Yehowa Odasefoi ni yɔɔ Bulgaria lɛ kɛ hiɛdɔɔ miitsɔɔ mɛi anɔkwale ni kɔɔ Nyɔŋmɔ kɛ e-Wiemɔ ni ji Biblia lɛ he. Kɛjɛ afi 2000 lɛ kɛbaa nɛɛ lɛ, Odasefoi ohai abɔ ni jɛ maji krokomɛi anɔ efã kɛtee Bulgaria koni amɛyaye amɛbua kɛtsu nitsumɔ nɛɛ. Mɛɛ naagbai komɛi mɛi ni fãa kɛyaa maji krokomɛi anɔ koni amɛyashiɛ lɛ kɛkpeɔ? Mɛɛ gbɛ nɔ amɛná he sɛɛ? Naa nɔ ni mɛi komɛi ni efã kɛtee Bulgaria lɛ ewie.

 Darren, ni jɛ England lɛ wie akɛ, “Oti ni wɔkɛma wɔhiɛ ji ni wɔyasɔmɔ yɛ maŋsɛɛ he ni shiɛlɔi ahe miihia yɛ. Be ni mikɛ Dawn bote gbalashihilɛ mli sɛɛ lɛ, wɔfã kɛtee London koni wɔyaye wɔbua kɛtsɔɔ mɛi Biblia mli anɔkwalei lɛ yɛ Russia wiemɔ mli. Yɛ be kɛ beiaŋ lɛ, wɔto gbɛjianɔ bei fioo komɛi akɛ wɔbaafã kɛya maŋ kroko nɔ, shi yɛ yiŋtoi komɛi ahewɔ lɛ eyabaaa nɔ. Wɔyasusu akɛ ehiii wɔyaa dɔŋŋ, shi wɔnaanyo ko ye ebua wɔ ni wɔna akɛ nibii etsake yɛ wɔshihilɛ mli, no hewɔ lɛ wɔbaanyɛ wɔya agbɛnɛ.” Darren kɛ Dawn bɔi maji ni shiɛlɔi ahe miihia yɛ, ni amɛbaanyɛ amɛfã kɛyahi jɛmɛ lɛ taomɔ. Kɛkɛ ni yɛ afi 2011 lɛ, amɛfã kɛtee Bulgaria.

 Miishɛɛ ni mɛi ni fã kɛtee maji krokomɛi anɔ lɛ náa kɛ amɛniiashikpamɔ lɛ wo mɛi ni kulɛ amɛkɛ nakai oti lɛ emako amɛhiɛ lɛ hewalɛ. Giada, ni kɛ ewu Luca hi Italy lɛ wie akɛ, “Mikɛ Odasefoi ni yɔɔ ekãa ni kɛ miishɛɛ miisɔmɔ yɛ South America kɛ Africa lɛ kpe. Miishɛɛ ni amɛyɔɔ kɛ niiashikpamɔi ni amɛgba wɔ lɛ ná minɔ hewalɛ waa. Enɛ ye ebua mi ni misusu otii ni mikɛ mamɔ mihiɛ yɛ Yehowa sɔɔmɔ lɛ mli lɛ he ekoŋŋ.”

 Tomasz kɛ eŋa Veronika kɛ amɛbii enyɔ, Klara kɛ Mathias, fã kɛjɛ Czech Republic kɛtee Bulgaria yɛ afi 2015. Mɛni ye ebua amɛ ni amɛnyɛ amɛfee nakai? Tomasz wie akɛ: “Wɔsusu mɛi ni amɛfã kɛtee maji krokomɛi anɔ, ni wɔwekumɛi fata he lɛ anɔkwɛmɔnɔ lɛ he, ni wɔjwɛŋ amɛniiashikpamɔi lɛ hu anɔ. Miishɛɛ ni amɛyɔɔ lɛ ná wɔnɔ hewalɛ aahu akɛ, kɛ́ wɔyɛ shĩa lɛ, wɔfeɔ ekomɛ kɛgbaa he sane.” Weku nɛɛ kɛ miishɛɛ miisɔmɔ yɛ amɛshikpɔŋ kuku hee ni yɔɔ Bulgaria maŋtiase ko ni atsɛɔ lɛ Montana lɛ mli bianɛ.

 Naa nɔ ni Linda ni fã kɛtee Bulgaria lɛ hu wie. Ekɛɛ: “Afii komɛi ni eho nɛɛ lɛ, mifã gbɛ kɛtee Ecuador, ni mikɛ nyɛmimɛi komɛi ni efã kɛba jɛmɛ koni amɛbashiɛ lɛ kpe. No hã mishwie miyiŋ akɛ ekolɛ mi hu wɔsɛɛ lɛ, manyɛ mafã kɛya he ko ni shiɛlɔi ahe miihia yɛ.” Petteri kɛ eŋa Nadja ni jɛ Finland lɛ hu susu mɛi krokomɛi anɔkwɛmɔnɔ he. Amɛwie akɛ: “Be ni wɔyɔɔ Finland lɛ, shiɛlɔi komɛi ni yɔɔ wɔsafo lɛ mli lɛ fã kɛtee maŋ kroko nɔ koni amɛyashiɛ. Daa nɛɛ lɛ, amɛkɛ miishɛɛ wieɔ afii ni amɛye yɛ nakai sɔɔmɔ lɛ mli lɛ he. Amɛkɛɛ nakai bei lɛ ji bei ni amɛná miishɛɛ fe fɛɛ yɛ amɛshihilɛ mli.”

 Gbɛjianɔtoo kpakpa he miihia waa kɛhã mɛi ni miisumɔ ni amɛyasɔmɔ yɛ maŋ kroko nɔ lɛ. (Luka 14:28-30) Nele, ni jɛ Belgium lɛ wie akɛ, “Be ni shwelɛ ni miyɔɔ akɛ mayasɔmɔ yɛ maŋ kroko nɔ lɛ mli bawa lɛ, misɔle ni mitao nii amli yɛ asafo lɛ woji lɛ amli. Mikane nakai saji lɛ jogbaŋŋ, ni mitao nibii ni ehe baahia ni mafee koni manyɛ mafã kɛya.”

 Kristian kɛ Irmina ni jɛ Poland lɛ ehi Bulgaria nɔ ni fe afii nɛɛhu nɛ. Amɛyɔse akɛ, ehi akɛ amɛtee asafoŋ kpeei ni Bulgaria wiemɔ kuu ko ni yɔɔ Poland lɛ feɔ lɛ, dani amɛfã kɛtee Bulgaria lɛ, ejaakɛ eye ebua amɛ waa. Kuu lɛ wo amɛ hewalɛ, ni amɛye amɛbua amɛ ni amɛkase wiemɔ lɛ. Kristian kɛ Irmina wie akɛ: “Wɔbayɔse akɛ, kɛ́ okɛ ohe hã lɛ, Yehowa Nyɔŋmɔ hãa bo nibii fɛɛ ni he hiaa bo lɛ, ni enɛ yɛ naakpɛɛ waa. Kɛ́ ojɛ osuɔmɔ mli okɛɛ Yehowa akɛ, ‘Naa Mi! Tsu Mi!’ lɛ, no lɛ, obaanyɛ ofee nibii po ni okpaaa gbɛ akɛ obaafee.”​—Yesaia 6:8.

 Reto kɛ Cornelia ni ji gbalashihilɛ mli hefatalɔi ni jɛ Switzerland lɛ kpɛ mli akɛ, bɔ ni afee ni amɛnyɛ amɛsaa amɛhe kɛfã gbɛ nɛɛ eko lɛ, amɛbaahã amɛshihilɛ afee mlɛo, ni amɛbua shika naa. Amɛtsɔɔ mli akɛ, “Afi dani wɔbaashi kɛya lɛ, wɔyaye otsi yɛ Bulgaria bɔ ni afee ni wɔkwɛ bɔ ni maŋ lɛ mli shihilɛ yɔɔ. Be ni wɔtee lɛ, wɔkɛ nyɛmi nuu ko kɛ eŋa ni amɛji maŋsɛɛ sɔɔlɔi ni yɔɔ niiashikpamɔi lɛ gba sane, ni amɛŋaawoo lɛ ye ebua wɔ waa.” Reto kɛ Cornelia kɛ ŋaa srɔtoi ni awo amɛ lɛ etsu nii, ni no ehã amɛnyɛ amɛhi Bulgaria nɔ ni fe afii 20 sɔŋŋ lɛ.

 Ehe baahia ni mɛi ni fãa kɛyahiɔ maŋ kroko nɔ lɛ atsake amɛhe amɛwo shihilɛ hei, kɛ shihilɛi ni mli wawai po amli. (Bɔfoi 16:9, 10; 1 Korintobii 9:19-23) Gbɛtsiinii wulu kɛhã mɛi babaoo ji wiemɔ kroko kasemɔ. Luca ni atsĩ etã kɛtsɔ hiɛ wie akɛ, “Kɛ́ wɔjɛ wɔtsuiŋ wɔhã saji ahetoo yɛ Kristofoi akpeei ashishi lɛ, wɔmii shɛɔ wɔhe waa. Shi be saŋŋ ho ni ewa kɛhã mi kɛ miŋa akɛ wɔbaasaa wɔhe kɛhã sane hetoo kuku po yɛ Bulgaria wiemɔ mli! Efee tamɔ wɔtsɔmɔ gbekɛbii ekoŋŋ. Anɔkwa, gbekɛbii ni wieɔ Bulgaria lɛ po asaji ahetoo lɛ hi fe wɔ nɔ lɛ.”

 Ravil ni jɛ Germany lɛ wie akɛ: “Mináaa wiemɔ lɛ kasemɔ mlɛo. Mitee nɔ mikɛɛ mihe akɛ, ‘Kɛ́ otɔ̃ yɛ wiemɔ lɛ kasemɔ mli lɛ, kɛfee ŋmɔlɔ.’ Minaaa kai nɛɛ akɛ naagba, shi moŋ lɛ efata sɔɔmɔ krɔŋŋ ni mikɛhãa Yehowa lɛ he.”

 Linda, ni wɔtsĩ etã kɛtsɔ hiɛ lɛ wie akɛ: “Mibɔɔɔ mɔdɛŋ kɛ wiemɔ kasemɔ. Bulgaria wiemɔ lɛ kasemɔ wa, ni mika shii abɔ akɛ makpa wiemɔ lɛ kasemɔ. Kɛ́ onyɛɛɛ okɛ mɛi awie yɛ amɛwiemɔ mli, ni bo hu onuuu nɔ ni amɛwieɔ lɛ shishi lɛ, ohe feɔ shoo. Bɔ ni afee ni maya nɔ mawaje mikɛ Yehowa teŋ wekukpaa lɛ, mikaseɔ nɔ fɛɛ nɔ yɛ Swedish wiemɔ mli. Naagbee lɛ, yɛ minyɛmimɛi ni misumɔɔ lɛ ayelikɛbuamɔ naa lɛ, minyɛ mikase wiemɔ lɛ.”

 Kaa kroko hu ji, bɔ ni abaafee aye hiɛ ni tseɔ shĩa lɛ nɔ. Mɛi ni fãa kɛyahiɔ he kroko lɛ, shiɔ amɛnanemɛi kɛ wekumɛi yɛ amɛmaŋ lɛ mli. Eva, ni kɛ ewu Yannis fã kɛtee Bulgaria lɛ wie akɛ, “Shishijee lɛ, mihe fee shoo. Bɔ ni afee ni manyɛ makpee naa lɛ, wɔkɛ wɔnanemɛi kɛ wɔwekumɛi ni yɔɔ wɔmaŋ lɛ mli lɛ fɔɔ sanegbaa, ni wɔfee nanemɛi hei hu yɛ biɛ.”

 Naagbai krokomɛi hu yɛ. Robert kɛ Liana ni jɛ Switzerland lɛ hu tsɔɔ mli akɛ: “Wiemɔ lɛ kɛ bɔ ni biɛ bii lɛ hiɔ shi amɛhãa lɛ bafee kaa wulu kɛhã wɔ, ni wɔsako wɔhe kɛhã fɛ̃i bei ni naa wa waa ni yɔɔ biɛ lɛ.” Kɛ̃lɛ, jwɛŋmɔ ni ja kɛ nibii ni akɛfeɔ ŋmɔlɔ lɛ eye ebua gbalashihilɛ mli bii nɛɛ ni amɛkɛ anɔkwayeli esɔmɔ afii 14 sɔŋŋ yɛ Bulgaria.

 Lilly jieɔ yi waa akɛ, ehi akɛ abaayashiɛ yɛ hei ni hiamɔ lɛ da yɛ. Ekɛɛ akɛ, “Mibana gbɛi srɔtoi ni Yehowa etsɔ nɔ eye ebua mi lɛ waa fe bɔ ni ekolɛ manyɛ mana kɛ́ miyɛ mimaŋ lɛ mli. Mikɛ be babaoo yeɔ ebuaa mɛi, ni no hãa mitsiɔ mibɛŋkɛɔ Yehowa kpaakpa, mináa miishɛɛ waa, ni mitsui hu nyɔɔ mimli.” Ewu Ravil kɛ lɛ kpãa gbee. Lɛ hu ewie akɛ: “Eji shihilɛ ni nɔ bɛ kwraa akɛ obaaná hegbɛ krɛdɛɛ kɛle Kristofoi ni yɔɔ ekãa ni jɛ maji srɔtoi anɔ ni yɔɔ niiashikpamɔi babaoo yɛ Biblia mli anɔkwalei atsɔɔmɔ mli. Mikase nibii babaoo kɛjɛ amɛdɛŋ.”

 Akɛni mɛi babaoo ejɛ amɛsuɔmɔ mli amɛkɛ amɛhe ehã kɛmiitsu nitsumɔ nɛɛ hewɔ lɛ, aashiɛ “Maŋtsɛyeli lɛ he sane kpakpa nɛɛ yɛ shikpɔŋ lɛ nɔ fɛɛ.” (Mateo 24:14) Amɛsuɔmɔ mli ni amɛjɛ ni amɛfã kɛtee Bulgaria amɛyaye amɛbua mɛi krokomɛi hewɔ lɛ, amɛna akɛ, Yehowa ehã amɛ nɔ ni amɛtsui taoɔ, ni ehã amɛgbɛjianɔtoi fɛɛ eye omanye.​—Lala 20:1-4.