sowbhagya bashɛ shĩa lɛ, no mli lɛ, eesusu bɔ ni ebaafee efo lɛ kɛ ebiyoo lɛ fɛɛ wala sɛɛ he lolo. Shi no mli lɛ, ewekunyo ko ebawo ebiyoo Meghana kɛtee he ko, hewɔ lɛ, Sowbhagya kpɛ eyiŋ akɛ, ebaamɛ koni kɛ́ akɛ ebiyoo lɛ ba lɛ, amɛyi enyɔ fɛɛ amɛnu pɔizin lɛ koni amɛgboi.

 Be ni eemɛ koni akɛ ebiyoo lɛ aba lɛ, etee eyasara Elizabeth, ni Elizabeth kɛ miishɛɛ here lɛ. Esaramɔ lɛ mli lɛ, Elizabeth kɛ wolo ni ji Mɛni Biblia Lɛ Tsɔɔ Diɛŋtsɛ? lɛ tsɔɔ lɛ. Sowbhagya nya saneyitso ni ji “Nɛgbɛ Gbohii Lɛ Yɔɔ?” lɛ he waa. Enya he ejaakɛ no mli lɛ ewu gbo etsɛko. Nakai gbi lɛ nɔŋŋ lɛ, Sowbhagya hã akɛ lɛ bɔi Biblia lɛ kasemɔ.

 Elizabeth fɔ̃ Sowbhagya nine kɛhã kpokpaa wulu nɔ kpee ni abaafee otsi ni nyiɛ sɛɛ nɔŋŋ lɛ, ni Sowbhagya kpɛlɛ akɛ ebaaya. Kpee lɛ wo lɛ hewalɛ aahu akɛ, ekpɛ eyiŋ akɛ ebaasumɔ ni etsɔ Yehowa Odasefonyo. Be ni agbe kpee lɛ naa ni eba shĩa lɛ, ená nitsumɔ ni ebɔi tsumɔ.

 Sowbhagya tee nɔ ekase Biblia lɛ. Agbɛnɛ, ená hiɛnɔkamɔ kpakpa ko, hewɔ lɛ, esumɔɔɔ ni efoɔ ewala sɛɛ dɔŋŋ. Abaptisi lɛ, ni sɛɛ mli lɛ abaptisi ebi Meghana hu. Ŋmɛnɛ lɛ, amɛyi enyɔ lɛ fɛɛ amɛmiisɔmɔ akɛ daa gbɛgbalɔi, ni Meghana kɔnɛtiɔ Intanɛt lɛ ni ekɛ wiemɔ shishitsɔɔmɔ ɔfis ko ni yɔɔ India lɛ tsuɔ nii.

 Eŋɔɔ Sowbhagya kɛ Meghana naa waa akɛ be ni Elizabeth na Sowbhagya yɛ oketeke lɛ mli lɛ, ená ehe miishɛɛ, etsi ebɛŋkɛ lɛ, ni ekɛ lɛ gba anɔkwale lɛ he sane! Amɛhiɛ esɔ nɔ ni Yehowa efee ehã amɛ lɛ waa diɛŋtsɛ. Meghana wie akɛ: “Kɛ́ jeee anɔkwale lɛ ni wɔnine shɛ nɔ nakai gbi lɛ kulɛ, wɔgboi jeeŋmɔ. Amrɔ nɛɛ, wɔyɛ miishɛɛ waa. Mi kɛ mimami fɛɛ miikpa gbi ni wɔbaafua mipapa ekoŋŋ lɛ gbɛ waa, koni wɔtsɔɔ lɛ Yehowa he nii, ni wɔgba lɛ bɔ ni fee ni Yehowa baa wɔwala yi.”